Back to: فانی بدایونی کی غزلیں
0
| وہ جی گیا جو عشق میں جی سے گزر گیا عیسیٰ کو ہو نوید کہ بیمار مر گیا آزاد کچھ ہوئے ہیں اسیران زندگی یعنی جمال یار کا صدقہ اتر گیا دنیا میں حال آمدو رفت بشر نہ پوچھ بے اختیار آ کے رہا بے خبر گیا شاید کہ شام ہجر کے مارے بھی جی اٹھیں صبحِ بہار حشر کا چہرہ اتر گیا آیا کہ دل گیا کوئی پوچھے تو کیا کہوں یہ جانتا ہوں دل ادھر آیا ادھر گیا میں نے دیا کہ تم نے لیا دل تمہیں کہو تم دل میں پہلے آئے کہ دل پیشتر گیا ہاں سچ تو ہے شکایت زخم جگر غلط دل سے گزر کے تیر تمہارا کدھر گیا دل کا علاج کیجئے اب یا نہ کیجئے اپنا جو کام تھا وہ غم یار کر گیا کیا کہیے اپنی گرم روی ہائے شوق کو کچھ دور میرے ساتھ میرا راہبر گیا فانیؔ کی ذات سے غم ہستی کی تھی نمود شیرازہ آج دفتر غم کا بکھر گیا |
