Advertisement
  • کتاب “ابتدائی اردو” برائے دوسری جماعت
  • سبق نمبر13: نظم
  • شاعر کا نام: افسر میرٹھی
  • نظم کا نام: چاند

نظم چاند کی تشریح

تم ندی پر جا کر دیکھو
جب ندی میں نہائے چاند
کیسی لگائی ڈبکی اس نے
ڈر ہے ڈوب نہ جائے چاند

یہ اشعار افسر میرٹھی کی نظم ” چاند ” سے لیے گئے ہیں۔ اس بند میں شاعر رات میں آسمان پر ابھرنے والے چاند کی خوبصورتی اور دلکش نظاروں کی بات کرتے ہوئے کہتا ہے کہ اگر تم کبھی کسی ندی کنارے جا کر دیکھو تو ندی میں اس چاند کا عکس یوں دکھائی دے گا کہ گویا چاند ندی میں نہا رہا ہو۔ ندی کے پانی میں تھرتھراہٹ سے یوں محسوس ہوتا ہے کہ جیسے نہاتے نہاتے چاند نے اس پانی میں ڈبکی لگا لی ہو۔ شاعر کہتا ہے کہ چاند کی ڈبکی سے لگتا ہے کہ یہ کہیں پانی میں ڈوب نہ جائے۔

Advertisement
کرنوں کی اک سیڑھی لے کر
چھم چھم اترا جائے چاند
جب تم اسے پکڑنے جاؤ
پانی میں چھپ جائے چاند

اس بند میں شاعر کہتا ہے کہ یہ چاند ندی میں کیسے اترا تو یہ اپنی کرنوں کے ذریعے سے اس ندی میں گیا اور کرنوں کو سیڑھی بنا کر چھم چھم کرتا ہوا ندی میں اترتا ہے۔ اگر تم ندی کے پانی میں اسے پکڑنے کی کوشش کرو گے تو ہر گز نہیں پکڑ پاؤ گے کیونکہ پکڑنے کی کوشش پہ یہ چاند اپنے آپ کو اس ندی کے پانی میں چھپا لیتا ہے۔

Advertisement
اب پانی میں چپ بیٹھا ہے
کیا کیا روپ دکھائے چاند
چاہے جدھر کو جاؤ افسرؔ
ساتھ ہمارے جائے چاند

اس بند میں شاعر کہتا ہے کہ اب چاند پانی میں اتر کر ہمیں اپنے کئی طرح کے روپ دکھاتا ہے۔ کبھی تو یہ مستیاں کرتا دکھائی دیتا ہے تو کبھی پانی میں چپ کرکے بیٹھ جاتا ہے۔ یوں چاند کے کئی روپ دیکھنے کو ملتے ہیں۔ آخری شعر میں شاعر اپنا تخلص استعمال کرتے ہوئے کہتا ہے کہ افسر ہم کہیں بھی جائیں یہ چاند ہمیشہ ہمیں اپنے ساتھ ہی چلتا ہوا محسوس ہوتا ہے۔

ان سوالوں کے جواب دیجیے۔

چاند کہاں جا کر دیکھنے کو کہا گیا ہے؟

چاند ندی پر جا کر دیکھنے کو کہا گیا ہے۔

Advertisement

چاند نے کہاں ڈبکی لگائی؟

چاند نے ندی میں ڈبکی لگائی۔

چاند کے ڈبکی لگانے سے کیا ڈر پیدا ہوتا ہے؟

چاند کے ڈبکی لگانے سے یہ ڈر پیدا ہوتا ہے کہ یہ کہیں ڈوب نہ جائے۔

Advertisement

چاند ندی میں کس سیڑھی سے نیچے اُترا؟

چاند ندی میں کرنوں کی سیڑھی لے کر نیچے اُترا۔

چاند پانی میں کب چھپ جاتا ہے؟

جب کوئی چاند کو پکڑنے جاتا ہے تو چاند پانی میں چھپ جاتا ہے۔

Advertisement

چاند ہمارے ساتھ کہاں کہاں جاتا ہے؟

جہاں جہاں ہم جاتے ہیں چاند ہمارے ساتھ جاتا ہے۔

خالی جگہوں میں مناسب لفظ لکھیے۔

نے ، پر ، ہے ، میں ، کو۔

Advertisement
  • تم ندی پر جا کر دیکھو
  • کیسی لگائی ڈبکی اس نے
  • پانی میں چھپ جائے چاند
  • جب تم اس کو پکڑنے جاؤ
  • اب پانی میں چپ بیٹھا ہے

حروف کو ملا کر لفظ بنائیے۔

ڈ + و + ب =ڈوب
چ + ا + ن + د =چاند
پ + ا + ن + ی =پانی
ک + ر + ن + و + ں =کرنوں
پ + ک + ڑ + ن + ے =پکڑنے

لفظوں کو دیکھ کر خالی خانوں میں صحیح حرف لکھیے۔

ساتھ= س + ا + تھ
جدھر= ج + د + ھ + ر
دیکھو= د + ے + کھ + و
سیڑھی= س + ی + ڑھ + ی
بیٹھا= ب + ے + ٹھ + ا

چاند کی مختلف شکلیں تصویر بنا کر دکھائیے۔

نیا چاند = 🌒
آداھ چاند = 🌓
پورا چاند = 🌕

نظم کے مطابق حصہ الف اور ب کے صحیح جوڑ ملائیے۔

تم ندی پر جا کر دیکھو
جب ندی میں نہائے چاند
کرنوں کی اک سیڑھی لے کر
چھم چھم اترا جائے چاند
اب پانی میں چپ بیٹھا ہے
کیا کیا روپ دکھائے چاند
چاہے جدھر کو جاؤ افسرؔ
ساتھ ہمارے جائے چاند

سوچیے اور بتایئے۔

اسمان پر آپ اور کیا کیا دیکھتے ہیں؟

آسمان پر ہم چاند کے علاوہ ستارے ، بادل ، سورج اور اُڑتے ہوئے پرندے دیکھتے ہیں۔

کیا اپ نے کوئی ندی دیکھی ہے؟ نام بتائیے۔

جی ہاں میں نے ندی گنگا دیکھی ہے۔

Advertisement

خوش خط لکھیے۔

نہائے ، ڈبکی ، چھم چھم ، چھپ ، افسر۔

Advertisement