Back to: Urdu Naats Lyrics
- کعبہ کے بدر الدجیٰ تم پہ کروڑوں دُرود
- طیبہ کے شمس الضحیٰ تم پہ کروڑوں دُرود
- شافعِ روزِ جزا تم پہ کروڑوں دُرود
- دافعِ جملہ بلا تم پہ کروڑوں دُرود
- اور کوئی غیب کیا تم سے نہاں ہو بھلا
- جب نہ خدا ہی چھپا تم پہ کروڑوں دُرود
- دل کرو ٹھنڈا مرا وہ کفِ چاند سا
- سینہ پہ رکھ دو ذرا تم پہ کروڑوں دُرود
- سینہ کہ ہے داغ داغ کہہ دو کرے باغ باغ
- طیبہ سے آ کر صبا تم پہ کروڑوں دُرود
- تم سے کھلا بابِ جود تم سے ہے سب کا وجود
- تم سے ہے سب کی بقا تم پہ کروڑوں دُرود
- گرچہ ہیں بے حد قصور تم ہو عفوّ و غفور
- بخش دو جرم و خطا تم پہ کروڑوں دُرود
- تم سے جہاں کا نظام تم پہ کروروں سلام
- تم پہ کروروں ثنا تم پہ کروڑوں دُرود
- کر کے تمہارے گناہ مانگیں تمہاری پناہ
- تم کہو دامن میں آ تم پہ کروڑوں دُرود
- آنکھ عطا کیجیے اس میں ضیا دیجیے
- جلوہ قریب آ گیا تم پہ کروڑوں دُرود
- کام وہ لے لیجیے تم کو جو راضی کرے
- ٹھیک ہو نامِ رضاؔ تم پہ کروڑوں دُرود
