لپٹ سی داغ کہن کی طرف سے آتی ہے

Back to: Irfan Siddiqui Shayari | Biography

• لپٹ سی داغ کہن کی طرف سے آتی ہے
• جب اک ہوا ترے تن کی طرف سے آتی ہے

• میں تیری منزل جاں تک پہنچ تو سکتا ہوں
• مگر یہ راہ بدن کی طرف سے آتی ہے

• یہ مشک ہے کہ محبت مجھے نہیں معلوم
• مہک سی میرے ہرن کی طرف سے آتی ہے

• پہاڑ چپ ہیں تو اب ریگ زار بولتے ہیں
• نداے کوہ ختن کی طرف سے آتی ہے

• کسی کے وعدۂ فردا کے برگ و بار کی خیر
• یہ آگ ہجر کے بن کی طرف سے آتی ہے

• جگوں کے کھوئے ہوؤں کو پکارتا ہے یہ کون
• صدا تو خاک وطن کی طرف سے آتی ہے