وہ آنکھ زبان ہوگئی ہے

Back to: Firaq Gorakhpuri Poetry | Biography

• وہ آنکھ زبان ہوگئی ہے
• ہر بزم کی جان ہوگئی ہے

• آنکھیں پڑتی ہیں مے کدوں کی
• وہ آنکھ جوان ہوگئی ہے

• آئینہ دکھا دیا یہ کس نے
• دنیا حیران ہو گئی ہے

• اب تو تری ہر نگاہ کافر
• ایمان کی جان ہو گئی ہے

• ترغیب گناہ لحظہ لحظہ
• اب رات جوان ہو گئی ہے

• توفیق نظر سے مشکل زیست
• کتنی آسان ہوگئی ہے

• تصویر بشر ہے نقش آفاق
• فطرت انسان ہو گئی ہے

• پہلے وہ نگاہ اک کرن تھی
• اب اک جہان ہوگئی ہے

• سنتے ہیں کہ اب نواے شاعر
• صحرا کی اذان ہوگئی ہے

• اے موت بشر کی زندگی آج
• تیرا احسان ہوگئی ہے

• کچھ اب تو امان ہوکہ دنیا
• کتنی ہلکان ہو گئی ہے

• یہ کس کی پڑھی غلط نگاہیں
• ہستی بہتان ہوگئی ہے

• انسان کو خریدتا ہے انسان
• دنیا بھی دکان ہوگئی ہے

• اکثر شب ہجر دوست کی یاد
• تنہائی کی جان ہوگئی ہے

• شرکت تری بزمِ قصہ گو میں
• افسانے کی جان ہوگئی ہے

• جو آج مری زبان تھی کل
• دنیا کی زبان ہوگئی ہے

• اک سانحہِ جہاں ہے وہ آنکھ
• جس دن سے جوان ہوگئی ہے

• رعنائی قامت دل آرا
• میرا ارمان ہوگئی ہے

• دل میں اک واردات پنہان
• بے سان گمان ہوگئی ہے

• سنتا ہوں قضائے قہرما بھی
• اب تو رحمان ہوگئی ہے

• واعظ مجھے کیا خدا سے
• میرا ایمان ہو گئی ہے

• میری تو یہ کائنات غم بھی
• جان و ایمان ہوگئی ہے

• میری ہر بات آدمی کی
• عظمت کا نشان ہوگئی ہے

• یاد ایام عاشقی جب
• ابدیت اک آن ہوگئی ہے

• جو شوخ نظر تھی دشمن جاں
• وہ جان کی جان ہوگئی ہے

• ہر بیت فراقؔ اس غزل کی
• ابرو کی کمان ہو گئی ہے