Anjaam Bakhair | Patras Mazmoon

منظر: ایک تنگ و تاریک کمرہ جس میں بجز ایک پرانی سی میز اور ایک لرزہ براندام کرسی کے اور کوئی فرنیچر نہیں۔ زمین پر ایک طرف چٹائی بچھی ہے جس پر بے شمار کتابوں کا انبار لگا ہے۔ اس انبار میں سے جہاں تک کتابوں کی پشتیں نظر آتی ہیں وہاں شیکسپیئر، ٹالسٹائے، ورڈزورتھ وغیرہ مشاہیر ادب کے نام دکھائی دیے جاتے ہیں۔ باہر کہیں پاس ہی کتے بھونک رہے ہیں۔ قریب ہی ایک برات اتری ہوئی ہے۔ اس کے بینڈ کی آواز بھی سنائی دے رہی ہے۔ جس کے بجانے والے دق، دمہ، کھانسی اور اسی قسم کے دیگر امراض میں مبتلا معلوم ہوتے ہیں۔ ڈھول بجانے والے کی صحت البتہ اچھی ہے۔

پطرس نامی ایک نادار معلم میز پر کام کر رہا ہے۔ نوجوان ہے لیکن چہرے پر گزشتہ تندرستی اور خوش باشی کے آثار صرف کہیں کہیں باقی ہیں۔ آنکھوں کے گرد سیاہ حلقے پڑے ہوئے ہیں۔ چہرے سے ذہانت پسینہ بن کر ٹپک رہی ہے۔

سامنے لٹکی ہوئی ایک جنتری سے معلوم ہوتا ہے کہ مہینے کی آخری تاریخ ہے۔

باہر سے کوئی دروازہ کھٹکھٹاتا ہے۔ پطرس اٹھ کر دروازہ کھول دیتا ہے۔ تین طالب علم نہایت اعلی لباس زیب تن کئے اندر داخل ہوتے ہیں۔

پطرس:۔ حضرات اندر تشریف لے آئیے۔ آپ دیکھتے ہیں کہ میرے پاس صرف ایک کرسی ہے لیکن جاہ وحشمت کا خیال بہت پوچ خیال ہے۔ علم بڑی نعمت ہے لہذا اے میرے فرزندو! اس انبار سے چند ضخیم کتابیں انتخاب کرلو اور ان کو ایک دوسرے کے اوپر چُن کر ان پر بیٹھ جاؤ۔ علم ہی تم لوگوں کا اوڑھنا اور علم ہی تم لوگوں کا بچھونا ہونا چاہیئے (کمرے میں ایک پراسرار نور سمجھا جاتا ہے فرشتوں کے پروں کی پھڑپھڑاہٹ سنائی دیتی ہے)

طالب علم:۔ (تینوں مل کر)اے خدا کے برگزیدہ بندے! اے ہمارے محترم استاد ہم تمہارا حکم ماننے کو تیار ہیں۔ علم ہی ہم لوگوں کا اوڑھنا اور علم ہی ہم لوگوں کا بچھونا ہونا چاہیئے
(کتابوں کو جوڑ کر بیٹھ جاتے ہیں)
پطرس:۔ کہوا ہندوستان کے سپوتو! آج تم کو کون سے علم کی تشنگی میرے دروازے تک کشاں کشاں لے آئی؟

پہلا طالب علم: اے نیک انسان! ہم آج تیرے احسانوں کا بدلہ اتارنے آئے ہیں
دوسرا طالب علم:۔ اے فرشتے! ہم تیری نوازشوں کا ہدیہ پیش کرنے آئے ہیں
تیسرا طالب علم:۔ اے ہمارے مہربان! ہم تیری محنتوں کا پھل تیرے پاس لائے ہے۔

پطرس:۔ یہ نہ کہو! یہ نہ کہو! خود میری محنت ہی میری محنت کا پھل ہے۔ کالج کے مقررہ اوقات کے علاوہ جو کچھ میں نے تم کو پڑھایا اس کا معاوضہ مجھے اسی وقت وصول ہوگیا جب میں نے تمہاری آنکھوں میں ذکاوت چمکتی دیکھی۔آہ تم کیا جانتے ہو کہ تعلیم وتدریس کیسا آسمانی پیشہ ہے۔ تاہم تمہارے الفاظ سے میرے دل میں ایک عجیب مسرت سی بھر گئی ہے۔ مجھ پر اعتماد کرو اور بالکل مت گھبراؤ۔ جو کچھ کہنا ہے تفصیل سے کہو۔

پہلا طالب علم: (سرو قد اور دست بستہ کھڑا ہو کر)اے محترم استاد! ہم علم کی بے بہا دولت سے محروم تھے۔ درس کے مقررہ اوقات سے ہماری پیاس نہ بجھ سکتی تھی۔ پولیس اور سول سروس کے امتحانات کی آزمائش کڑی ہے۔تو نے ہماری دستگیری کی اور ہمارے تاریخ دماغوں میں اجالا ہو گیا مقتدر معلم! تو جانتا ہے آج مہینے کی آخری تاریخ ہے۔ ہم تیری خدمتوں کا حقیر معاوضہ پیش کرنے آئے ہیں۔ تیرے عالمانہ اور تیری بزرگانہ شفقت کی قیمت کوئی ادا نہیں کرسکتا۔ تاہم اظہار تشکر کے طور پر جو کم مایہ رقم ہم تیری خدمت میں پیش کریں اسے قبول کرکہ ہماری احسان مندی اس سے کہیں بڑھ کر ہے۔

پطرس: تمہارے الفاظ سے ایک عجیب بےقراری میرے جسم پر طاری ہوگئی ہے۔(پہلے طالب علم کا اشارہ پاکر باقی دو طالبعلم بھی کھڑے ہو جاتے ہیں۔باہر بینڈ یکلخت زور زور سے بجنے لگتا ہے)

پہلا طالب علم (آگے بڑھ کر: اے ہمارے مہربان مجھ حقیر کی نظر قبول کر۔ بڑے ادب و احترام کے ساتھ اٹھنی پیش کرتا ہے)

دوسرا طالب علم (آگے بڑھ کر) اے فرشتے! میرے ہدیہ کو شرف قبولیت بخش۔(اٹھنی پیش کرتا ہے)

تیسرا طالب علم (آگے بڑھ کر) اے نیک انسان! مجھ نا چیز انسان کو مفتخر فرما (اٹھنی پیش کرتا ہے)

پطرس (جذبات سے بے قابو ہو کر رقت انگیز آواز سے):” اے میرے فرزندو! خدا وند کی رحمت تم پر ہو۔ تمہاری سعادت مندی اور فرض شناسی سے میں بہت متاثر ہوا ہوں۔ تمہیں اس دنیا میں آرام اور آخرت میں نجات نصیب ہو اور خدا تمہارے سینوں کو علم کے نور سے منور رکھے۔ (تینوں کو اٹھا کر میز پر رکھ لیتا ہے)

طالب علم (تینوں مل کر) : اللہ کے برگزیدہ بندے! ہم فرض سے سبکدوش ہو گئے اب ہم اجازت چاہتے ہیں کہ گھر پر ہمارے والدین ہمارے لیے بیتاب ہوں گے۔

پطرس: خدا تمہارا حامی و ناصر ہو اور تمہاری علم کی پیاس اور بھی بڑھتی رہے۔
(طالب علم چلے جاتے ہیں)

پطرس: (تنہائی میں سربسجود ہو کر): باری تعالی تیرا لاکھ لاکھ شکر ہے کہ تو نے مجھے اپنی ناچیز محنت کے زمرے کے لئے بہت دنوں انتظار میں نہ رکھا۔ تیرے رحمت کی کوئی انتہاء نہیں لیکن ہماری کم مائیگی اس سے بھی کہیں بڑھ کر ہے۔ یہ تیرا ہی فضل و کرم ہے کہ تو میرے وسیلے سے اوروں کو بھی رزق پہنچاتا ہے اور جو ملازم میری خدمت کرتا ہے اس کا بھی کفیل تو نے مجھے ہی بنا رکھا ہے۔ تیری رحمت کی کوئی انتہا نہیں اور تیری بخشش ہمیشہ ہمیشہ جاری رہنے والی ہے۔

(کمرے میں پھر ایک پراسرار سی روشنی چھا جاتی ہے)

اور فرشتوں کے پروں کی پھڑپھڑاہٹ سنائی دیتی ہے۔ کچھ دیر کے بعد پطرس سجدے سے سر اٹھاتا ہے اور ملازم کو آواز دیتا ہے۔

پطرس: اے خدا کے دین دار اور محنتی بندے! ذرا یہاں تو آئیو۔

ملازم: (باہر سے) اے میرے خوش حصالآقا! میں کھانا پکا کر آؤں گا کہ تعجیل شیطان کا کام ہے۔

(ایک طویل وقفہ جس کے دوران میں درختوں کے سائے پہلے سے دگنے لمبے ہو گئے ہیں)

پطرس: انتظار کی گھڑیاں کس قدر شیریں ہیں۔ کتوں کے بھونکنے کی آواز کس خوش اسلوبی سے بینڈ کی آواز کے ساتھ مل رہی ہے۔

(سر بسجود گر پڑتا ہے)

(پھر اٹھ کر میز کے سامنے بیٹھ جاتا ہے. اٹھنیوں پر نظر پڑتی ہے ان کو فوراً ایک کتاب کے نیچے چھپا دیتا ہے)

پطرس:۔ آہ! مجھے زرودولت سے نفرت ہے۔ خدایا میرے دل کو دنیا کی لالچ سے پاک رکھیو۔

(ملازم اندر آتا ہے)

پطرس: اے مزدور پیشہ انسان! مجھے تجھ پر رحم آتا ہے کہ ضیاء علم کی ایک کرن بھی کبھی تیرے سینے میں داخل نہ ہوئی۔ تاہم خداوند تعالیٰ کے دربار میں ہم سب برابر ہیں۔ تو جانتا ہے آج مہینے کی آخری تاریخ ہے۔ تیری تنخواہ کی ادائیگی کا وقت سر پر آگیا۔ خوش ہوکہ آج تجھے اپنی مشقت کا معاوضہ مل جائے گا۔ یہ تین اٹھنیاں قبول کر اور باقی کے ساڑھے اٹھارہ روپے کے لیے کسی لطیفہ غیبی کا انتظار کر۔ دنیا امید پر قائم ہے اور مایوسی کفر ہے۔
(ملازم اٹھنیاں اتنی زور سے زمین پر پھینک کر گھر سے باہر نکل جاتا ہے۔ بینڈ زور سے بجنے لگتا ہے)

پطرس: خدایا! تکبر کے گناہ سے ہم سب کو بچائے رکھ اور ادنیٰ طبقہ کے لوگوں کا سا غرور ہم سے دور رکھ۔
(پھر کام میں مشغول ہوجاتا ہے)
باورچی خانے سے کھانا جلنے کی ہلکی ہلکی بو آرہی ہے۔۔۔۔۔۔۔ ایک طویل وقفہ جس کے دوران درختوں کے سائے پہلے سے جو گنے اور لمبے ہو چکے ہو گے ہیں۔ بینڈ بدستور بج رہا ہے۔ یک لخت باہر سڑک پر موٹروں کے آکر رک جانے کی آواز سنائی دیتی ہے۔
(تھوڑی دیر بعد کوئی شخص دروازے پر دستک دیتا ہے)

پطرس:۔ (کام پر سے سر اٹھا کر)اے شخص تو کون ہے؟

ایک آواز: (باہر سے)حضور! میں غلاموں کا غلام ہوں اور ہر دست بستہ کھڑا ہوں کہ اجازت ہو تو اندر آوں اور عرض حال کروں۔

پطرس: (دل میں)میں اس آواز سے ناآشنا ہوں لیکن لہجے سے پایا جاتا ہے کہ بولنے والا کوئی شائستہ شخص ہے۔ خدایا یہ کون ہے؟ (بلند آواز سے) اندر آجائے۔
(دروازہ کھلتا ہے اور ایک شخص لباس فاخرہ پہنے اندر داخل ہوتا ہے۔ گو چہرے سے وقار ٹپک رکھا ہے لیکن نظریں زمین دوز ہیں اور ادب و احترام سے ہاتھ باندھے کھڑا ہے)

پطرس: آپ دیکھتے ہیں کہ میرے پاس صرف ایک ہی کرسی ہے لیکن جاہ وحشمت کا خیال بہت پوچ خیال ہے۔ علم بڑی دولت ہے لہذا اے محترم اجنبی! اس انبار سے چند ضخیم کتابیں انتخاب کرلو اور ان کو ایک دوسرے کے اوپر چُن کر ان پر بیٹھ جاؤ۔ علم ہی ہم لوگوں کا اوڑھنا اور علم ہی ہم لوگوں کا بچھونا ہونا چاہیئے۔

اجنبی: اے برگزیدہ شخص! میں تیرے سامنے کھڑے رہنے ہی میں اپنی سعادت سمجھتا ہوں۔

پطرس: تمہیں کون سے علم کی تشنگی میرے دروازے تک کشاں کشاں لے آئی؟

اجنبی: اے ذی علم محترم! گوتم میری صورت سے واقف نہیں لیکن میں شعبہ تعلیم کا افسر اعلی ہوں اور شرمندہ ہوں کہ میں آج تک کبھی نیاز حاصل کرنے کے لئے حاضر نہ ہوا۔ میری اس کوتاہی اور غفلت کو اپنے علم وفضل کے صدقے معاف کرو۔

(آبدیدہ ہو جاتا ہے)

پطرس:اے خدا کیا یہ سب وہم ہے؟ کیا میری آنکھیں دھوکا کھا رہی ہیں؟

اجنبی: مجھے تعجب نہیں کہ تم میرے آنے کو وہم سمجھو کیونکہ آج تک ہم نے تم جیسے نیک اور برگزیدہ انسان سے اس قدر غفلت برتی کہ مجھے خود اچمبھا معلوم ہوتا ہے۔ لیکن مجھ پر یقین کرو میں فی الحقیقت یہاں تمہاری خدمت میں کھڑا ہوں اور تمہاری آنکھیں تمہیں ہرگز دھوکہ نہیں دے رہی ہیں۔ای شریف اور غم زدہ انسان یقین نہ ہوتو میرے چٹکی لے کر میرا امتحان کر لو۔
(پطرس اجنبی کے چٹکی لیتا ہے۔ اجنبی بہت زور سے چیختا ہے)

پطرس: ہاں اب مجھے کچھ کچھ یقین آ گیا۔ لیکن حضور والا! آپ کا یہاں قدم رنجہ فرمانامیرے لیے اس قدر باعث فخر ہے کہ مجھے ڈر ہے کہیں میں دیوانہ نہ ہوجاؤں۔

اجنبی: ایسے الفاظ کہہ کر مجھے کانٹوں میں نہ گھسیٹو اور یقین جانو کہ میں اپنی گزشتہ خطاؤں پر بہت نادم ہوں۔

پطرس: (مبہوت ہو کر) مجھے اب کیا حکم ہے؟

اجنبی: میری اتنی مجال کہاں کہ میں آپ کو حکم دوں۔ البتہ ایک عرض ہے اگر آپ منظور کرلیں تو میں اپنےآپ کو دنیا کا سب سے خوش نصیب انسان سمجھوں۔

پطرس: آپ فرمائیے! میں سن رہا ہوں۔ گو مجھے یقین نہیں کہ یہ عالم بیداری ہے۔ (اجنبی تالی بجاتا ہے۔چھے خدام اچھے بڑے بڑے صندوق اٹھا کر اندر داخل ہوتے ہیں اور زمین پر رکھ کر بڑے ادب سے کورنش بجا لا کر باہر چلے جاتے ہیں)

اجنبی: (صندوقوں کے ڈھکنے کھول کر) میں بادشاہ معظم، شہزادہ ویلز، وائسراۓ ہند اور کمانڈر ان چیف ان چاروں کے ایما پر یہ تحائف آپ کی خدمت میں آپ کے علم و فضل کی قدردانی کے طور پر لے کر حاضر ہوا ہوں۔ (بھرائی ہوئی آواز سے) ان کو قبول کیجیے اور مجھے مایوس واپس نہ بھیجیے ورنہ ان سب کا دل ٹوٹ جائے گا۔

پطرس: (صندوقوں کو دیکھ کر) سونا، اشرفیاں، جواہرات! مجھے یقین نہیں آتا۔( آیت الکرسی پڑھنے لگتا ہے)

اجنبی: ان کو قبول کیجیے اور مجھے مایوس واپس نہ بھیجیے۔ (آنسو ٹپ ٹپ گرتے ہیں)

گانا: آج موری آنکھیاں پل نہ لاگیں۔

پطرس: اے اجنبی تیرے آنسو کیوں گر رہے ہیں؟ اور تو کیوں گا رہا ہے؟ معلوم ہوتا ہے تجھے اپنے جذبات پر قابو نہیں۔ یہ تیری کمزوری کی نشانی ہے۔ خدا تجھے تقویت اور ہمت دے۔ میں خوش ہوں کہ تو اور تیرے آقا علم سے اس قدر محبت رکھتے ہیں۔ بس اب جا کہ ہمارے مطالعے کا وقت ہے۔ کل کالج میں اپنے لیکچروں سے ہمیں چار پانچ سو روحوں کو خواب جہالت سے جگانا ہے۔

اجنبی: (سسکیاں بھرتے ہوئے) مجھے اجازت ہو تو میں بھی حاضر ہو کر آپ کے خیالات سے مستفید ہوں۔

پطرس: خدا تمہارا حامی و ناصر ہو اور تمہارے علم کی پیاس اور بھی بڑھتی رہے۔ (اجنبی رخصت ہوجاتا ہے۔ پطرس صندوقوں کو کھوئی ہوئی نظروں سے دیکھتا رہتا ہے اور پھر یکلخت مسرت کی ایک چیخ مار کر گر پڑتا ہے اور مر جاتا ہے۔ کمرے میں ایک پراسرار نور چھا جاتا ہے اور فرشتوں کے پروں کی پھڑپھڑاہٹ سنائی دیتی ہے۔ باہر بینڈ بدستور بج رہا ہے۔)

Close