Advertisement

غزل

روشِ حسنِ مراعات چلی جاتی ہے
ہم سے اور ان سے وہی بات چلی جاتی ہے
اس جفا جو،سے بہ ایماے تمنا اب تک
ہوس لطف و عنایات چلی جاتی ہے
ہم سے ہرچند وہ ظاہر میں خفا ہیں، لیکن
کوششِ پرسشِ حالات چلی جاتی ہے
اس ستم گر کو ستم گر نہیں کہتے بنتا
سعی تاویل خیالات چلی جاتی ہے
نگہ یار سے پا لیتے ہیں دل کی باتیں
شہرت کشف و کرامات چلی جاتی ہے
حیرت حسن نے مجبور کیا ہے حسرتؔ
وصل جاناں کی یوں ہی رات چلی جاتی ہے

تشریح

روشِ حسنِ مراعات چلی جاتی ہے
ہم سے اور ان سے وہی بات چلی جاتی ہے

حسن والوں کا دستور ہے کہ وہ عشق کو نظر اٹھا کے دیکھنا گوارا نہیں کرتے۔اور عاشق ہے کہ ایک نگاہ کرم کا تقاضا لیے بیٹھا رہتا ہے۔اب شاعر کہتا ہے کہ حسن کی وہ کنکھیوں سے دیکھنے کی روش جاری ہے اور ہماری اور ان کی وہی بات جو حسن و عشق کا دستور ہے، چلی جارہی ہے۔

Advertisement
اس جفا جو،سے بہ ایماے تمنا اب تک
ہوس لطف و عنایات چلی جاتی ہے

عاشق کی تمنا ہوتی ہے کہ محبوب اس پر لطف و عنایت کرے، وہ کرتا نہیں ہے۔اب شاعر کہتا ہے کہ وہ ستم گر محبوب کبھی مہربانی نہیں کرتا۔مگر اب بھی اس سے لطف و عنایت کی خواہش کہ جو تمنا تھی،کی جاری رہی ہے۔

Advertisement
ہم سے ہرچند وہ ظاہر میں خفا ہیں، لیکن
کوششِ پرسشِ حالات چلی جاتی ہے

شاعر کہتا ہے کہ محبوب اگرچہ ظاہر طور پر ہم سےخفا ہے تاہم حالات کی خبر گیری کی کوشش بھی ہو رہی ہے۔

Advertisement
اس ستم گر کو ستم گر نہیں کہتے بنتا
سعی تاویل خیالات چلی جاتی ہے

شاعر کہتا ہے کہ محبوب ستم گر ہے لیکن اسے ستم گر کہنا بہت دشوار ہے۔یعنی اسے ستم گر کہے نہیں بنتا۔لہذا جو اسے ستم گر کہنے کا خیال پیدا ہوتا ہے۔اس کی تاویل کی کوشش لگاتار ہو رہی ہے۔اس خیال کو دوسری طرف پھیر دینے کی کوشش ہو رہی ہے۔

نگہ یار سے پا لیتے ہیں دل کی باتیں
شہرت کشف و کرامات چلی جاتی ہے

شاعر کہتا ہے کہ محبوب عجیب اعجاز رکھتا ہےکہ وہ ایک نظر سے عاشق کے دل کا حال جان لیتا ہے۔لہذا اس کے اعجاز و جادو کی شہرت خوب پھیل رہی ہے۔

Advertisement
حیرت حسن نے مجبور کیا ہے حسرتؔ
وصل جاناں کی یوں ہی رات چلی جاتی ہے

وصل کی رات تمنا پوری کرنے کی رات تھی مگر یونہی بے کار جا رہی ہے۔کیوں کہ حسن کی ہی خیرت نے ایسا مجبور کر دیا ہے کہ کچھ سوجھ ہی نہیں رہا ہے۔

Advertisement

Advertisement

Advertisement