Advertisement

غزل

سب سے چھپتے ہیں چھپیں مجھ سے تو پردا نہ کریں
سیر گلشن وہ کریں شوق سے، تنہا نہ کریں
اب تو آتا ہے یہی جی میں، کہ اے محو جفا
کچھ بھی ہو جائے مگر تیری تمنا نہ کریں
میں ہوں مجبور تو مجبور کی پرسش ہے ضرور
وہ مسیحا ہیں تو بیمار کو اچھا نہ کریں
درد دل اور نہ بڑھ جائے تسلی سے کہیں
آپ اس کام کا زنہار ارادہ نہ کریں
شکوۂ جور، تقاضائے کرم،عرض وفا
تم جو مل جاو کہیں ہم کو، تو کیا کیا نہ کریں
حال کھل جائے گا بے تابیِ دل کا حسرتؔ
بار بار آپ انہیں شوق سے دیکھا نہ کریں

تشریح

سب سے چھپتے ہیں چھپیں مجھ سے تو پردا نہ کریں
سیر گلشن وہ کریں شوق سے، تنہا نہ کریں

غزل کے مطلع میں شاعر کہتا ہے کہ محبوب سب سے پردہ کرتا ہے، سب سے چھپتا ہے اوریہ ٹھیک بھی ہے یعنی چھپنا بھی چاہیے۔ لیکن عاشق سے کیسا پردہ۔ ہم سے پردہ کرنا واجب نہیں ہے۔ لہٰذا اگر وہ گلشن کی سیر کا شوق رکھتے ہیں تو ضرور جائیں لیکن یوں تنہا جانا مناسب نہیں ہے۔ ہمیں ساتھ رکھیں۔

Advertisement
اب تو آتا ہے یہی جی میں، کہ اے محو جفا
کچھ بھی ہو جائے مگر تیری تمنا نہ کریں

شاعر محبوب سے مخاطب ہے کہتا ہے کہ ہر وقت ظلم کرنے میں مصروف رہنے والے محبوب تمھارے ان مظالم سے میں اس قدر تنگ آگیا ہوں کہ اب جی میں یہی آ رہا ہے کہ چاہے جو بھی ہو جائے مگر دل میں تمہاری محبت یا تمھیں پانے کی خواہش نہ آنے دوں۔

Advertisement
میں ہوں مجبور تو مجبور کی پرسش ہے ضرور
وہ مسیحا ہیں تو بیمار کو اچھا نہ کریں

شاعر کہتا ہے کہ میں مجبور ہوں کہ ناتوانی کے سبب سے کہیں آ جا نہیں سکتا ہوں تو کیا معشوق کے لیے مجبور کی خبر گیری،پرسش ضروری نہیں ہے؟اور اگر وہ مسیحا ہے،معجزے کرسکتا ہے یعنی مردوں کو زندہ کر سکتا ہے تو پھر اسے اس بیمار کو اچھا نہیں کرنا چاہیے؟

Advertisement
درد دل اور نہ بڑھ جائے تسلی سے کہیں
آپ اس کام کا زنہار ارادہ نہ کریں

شاعر اس شعر میں محبوب سے مخاطب ہے جو درد کے مارے غمزدہ عاشق کو تسلیاں دینے کی سوچ رہا ہے۔شاعر کہتا ہے کہ کہیں ایسا نہ ہو کہ آپ کی اس تسلی سے عاشق کے دل کو درد اور بڑھ جائے۔اگر ایسا ہوا تو مشکل ہو جائے گی۔لہذا آپ ہرگز اسے تسلی دینے کا ارادہ نہ کریں۔

شکوۂ جور، تقاضائے کرم،عرض وفا
تم جو مل جاو کہیں ہم کو، تو کیا کیا نہ کریں

شاعر کہتا ہے کہ خدا کرے تم کہیں ہمیں مل جاؤ کہ ہم نے خود تم سے نہ جانے کیا کیا باتیں کرنی ہیں۔تم نے جو ستم ہم پر روا رکھے ہیں ان کی تم سے شکایت کرنی ہے۔تم سے مہربانی کا تقاضا کرنا ہے اور یہ عرض کرنا ہے کہ ہم سے وفا کرو گویا کہیں ملاقات ہو تو یہ ساری باتیں ہوں۔

Advertisement
حال کھل جائے گا بے تابیِ دل کا حسرتؔ
بار بار آپ انہیں شوق سے دیکھا نہ کریں

غزل کے مقطع میں شاعر کہتا ہے کہ حسرتؔ تو جو محبت میں ہر وقت بے قرار رہتا ہے اور بار بار محبت بھری نگاہوں سے اسے دیکھتا رہتا ہے،کہیں ایسا نہ ہو کہ تمہارے دل کی بے تابی کا راز اس پر کھل جائے۔لہذا یوں محبت بھری نگاہوں سے بار بار اسے دیکھنا ٹھیک نہیں ہے۔ گویا مت دیکھا کیجیے۔

Advertisement

Advertisement

Advertisement