سخن میں رنگ تمہارے خیال ہی کے تو ہیں

Back to: Irfan Siddiqui Shayari | Biography

• سخن میں رنگ تمہارے خیال ہی کے تو ہیں
• یہ سب کرشمے ہوائے وصال ہی کے تو ہیں

• کہا تھا تم نے کہ لاتا ہے کون عشق کی تاب
• سو ہم جواب تمہارے سوال ہی کے تو ہیں

• ذرا سی بات ہے دل میں اگر بیاں ہو جائے
• تمام مسئلے اظہار حال ہی کے تو ہیں

• یہاں بھی اس کے سوا اور کیا نصیب ہمیں
• ختن میں رہ کے بھی چشم غزال ہی کے تو ہیں

• جسارت سخن شاعراں سے ڈرنا کیا
• غریب مشغلئہ قیل و قال ہی کے تو ہیں

• ہوا کی زد پہ ہمارا سفر ہے کتنی دیر
• چراغ ہم کسی شام زوال ہی کے تو ہیں