Advertisement

غزل

عشرتِ قطرہ ہے دریا میں فنا ہو جانا
درد کا حد سے گزرنا ہے دوا ہو جانا
اب جفا سے بھی ہیں محروم ہم اﷲ اﷲ
اس قدر دشمن ارباب وفا ہو جانا
دل سے مٹنا تیری انکشت حنائی کا خیال
ہو گیا گوشت سے ناخن کا جدا ہو جانا
ہے مجھے، ابر بہاری کا برس کر کھلنا
روتے روتے غم فرقت میں فنا ہو جانا
گرنہیں نکہت گل کو ترے کوچے کی ہوس
کیوں ہے؟ گردِ رہ جولان صبا ہو جانا
تاکہ تجھ پر کھلے اعجاز ہوائے صیقل
دیکھ برسات میں سبز آئنیہ کا ہو جانا
بخشے ہے جلوہ گل ذوق تماشا غالب!
چشم کو چاہئیے ہر رنگ میں وا ہو جانا

تشریح

پہلا شعر

عشرتِ قطرہ ہے دریا میں فنا ہو جانا
درد کا حد سے گزرنا ہے دوا ہو جانا

قطرہ بظاہر فنا ہوجاتا ہے تو حقیقتاً اس کی موت نہیں ہوتی بلکہ وہ اصل سے جا ملتا ہے۔یعنی وہ خود دریا ہو جاتا ہے۔ لہٰذا یہ اس کے لئے باعث مسرت ہوتا ہے۔اسی طرح غالب کہتے ہیں کہ جب درد سے حد گزر جاتا ہے تو انسان مر جاتا ہے۔ مر کر اس کے سب درد و الم ختم ہو جاتے ہیں اور وہ اپنے معبودِ حقیقی سے جا ملتا ہے اس طرح درد کا حد سے گزرنا ہی اس کے لئے دوا ہو جاتا ہے۔ مطلب یہ ہے کہ فنا ہی ہستی مقصود ہے۔

دوسرا شعر

اب جفا سے بھی ہیں محروم ہم اﷲ اﷲ
اس قدر دشمن ارباب وفا ہو جانا

شاعر محبوب سے مخاطب ہو کر کہتا ہے کہ’’اﷲ اﷲ‘‘ کلمہ تعجب ہے۔آپ کو اپنے عشاق سے کس قدر نفرت ہے کہ اب آپ ان پر جفا کرنا بھی گوارا نہیں کرتے۔ایک وہ زمانہ تھا کہ ہم پر آپ کرم فرماتے تھے اور اب یہ عالم ہے کہ ہم آپ کی جفاؤں سے بھی محروم ہیں۔

Advertisement

تیسرا شعر

دل سے مٹنا تیری انکشت حنائی کا خیال
ہو گیا گوشت سے ناخن کا جدا ہو جانا

شاعر کہتا ہے کہ ہمارے دل سے تمہاری انکشت حنائی کا خیال مٹنا بہت مشکل ہے بلکہ ناممکن ہے۔یہ اتنا ہی مشکل اور نا ممکن ہے کہ جس طرح ناخن کا گوشت سے جدا ہونا مشکل و ناممکن ہے۔مثل مشہور ہے کہ گوشت سے ناخن کبھی جدا نہیں ہوتا۔

Advertisement

چوتھا شعر

ہے مجھے، ابر بہاری کا برس کر کھلنا
روتے روتے غم فرقت میں فنا ہو جانا

شاعر کہتا ہے کہ غم فرقت میں روتے روتے ختم ہو جانا میرے لئے ایک معمولی بات ہے ایسی معمولی بات کہ جیسے ابر بہاری کا برس کر کھلنا۔گویا روتے روتے فنا ہونا باعثِ انبساط ہے۔

Advertisement

پانچواں شعر

گرنہیں نکہت گل کو ترے کوچے کی ہوس
کیوں ہے؟ گردِ رہ جولان صبا ہو جانا

شاعر کہتا ہے کہ اگر نگہت گل کو تیرے کوچے میں جانے کی آرزو نہیں ہے تو پھر وہ کیوں صبا کے رستے کی گرد بنانا پسند کرتی ہے۔یعنی کیا وجہ ہے کہ وہ بادِ صبا میں شامل ہو جاتی ہے۔پھولوں کی خوشبو کے ہوا میں شامل ہونے سے عیاں ہے کہ اسے ہوا کے ساتھ تیرے کوچے میں جانے کی خواہش ہے۔

چھٹا شعر

تاکہ تجھ پر کھلے اعجاز ہوائے صیقل
دیکھ برسات میں سبز آئنیہ کا ہو جانا

برسات میں چوں کہ ہوا میں نمی سی ہوتی ہے لہٰذا فولادی آئینہ زنگ آلودہ ہو جاتا ہے،جیسے آئینے کا سبز ہونا کہتے ہیں۔ غالب نے اس شعر میں ہوا بہ معنی خواہش اور ہوا دانوں استعمال کیا ہے۔ وہ کہتا ہے کہ برسات میں فولادی آئینے پر زنگ اس لیا آجاتا ہے کیونکہ اس کو ہوائے صیقل ہے کا زنگ لگے گا تو اس کی صفائی ہو گی اس میں جلا پیدا ہوگی۔ لہٰذا خواہش اور شوق وہ چیز ہے کے فولاد کے اندر بھی موجود ہے اور وہ فولاد پر بھی اثر کرتی ہے۔

Advertisement

ساتواں شعر

بخشے ہے جلوہ گل ذوق تماشا غالب!
چشم کو چاہئیے ہر رنگ میں وا ہو جانا

شاعر کہتا ہے جلوہ گل سے دید کا مزاق سلیم پیدا ہوتا ہے۔اس لیے انسان کی آنکھوں کو ہر کیفیت سے لطف اندوز ہونا چاہیے تاکہ شوق مطالعہ کی تربیت ہو سکے۔مطلب یہ کہ انسان کو چاہیے کہ باغ عالم میں ہر رنگ کا لطف اٹھائیں تاکہ خدا کے ہنر کو پہچان سکے۔

Advertisement

Advertisement