Advertisement

نظم ‘بوڑھے بلوچ کی نصیحت بیٹے کو’ کی تشریح

علامہ اقبال کی یہ تمثیلی نظم(بوڑھے بلوچ کی نصیحت بیٹے کو) ان کے چوتھے شعری مجموعے "ارمغان حجاز” میں شامل ہے جو علامہ اقبال کی وفات کے چند مہینے بعد 1938ء میں شائع ہوا۔اس کتاب میں علامہ اقبال کا اردو اور فارسی دونوں زبانوں کا کلام شامل ہے۔زیر بحث نظم "بوڑھے بلوچ کی نصیحت بیٹے کو” بھی اسی کتاب میں شامل ہے جس میں ایک بوڑھا بلوچ اپنے بیٹے کو چند نصیحتیں کرتا ہے۔بوڑھے بلوچ سے بلوچستان کا خانہ بدوش بلوچ بھی مراد ہو سکتا ہے اور مثالی مسلمان بھی کیونکہ خانہ بدوش صحرا نورد بلوچ کی طرح سچا مسلمان بھی اپنے آپ کو کسی خطۂ زمین سے مستقل طور پر وابستہ نہیں کر سکتا یعنی کسی ملک کو وطن نہیں بنا سکتا کیونکہ ساری دنیا اس کا وطن ہے۔بہر حال علامہ اقبال کی یہ نظم گیارہ اشعار پر مشتمل ہے جن کی تشریح پیشِ خدمت ہے۔

Advertisement

پہلا شعر

ہو تیرے بیاباں کی ہوا تجھ کو گوارا
اس دشت سے بہتر ہے نہ دلی نہ بخارا

اس شعر میں بوڑھا بلوچ اپنے بیٹے کو کہتا ہے کہ دہلی اور بُخارا بڑے پُر رونق شہر ہیں اور وہاں کی زندگی ہر قسم کی سہولتوں اور عشرت سے میسر ہے لیکن جو بات تیرے علاقہ بلوچستان میں ہے وہ ان شہروں میں کہاں ہے۔ یہ علاقہ اگرچہ بیاباں ہے، یہاں آبادی کم اور خشک علاقے اور پہاڑ زیادہ ہیں لیکن جو آزادی اور خوشگواری یہاں ہے وہ شہروں میں نہیں ہوسکتی۔ خدا کرے کہ تجھے اس علاقہ کی آب و ہوا محظوظ کرے۔

Advertisement

دوسرا شعر

جس سمت میں چاہے صفت سیل رواں چل
وادی یہ ہماری ہے وہ صحرا بھی ہمارا

بلوچستان کا علاقہ وسیع ہے، شہروں کی طرح محدود نہیں۔ یہاں پہاڑوں کے درمیان خوبصورت وادیاں بھی ہیں ریگستان بھی ہے۔ تو جس طرف کو چاہے بہتے ہوئے سیلاب کی طرح نکل جا ، تجھے کوئی روکنے والا نہیں۔
اس شعر کی ایک دوسری تشریح بھی ہو سکتی ہے:
اے نوجوان! تو اپنے اندر سیلاب کی صفت پیدا کر۔ جب تیرے اندر یہ شان پیدا ہوجائے گی تو تجھے معلوم ہوگا کہ کشمیر کی وادی بھی میری ہے اور ترکستان اور تاجکستان کا صحرا بھی میرا ہی ہے۔

Advertisement

تیسرا شعر

غیرت ہے بڑی چیز جہان تگ و دو میں
پہناتی ہے درویش کو تاج سر دارا

اس شعر میں شاعر فرماتا ہے کہ انسان کے لئے اصل سرمایہ دنیا کا سازوسامان اور آسائش و آرائش نہیں بلکہ اپنی عزتِ نفس کو برقرار رکھنا ہے۔ یہ وہ جذبہ ہے جو دنیا سے بے نیاز شخص کو دارا کا تاج پہناتی ہے۔ وہ بوریا نشین ہو کر بھی تخت نشین ہوتا ہے۔ اس لئے تو اس علاقے میں دلی اور بخارا جیسی رونق نہ ہونے کو نہ دیکھ بلکہ یہ دیکھ کہ جو عزتِ نفس تو یہاں ملحوظ خاطر رکھ سکتا ہے وہ ان شہروں میں نہیں ہے۔

چوتھا شعر

حاصل کسی کامل سے یہ پوشیدہ ہنر کر
کہتے ہیں کہ شیشے کو بنا سکتے ہیں خارا

بوڑھا بلوچ اپنے بیٹے سے مخاطب ہے کہ یہ چھپا ہوا فن یا باطنی علم کہ جس کی بدولت دارا کا تخت و تاج ایک درویش کے پاؤں کے نیچے ہوتا ہے اور بادشاہ اس کے در کے غلام بن جاتے ہیں، کسی مردِ کامل، کسی ولی کو ڈھونڈ کر اسے حاصل کر۔ کیونکہ میں نے سنا ہے کہ اس میں شیشے کو پتھر بنا دینے کی صلاحیت ہوتی ہے۔ مراد ہے کہ دینی سازوسامان اور شان وشوکت رکھنے والے کو ایسی بے نیازانہ شان عطا کرتا ہے کہ دنیاوی جاہ و جلال والے بھی اس کی چوکھٹ پر سر جھکاتے ہیں۔

Advertisement

پانچواں شعر

افراد کے ہاتھوں میں ہے اقوام کی تقدیر
ہر فرد ہے ملت کے مقدر کا ستارا

اس شعر میں بوڑھا بلوچ فرد اور جماعت کے تعلق کو بیان کرتا ہے اور کہتا ہے کہ اے نوجوان! اس حقیقت کو ذہن نشین کرلے کہ قوم کی تقدیر یعنی مستقبل میں اس کی ترقی تیری جدوجہد پر موقوف ہے۔ جیسے افراد ہونگے ویسی ہی قوم بھی ہوگی اس لئے تجھے اپنی زندگی قوم کی ترقی کیلئے وقف کر دینی چاہیے اور یہ سمجھنا چاہیے کہ اگر میں غفلت سے کام لوں گا تو میری قوم تباہ و برباد ہو جائے گی۔

چھٹا شعر

محروم رہا دولت دریا سے وہ غواص
کرتا نہیں جو صحبت ساحل سے کنارا

اس شعر میں شاعر فرماتا ہے کہ دریا میں سے موتی حاصل کرنے کے لیے غوطہ لگانے والا جو غوطہ خور ساحل پر ہی بیٹھا رہتا ہے اور دریا میں غوطہ نہیں لگاتا وہ موتیوں کی دولت سے بے نصیب رہتا ہے۔مراد یہ ہے کہ دنیا میں قوموں کی خوشحالی کا دارومدار ان کے افراد کی عملی میدان میں دوڑ دھوپ پر منحصر ہے۔ جس قوم کے افراد محنت کش، باعمل اور باغیرت ہوتے ہیں وہ قوم ترقی پر فائز ہو جاتی ہے اور اگر اس کے برعکس ہو تو ان کی بے عملی اور بے غیرتی قوم کو لے ڈوبتی ہے۔

Advertisement

ساتواں شعر

دیں ہاتھ سے دے کر اگر آزاد ہو ملت
ہے ایسی تجارت میں مسلماں کا خسارا

اے نوجوان! اس صداقت کو اپنے دل میں جگہ دے کہ اگر تو دین کو قربان کرکے آزادی حاصل کرے گا تو اس سودے میں تجھے سراسر نقصان ہوگا۔ بیشک آزادی حاصل کرنے کے لیے کوشش کر لیکن دین بیچ کر آزادی مت لے۔
اس شعر میں علامہ اقبال نے مسلمان نوجوانوں کو اس حقیقت سے آگاہ کیا تھا کہ نظریہ وطنیت قبول کرکے اگر تمہیں آزادی حاصل ہوئی تو وہ بیکار ہے کیونکہ جب تم مسلمان ہی نہ رہے تو آزاد ہو کر بھی کیا فائدہ ہوا؟

آٹھواں شعر

دنیا کو ہے پھر معرکہ روح و بدن پیش
تہذیب نے پھر اپنے درندوں کو ابھارا

اے نوجوان اس وقت دنیا میں اسلام (روح ( اور وطنیت (بدن) کے مابین زبردست جنگ برپا ہے۔ تہذیب مغرب جس کی بنیاد مادہ پرستی ہے، اسلام کو مٹانے پر تلی ہوئی ہے۔ علامہ اقبال نے اس شعر میں اقوام یورپ کو "درندوں” سے تعبیر کیا ہے کیونکہ اس تہذیب کا لازمی نتیجہ یہ ہے کہ انسان اپنی عادات کے اعتبار سے حیوان بن جاتا ہے۔ چنانچہ دوسری جنگ عظیم نے اس حقیقت کو واضح کر دیا۔

Advertisement

نواں شعر

اللہ کو پامردی مومن پہ بھروسا
ابلیس کو یورپ کی مشینوں کا سہارا

اے نوجوان اس وقت اسلام اور کفر میں شدید مقابلہ ہورہا ہے۔روح اور بدن کے اس معرکہ میں جس کا اوپر کے شعر میں ذکر ہوا ہے، دو فریق آمنے سامنے ہیں۔ ایک فریق اللہ ہے اور دوسرا شیطان۔ اللہ کو اہل ایمان پر بھروسا ہے کہ اگر انہوں نے دین کے میدان میں مضبوطی سے اپنے پاؤں جمائے رکھے تو فتح روح یعنی مومن کی ہوگی۔ اس کے مقابلے میں اگر یورپ کی صنعتی ترقی والی اقوام چھائی رہیں تو پھر شیطان کی فتح ہوگی اور روح مٹ جائے گی۔ اور ایسے میں انسان نما درندے پیدا ہوں گے اور انسان ختم ہو جائیں گے۔

دسواں شعر

تقدیر امم کیا ہے کوئی کہہ نہیں سکتا
مومن کی فراست ہو تو کافی ہے اشارا

قوموں کی تقدیر یا قسمت میں کیا ہے کوئی نہیں کہہ سکتا ، لیکن اتنی بات ضرور ہے کہ اگر کوئی مرد مومن ہو تو اس کی بصیرت میں یہ صفت پوشیدہ ہے کہ وہ اپنے ایک اشارے سے قوم کی تقدیر بدل سکتا ہے۔کوئی وقت تھا کہ مسلمان قوم میں ایسے بے شمار مرد کامل ہوتے تھے اب مسلمان اس مردِ مومن کو ترس گئے ہیں۔

Advertisement

گیارہواں شعر

اخلاص عمل مانگ نیا گان کہن سے
شاہاں چہ عجب گر بنوازند گدا را

پس ایک نوجوان! اے عہدِ حاضر کے مسلمان! تو اس نازک وقت میں اپنے بزرگوں کے طرزِ عمل کو سامنے رکھ اور ان کے نقشِ قدم پر چل مجھے یقین ہے کہ تو ضرور کامیاب ہوگا۔ ” شاہان چہ عجب گر بنوازند گدارا ” یہ حافظ شیرازی کی غزل کا مشہور مصرعہ ہے۔ شاہاں یہاں بزرگانِ دین کی طرف اشارہ ہے یعنی اگر مسلمان سلف صالحین کی اتباع کریں گے تو فضلِ الٰہی ضرور ان کے شاملِ حال ہوگا۔

Advertisement

Advertisement

Advertisement