تو کجا من کجا

0
تو کجا من کجا
تو امیر حرم میں فقیر عجم
تیرے گُن اور یہ لب میں طلب ہی طلب
تو عطاء ہی عطاء
تو کجا من کجا
تو عبد آفریں میں ہوں دو چار پل
تو یقیں میں گماں میں سخن تو عمل
تو ہے معصومیت میں نری معصیت
تو کرم میں خطاء
تو ہے اہرام انوار باندھے ہوئے
میں درودوں کی دستار باندھے ہوئے
کعبہء عشق تو میں تیرے چار سُو
تو اثر میں دعا
تو کجا من کجا
تو حقیقت ہے میں صرف احساس ہوں
تو سمندر میں بھٹکی ہوئی پیاس ہوں
میرا گھر خاک پر اور تیری رہگزر سدرۃ المنتہا
میرا ہر سانس تو خون نچوڑے میرا
تیری رحمت مگر دل نہ توڑے میرا
کاسہء ذات ہوں تیری خیرات ہوں
تو سخی میں گدا
تو کجا من کجا
ڈگمگاؤں جو حالات کے سامنے
آئے تیرا تصور مجھے تھامنے
میری خوش قسمتی میں تیرا امتی
تو جزا میں رضا
میرا ملبوس ہے پردہ پوشی تیری
مجھ کو تاب سخن دے خموشی تیری
تو جلی میں خفی تو اٹل میں نفی
تو صلہ میں گلہ
تو کجا من کجا
دوریاں سامنے سے جو ہٹنے لگیں
جالیوں سے نگاہیں لپٹنے لگیں
آنسوؤں کی زباں ہو میری ترجماں
دل سے نکلے صدا
تو امیر حرم میں فقیر عجم
تیرے گُن اور یہ لب میں طلب ہی طلب
تو عطاء ہی عطاء
تو کجا من کجا