بندگی سے کبھی نہیں ملتی

Back to: Firaq Gorakhpuri Poetry | Biography

• بندگی سے کبھی نہیں ملتی
• اس طرح زندگی نہیں ملتی

• لینے سے تاج و تخت ملتا ہے
• مانگے سے بھیک بھی نہیں ملتی

• غیب داں ہیں مگر خدا کو بھی
• نیت آدمی نہیں ملتی

• ہے جو اک چیز دار فانی میں
• وہ تو جنت میں بھی نہیں ملتی

• ایک دنیا ہے میری نظروں میں
• پر وہ دنیا ابھی نہیں ملتی

• رات ملتی ہے تیری زلفوں سے
• پر وہ آراستگی نہیں ملتی

• یوں تو ہر اک کا حسن کافر ہے
• پر تری کافری نہیں ملتی

• باصفا دوستی کو کیا روئیں
• باصفا دشمنی نہیں ملتی

• آنکھ آنکھ ہی ہوں مگر مجھ سے
• نرگس سامری نہیں ملتی

• جب تک اونچی نہ ہو ضمیر کی لو
• آنکھ کو روشنی نہیں ملتی

• سوز غم سے نہ ہو جو مالامال
• دل کو سچی خوشی نہیں ملتی

• رونے دھونے سے حال عاشق کو
• زلف کی ابتری نہیں ملتی

• روئے جاناں کجا، کجا گل خلد
• وہ تر و تازگی نہیں ملتی

• تجھ میں کوئی کمی نہیں پاتے
• تجھ میں کوئی کمی نہیں ملتی

• ہیں سوا میرے اور نرم نوا
• پر وہ آہستگی نہیں ملتی

• یوں تو پڑتی ہے ایک عالم پر
• نگہہ سر سری نہیں ملتی

• صحن عالم کی سرزمینوں میں
• دل کی افتادگی نہیں ملتی

• دل کو بے انتہائی آگاہی
• عشق کی بے خودی نہیں ملتی

• میری آواز میں جو مضمر ہے
• ایسی شادی غمی نہیں ملتی

• ہے جو ان رسمساتے ہونٹوں میں
• آنکھ کو وہ نمی نہیں ملتی

• میرے اشعار میں سرے سے ندیم
• رجعت قہقری نہیں ملتی

• بس وہ بھرپور زندگی ہے فراقؔ
• جس میں آسودگی نہیں ملتی