دور دور مجھ سے وہ اس طرح خراماں ہے

Back to: Majrooh Sultanpuri Poetry | Biography

• دور دور مجھ سے وہ اس طرح خراماں ہے
• ہر قدم ہے نقش دل ہر نگہ رگ جاں ہے

• بن گئی ہے مستی میں دل کی بات ہنگامہ
• قطرہ تھی جو ساغر میں لب تک آ کے طوفاں ہے

• ہم تو پائے جاناں پر کر بھی آئے اک سجدہ
• سوچتی رہی دنیا کفر ہے کہ ایماں ہے

• میرے شکوۂ غم سے عالم ندامت میں
• اس لب تبسم پر شمع سی فروزاں ہے

• یہ نیازی غمخواری یہ شکست دل داری
• بزم نوازش جاناں دل بہت پریشاں ہے

• منتظر ہیں پھر میرے حادثے زمانے کے
• پھر میرا جنوں تیری بزم میں غزل خواں ہے

• فکر کیا انہیں جب تو ساتھ ہے اسیروں کے
• اے غم اسیری تو خود شکست زنداں ہے

• اپنی اپنی ہمت ہے اپنا اپنا دل مجروحؔ
• زندگی بھی ارزاں ہے موت بھی فراواں ہے