خطہ پیر پنچال بیچ پہاڑی غزل نا ارتقاء

Back to: پہاڑی زبان و ادب کے نوٹس

پونچھ راجوری کی ادیباں، شاعراں، قلمکاراں تہ درویشاں نی تہرتی ہونے نا شرف حاصل ہے۔ خطہ پیر پنچال دانشوراں، سیاست داناں تہ مفکراں نا وطن ہے۔ اس خوبصورت مٹی نال متے سارے پیراں، فقیراں ، سادھواں تہ سنتاں نے جنم تہ جان نا تعلق ہے۔ ادب نے میدان بچ ایہہ علاقہ منفرد مقام رکھنا ہے۔ سچ گل ایہہ ہے جے ایہہ خطہ ادیباں تہ شاعراں نا اک گلستان ہے۔ جس بچ رنگ برنگے پُھل نظر اچھنے ہین۔ اَج وی متے سارے ادیب تہ شاعر ادب نی چہولی قیمتی ہیریاں تہ موتیاں نال مالا مال کر رہے ہین۔ جنہاں بچ محمود الحسن محمود، ڈاکٹر صابر مرزا، رشید قمر، شاهباز راجوروی ، فدا راجوروی، خوشدیو مینی، شیخ آزاد احمد آزاد، نثار راہی، شیخ ظہور ، سید امتیاز نسیم هاشمی، خورشید کرمانی ، گرشرن سنگھ گلشن، انور خان، ڈاکٹر مرزا فاروق انوار، اقبال نازش، اقبال شال، خورشید بسمل ، سید شبیر جعفری، پرویز ملک، عارف اقبال ملک، ملک شفیق عارش، ایڈوکیٹ بشارت حسین خان، حاجی محمد بشیر شاد، ماسٹر محمد حسین بھٹی، عارف جرال عارف ، جنید جاذب ، ڈاکٹر امیر حسین جعفری ، مستور احمد شاد عارفی، قاری محمد اشرف، حاظ محمدحسین فاقر ، ڈاکر علمدارحسین عدم، کرشن لال عاصی، محمد بشیر لوہار، صدیق احمد صدیقی ، ماسٹر محمد بشیر خاکی، سلیم جاوید قریشی ، جنت حسین سلیم، محمود طاہر، ملک ذاکر خاکی، ذولفقار نقوی، ملک ذاکر فیاضی، سردار جاوید احمد خان جاوید وغیرہ تک اک کہکشاں ہے جیہڑی چھپن بچ نیہہ اچھنی۔

پہاڑی زبان نی عمر بۂوں لمّی ہے تہ پہاڑی غزل نی عمر بالکل نکّی ہے۔ لیکن پہاڑی غزل نے تھوڑے عرصے بچ بہت بڑی ترقی کیتی ہے۔ اس کامیابی نا سہرا اساہڑے ادیباں تہ شاعراں نے سر جانا ہے۔ غزل نے میدان بچ متے سارے ناں ماہڑے باندے ہین جنہاں نیاں غزلاں فن تہ موضوع نے لحاظ نال اُچّا مقام رکھنیاں ہین۔ جنہاں بچ ڈاکٹر صابر مرزا ہور پہلی صف بچ نظر اچھنے ہین۔ انہاں نیاں غزلاں بۂوں متاثر کرنیاں ہین تہ فنی خوبیاں نال وی مالا مال ہین۔ صابر صاحب جاننے ہین جے قصیدے نے لفظ بکھ ہونے ہیں، مرثیے نے بکھ تہ غزل نے موضوع نے نال لفظ وی بکھ ہونے ہین۔ انہاں نیاں غزلاں بچ سوز و گداز تھیں علاوہ صفت تضاد، صفت مبالغہ ،ابہام، مراعات النظیر تہ حسن تعلیل وغیرہ نیاں بہترین مثالاں موجود ہین۔ غزل اوّاں وی اساہڑی ہر دلعزیز صنف سخن ہے۔ بۂوں سارے شاعراں اس میدان بچ طبع آزمائی کیتی ہے۔ پہاڑی ادب نا بۂوں متا سرمایہ غزل نی صورت بچ اساں کول موجود ہے۔ غزل بچ اپنے محبوب نیاں گلاں تہ محبوب سنگ گلاں کیتیاں جانیاں ہین۔ اس طراں عشق تہ عاشقی نے قصے غزل نے خمیر بچ داخل ہین۔ لیکن اَجکل اساہڑی غزل عشق تہ عاشقی تک محدود نیہہ رہۂی ہے۔ اس بچ سماجی سیاسی مسئلے، فلسفے، تصوف تہ زندگی نے بکھرے بکھرے پہلواں نی ترجمانی موجود ہے۔ غزل نا ہر اک شعر مکمل اکائی ہونا ہے۔ اگر اُردو غزل کی تہ پہاڑی غزل کی باندے رکھیا جائے، صرف زبان نے فرق تھیں علاوہ ہور کوئی فرق نیہہ۔ اوئی گلاں، اوئی مضمون تہ اوئی بحراں ہین۔

پہاڑی غزل نے چھتّے سنوارن آلیاں شاعراں بچ ڈاکٹر صابر مرزا ہور سر فہرست ہین۔ انہاں نا انداز نواں تہ لہجہ وی نواں ہے۔ انہاں نیاں غزلاں بچ ہر موضوع نے شعر لبھ جانے ہین۔ زبان بۂوں خوبصورت تہ صاف ستھری ہے۔

صابر مرزا ہوراں نے اکثر شعر احساس تہ جذبات نی ترجمانی کرنے ہین۔ انہاں بچ معنویت وی ہے، اثر وی، جیہڑے انسان کی بۂوں متاثر کرنے ہیں۔ مثال نے طور ور ایہہ شعر تکّو:

فِر مُڑ آئیاں کالیاں راتاں دُکھاں درداں والیاں راتاں ہنیر ، غبار دلوں نیہہ نٹھے میں اَکھاں بچ بالیاں راتاں

اپنے محبوب نی جدائی بچ عاشق واسطے رات بۂوں لمّی ہونی ہے۔ صابر صاحب فرمانے ہین کہ ایہہ کالی نالے لمّی رات میں اَکھیاں بچ گزارنا ہاں۔ میں اَکھاں بچ بالیاں راتاں کہہ کمال نی گل ہے۔ اگے فرمانے ہین:

کہہ پتہ سا تپ بن جاسن مان گماناں آلیاں راتاں

اک ویلا اوہ سا جدوں راتاں بۂوں خوبصورت ہونیاں سن۔ راتاں کی اپنا چن نظر اچھنا سا۔ اُس ویلے ایہہ خبر نیہہ سی کہ اک زمانہ آسی گا ایہہ خوبصورت راتاں کالے ناگ بنی جاسن۔ میں اپنے محبوب تھیں جدا ہوئی جاساں۔ اک ہور جگہ کہہ خوب فرمانے ہین:

یاد تو اہری آنی رہسی روز کلیجہ کھانی رہسی روسان تہ کُر لاساں ڈاہڈا حجر اکھیاں پانی رہسی صابر دہسیاں آس نا کد تک ریت نے اُپر پانی رہسی

اساہڑے شاعر کی اپنے بچھڑن آلے نی یاد کس قدر آنی ہے، لیکن اُس نا ملنا ریت نے اُپر پانی ہاروں ہے۔ ریت نے اُپر جسطراں پانی نیہہ رہۂی سکنا، ریت اُپر پانی نا ربنا جس طراں ممکن نیہہ اسے طراں جان آلے نا واپس اچھنا ممکن نیہہ ہے۔

اسے طراں پہاڑی غزل نی نشونما بچ شیخ آزاد احمد آزاد ہوراں نا بڑا اہم رول ہے۔ انہاں نی ادبی خدمات کی فراموش نہ کیتا جائی سکنا۔ آزاد ہوراں نا تعلق وی پہاڑی نے تشکیلی دور نال ہے۔ انہاں نیاں غزلاں انسان کی بۂوں متاثر کرنیاں ہین۔ اِیاں تہ آزاد صاحب ہر زبان نی خدمت جی جان نال کر رہے ہین ، لیکن پہاڑی غزل نے میدان بچ اوہ بڑا اچّا مقام رکھنے ہین۔ اک جگہ فرمانے ہین:

پہلاں دل دربار بناساں دلوں منّوں فِر اُس کی میں یار مناساں دلوں منّوں اوہ کد آسن ماہڑیا اللہ مڑی چھڑی بلیاں روں میں کاگ اُڈا ساں دلوں منّوں کنک پُھلے پُھل تہ دیسن میوہ کہہ رَج رَج فر وی تۂو کھے کھاساں دلوں منّوں

آزاد صاحب پہلاں اپنے دل نا دربار بنانے ہین۔ صاف ستھرا کری خوب سجانے ہین۔ جس ویلے دل خوب صاف ستھرا ہوئی گیا، فر اپنا محبوب اس بچ آئی سکنا ہے۔ اس شعر بچ اساہڑے شاعر نا محبوب حقیقی لگنا ہے۔ دوّے شعر بچ فرمانے ہین جے ماہڑا محبوب جائی کدے وی آن آلانیہ ہے۔ فر وی میں اُس نا انتظار کرساں، رستے تکساں، کاگ اُدا ساں۔ ایہہ انتظار ایہہ کسک ایہہ تڑپ بڑی دولت ہے۔ اسے نال سینہ آباد رہنا ہے۔انسان نی جستجو ختم ہوگئی، فر زندہ رہن بچ کہہ مزہ ہے۔ کتک بچ بوٹے پھلتے ہین تہ پھل آنے ہین۔ لیکن خزاں نے موسم بچ وی میں پھلاں تہ میویاں نی آس رکھنا ہاں۔ حقیقی مطلب ایہہ ہے کہ شاعر کی اپنے محبوب نے واپس آن نی کوئی امید نیہہ ہے۔ واپس آنا ممکن نیہہ ہے، فر وی سچے دل نا انتظار کیتا جا رہیا ہے، جیہڑا آخری ساہواں تک تہ آخری تۂڑ کناں تک ختم نیہہ ہوئی سکنی۔ اک ہور جگہ فرمانے ہین:

مِگی بیٹھے بٹھائے ایہہ کہہ ہو گیا درد ہو گئے سوائے ایہہ کہہ ہو گیا ساڑ دِتا امیداں نا ایہہ آہلنا دہس ہاں پاگل ہوائے ایہہ کہہ ہو گیا

پہاڑی غزل نے سب تھیں پہلے قافلے بچ ریاست جموں و کشمیر نے بزرگ شاعر تہ ہر دلعزیز شخصیت نے مالک جناب شاہباز راجوروی ہور بڑا اعلیٰ مقام رکھنے ہین۔ شاہباز راجوروی پہاڑی ادب تہ غزل نی رونق ہین۔ انہاں کی زبان تہ بیان ور قدرت حاصل ہے۔ اُنہاں نے بہوں شان و شوکت نال غزل آکھ کے اس محبوب صنف سخن کی اک وقار بخشیا ہے۔ انہاں نے اپنی فکر تہ فن نال بہوں متاثر کیتا ہے۔ شاہباز راجوروی ہوراں نی زبان بچ اک حسن ہے۔ صفائی تہ سادگی ہے۔ خطہ پیر پنچال جس حالات تھیں گزریا ہر ویلے ہر جگہ اک ڈر نا ماحول خوف تہ فکر اساہڑے اندر نا ماحول باہر تھیں بکھ نیہہ سا۔ پریشانیاں ہی پریشانیاں سن۔ شہراں تہ محفلاں بچ وی اک ڈر نا موحول سا۔ ایسے حالات بچ اساہڑا پہاڑی شاعر خاموش نیہہ رہئی سکیا۔۔

اس موسم نی سوغات بڑی ہے اتھرواں نی برسات بڑی ہے شہراں بچ وی ڈر لگنا ہے جنگلاں نی اوقات بڑی ہے

شاہباز راجوروی ہور اک ہور جگہ اساں کی اک تہ نیک ہون نا سبق پڑھانے ہین تہ فرمانے ہین جے انساں کی اک دوّے نے درد بنڈ نے چاہی نے ہین۔ اک دوّے کی سہارا دینا چاہی نا ہے۔ ایہہ ہی اک چنگے انسان نی پہچان ہے۔ انسان کی پیدا ہی درد دل واسطے کیتا ہے۔ عبادت واسطے فرشتے ہی کافی سن۔ بہر حال شاہباز راجوروی ہور فرمانے ہین:

درد نے کجھ پیمانے بنڈاں آؤ اَس زمانے بنڈاں کیہڑی رات کی چانن چان سفنے تہ افسانے بنڈاں

غزل کی آبرو بخشنیاں ہویاں اِسے ٹولے نے اک ہور نامور شاعر جناب فدا راجوروی ہوراں وی پہاڑی غزل کی عزت بخشی ہے۔ انہاں نے پہاڑی غزل کی اپنے عہد نیاں تقاضیاں نی ترجمان تہ عکاس بنایا ہے۔ فدا راجوروی ہوراں ہجر فراق تہ حسن و عشق تھیں علاوہ متے سارے موضوعات ور غزلاں لکھیاں ہین تہ غزل نا دائرہ بڑا کیتا ہے۔ انہاں نیاں زیادہ تر غزلاں بچ اک فکر ہونی ہے اک پیغام ہوتا ہے تہ بڑی نصیحتاں ہونیاں ہیں۔ اک جگہ فرمانے ہین:

کیتیاں نا حساب کہہ لکھسو موسماں نا جواب کہہ لکھسو ساۂ سکن آج وی پُھلاں نے کنڈیاں بچ گلاب کہہ لکھسو

پہاڑی شاعری بچ مستور احمد شاد عارفی ہوراں نا ناں کسے وی تعارف نا محتاج نیہہ۔ اوہ بڑے عرصے تھیں پہاڑی زبان بچ شاندار تہ جاندار غزلاں آکھ کے پہاڑی ادب نی چۂولی قیمتی ہیریاں تہ موتیاں نال مالا مال کر رہے ہین۔ اوہ اس طراں وی محفلاں نی رونق سمجھے جانے ہین۔ مستور شاد ہوراں نی زبان بڑی صاف ستھری ہے تہ لہجہ وی بڑا دلچسپ ہے۔ ایہہ بڑی شان و شوکت نال غزلاں سُنانے ہین۔ اس گل بچ کوئی شک نیہہ کہ انہاں نیاں غزلاں حُسن تہ عشق نا اک نگار خانہ ہین۔ انہاں نیاں زیادہ تر غزلاں بڑی آس امید آلیاں ہین۔ اک جگہ اس طراں فرمانے ہین:

خاباں نے سب منظر لکھساں اس نا اک سمندر لکھساں جے توں شادؔ دلے بچ بسیں میں دل مسجد مندر لکھساں

اساہڑے پہاڑی ادب نے اک ہور بڑے خوبصورت شاعر قاری محمد اشرف ہوراں نے ذکر خیر تھیں بغیر پہاڑی غزل نی تاریخ مکمل نیہہ ہوسکنی۔ انہاں نا بکھرا رنگ روپ ہے، بکھرا لہجہ ہے بکھری آواز ہے جیہڑی پُر درد وی ہے تہ پُر سوز وی۔ انہاں نے کلام کی تک کے محسوس ہونا ہے جے انہاں نال اوئی کجھ ہویا ہوسی جوکجھ عشق بچ اکثر ہونا ہے۔ انہاں نی حسن نی دنیا بچ کجھ کمی نیہہ ہے تہ قاری اشرف نی عشق نی دنیا بچ حسن پروردگار نا مقام رکھنا ہے۔ انہاں نے کلام بچ کرب نا احساس ہونا ہے۔ انہاں نے کلام تھیں پتہ چلنا ہے کہ انہاں نا محبوب بڑا بے وفا ہے، جیہڑا بۂوں تڑفانا ہے۔

اوہ مگی تڑفانا رہنا گلاں بچ سر چانا رہنا ہجر نا کالا سپ بنی اوه اندرو اندری کھانا رہنا اشرفؔ اُس کی یاد نے اندر گیت ہجر نے گانا رہنا

پہاڑی غزل نی عمر بڑی کہٹ ہے۔ پہاڑی ادیباں تہ شاعراں نے بڑی جلدی ترقی کیتی ہے۔ خاص کر کے پہاڑی غزل کی اک بلندی ور پہچایا ہے۔ اس سلسلے نے اک ہور مرد مجاہد نا ناں گر شرن سنگھ گلشن ہے۔ گر شرن سنگھ گلشن ہوراں نا تعلق وی سرزمین پونچھ نال ہے کہ اوہ غزل نے بڑے منے پڑمنے نے شاعر ہین۔ گر شرن سنگھ گلشن نے غزل بچ نویں امکان تلاش کرن نی کوشش کیتی ہے تہ غزل نی معنویت بچ اضافہ کیتا ہے۔ انہاں نے غزل کولوں زیادہ تر پند و نصیحت تا کم لیتا ہے۔ اوہ اپنے خوبصورت محبوب کی شہرت تھیں دور رہن نی گزارش کرنے ہین تہ فرمانے ہین جے اے محبوب تیرا کۂر تہ ماہڑے دل بچ ہے۔ توں ماہڑے دل بچ رہو۔ میں اپنے دل کی صاف پاک مصلے ہاروں رکھیا ہے جس ور نماز ادا کیتی جانی ہے۔ فرمانے ہین:

جانا اسراں کریا کر توں شہرت کولوں ڈریا کر توں دل ماہڑا ہے پاک مصلہ عشق نمازاں پڑھیا کر توں

راجوری بچ پہاڑی غزل نے نال سید مبارک علی نقوی نا ناں جُڑیا ہویا ہے۔ نقوی صاحب خالص غزل نے شاعر ہین۔ انہاں نیاں زیادہ تر غزلاں بچ سوز و گداز نے نال نال عشق نی جلوہ گری وی نظر آنی ہے۔ مبارک علی نقوی نیاں غزلاں انسانی جذبات، سادگی تہ احساس نی بہترین مثال ہین۔

محرم راز بناواں کس کی اپنے درد سناواں کس کی گیت پیار محبت آلے کول بِٹھا سناواں کس کی نقوی درد اللہ نے دِتے سینہ چیر دکھاواں کس کی

اِسے طراں پہاڑی غزل کی اک مقام دین بچ نثار راہی ہوراں نا اک خوبصورت مقام ہے۔ اس سلسلے بچ اُنہاں اک شاندار تہ جاندار کردار ادا کیتا ہے۔ انہاں نے غزل نے مضموناں بچ بڑی وسعت بخشی ہے۔ نالے اپنی غزل کولوں بڑے کم ہندے ہین۔ راہی ہوراں نے کلام بچ جذبات نگاری وی ہے تہ معنی آفرینی وی۔ انہاں نے ارد گرد لوگ جیہڑے تماشے کر رہے ہین نالے اوہ دوائیاں تہ دارو کھا رہے ہی جیہڑیاں جان لین آلیاں ہین۔ فر فرمانے ہین کہ اساہڑے لوکاں بچوں صبرنی دولت ختم ہو گئی ہے۔ بس ہر جگہ اک آپا تھاپی ہے تہ بے ضمیری ہے۔ مثال نے طور پر ایہہ غزل تکو:

اگاں بالی تکنے لوک پۂامڑ اندر تۂکھنے لوک ایہہ دوائی مارو ہوسی مڑ مڑ کیّاں چکھنے لوک بے صبری تہ آپا تھاپی ہُن نہ رہے وڑ بٹنے لوک

خوش دیومینی ہوراں نا باقی ادب نے نال نال پہاڑی غزل بچ اک بڑا ناں ہے۔ انہاں نیاں غزلاں بچ حسن و جمال تہ ناز و ادا نے نال نال ڈوہنگے تجربے وی ہین۔ مینی ہور نظماں، گیت، تحقیقی مقالے تہ افسانے وی لکھنے ہین، لیکن اُنہاں نی شہرت پہاڑی غزل نے حوالے نال وی ہے۔ غزل جیہڑی حدیث دل تہ حسن و عشق تھیں عبارت ہے مینی ہوراں نے کلام بچ سجھی دھجی تہ پورے چاؤ نال نظر اچھنی ہے۔ انہاں نیاں غزلاں محبت نے دلکش نغمے چھیڑ نیاں ہین۔ ایہہ اپنے محبوب نیاں خوبصورت اداواں کی بکھ بکھ انداز نال بیان کرنے ہین۔ مینی ہوراں نیاں غزلاں خالص غزلاں ہین تہ انہاں بچ عشق نے کئی رنگ روپ نظر اچھنے ہین۔ اک جگہ فرمانے ہین:

سوہنا مکھڑا نین کٹار دلبر اَساں کالجے لیا اُتار دلبر لکھ وار میں کہول کہمان ہوساں اک وار جے موڑے مہار دلبر

اسے طراں پہاڑی غزل کی خورشید کرمانی ہوراں نے بڑی عزت تہ آبرو بخشی ہے۔ پہاڑی غزل نے حوالے نال خورشید کرمانی نا ناں بہت بلند ہے۔ اس سلسلے نال اُنہاں اپنے عہد کی بہت متاثر کیتا ہے۔ خورشید کرمانی پہاڑی غزل نے میر تقی میر لگنے ہین۔ بہوں چنگا لکھنے ہین۔ انہاں نیاں غزلاں بچ اک سوچ ہے۔ نرمی تہ لطافت ہے۔ اوہ غزل نے فن تھیں واقف ہین۔ سچ گل تے ایہہ ہے جے انہاں نیاں غزلاں بچ خلوص تہ صداقت نی اک بہار محسوس ہونی ہے۔ خورشید کرمانی نیاں بۂوں ساریاں غزلاں بچ بلاغت ہے، غمِ جاناں تہ غم دوراں وی ہے نالے معنی آفرینی وی۔ اس نے نال ہی نال انہاں نا پُر وقار لب ولہجہ ہے۔ انہاں نا سارا کام خوبصورت ہونا ہے۔ تُس ایہہ شعر تکو:

نیناں لائی چۂڑی ہے دوستا ایہہ ندی اَج فر چڑھی ہے دوستا اس گلی تھیں جائی مڑیا خالی میں کہہ کراں ؟ قسمت سڑی ہے دوستا

غزل نے ارتقاء بچ رشید قمر ہوراں بڑا خوبصورت رول ادا کیتا ہے اور کروی رہے ہین۔ انہاں نی ادبی شخصیت نی شناخت زیادہ تر پہاڑی غزل گو شاعر نی حیثیت نال ہے۔ قمر ہوراں نیاں غزلاں بچ سوز و گداز وی ہے تہ کرب آمیز کسک وی، جیۂڑی اک تیر بن کے دلے بچ اتری جانی ہے۔ انہاں نیاں زیادہ تر غزلاں غم نی فضاء بچ ڈبیاں ہوئیاں لگنیاں ہین۔ قدرت نے اساہڑے قمر ہوراں کی اک دردمند تہ چوٹ کھاہدا ہویا دل عطا کیتا ہے۔ قمر ہوراں نیاں غزلاں اسے دور نیاں ترجمان ہین۔ انہاں نیاں غزلاں بچ سیاسی، سماجی اخلاقی تہ عشقیہ رنگ نے مضمون لبھنے ہین۔ قمر ہوراں نی اک خاص گل ایہہ ہے کہ اوہ موضوع واسطے اپنے فن کی کدے قربان نیہہ کرنے۔ اوہ اول آخر شاعر ہین تہ صداقت انہاں کی بۂوں عزیز ہے۔ توازن تہ ٹھہراؤ انہاں نے مزاج ہاروں کلام بچ دی باندے با چھڑ نظر آونا ہے۔ قمر ہوراں نی اک ہور خاص گل ایہہ وی ہے جے اوہ روایتاں تہ فن نا بڑا احترام کرنے ہین۔ انہاں نی غزل نا ایہہ مطلع کتنا خوبصورت ہے:

دلبر بے اعتبارا لگنا فر وی ظالم پیارا لگنا

اک ہور جگہ فرمانے ہین:

دیّا رستے کوئی بلنا نیہہ دینی ہوا اک آس وی پلنا نیہہ دینی بہتیرے کیٖر تہذیباں نے بالو انا اپنی برف گلنا نیہہ دینا

محمود طاہر پہاڑی غزل نے نوجوان شاعر ہین تہ اپنا اک بکھرا مقام رکھنے ہین۔ انہاں نا کلام بڑا صاف ستھرا ہے۔ اوہ اپنے خیال کی بہتر طریقے نال پیش کرن نا فن جاننے ہین۔ طاہر نی شاعری زندگی نا ماتم ہے۔ اوہ اپنے محبوب کی نیہہ پائی سکئے جس گل نا ڈم اُنہاں نے سیٖنے ور موجود ہے۔ کیّاں کہ انہاں نے رستے بچ بڑے طوفان سن۔ بڑیاں دیوراں سن۔ بۂوں مشکلاں سن۔ جس نی وجہ تھیں اوہ اپنے محبوب تکر نیہہ پہنچ سکے۔ فر ایہہ ہونا ہے جے انہاں نے دل بچوں وی اپنے محبوب نیاں یاداں بلیں بلیں نکل گیآں۔ اوہ فرمانے ہین:

مُکی گئے ارمان بڑے سن رستے بچ طوفان بڑے سن خالی ماہڑے دل نا بیۂڑا ٹری گئے مہمان بڑے سن

غزل نی ایہہ خوبی ہونی ہے کہ اس نیاں شعراں بچ ریزہ کاری ہونی ہے۔ اک شعر اپنی جگہ ور مکمل اکائی ہونا ہے جیۂڑا بکھرا مطلب پیش کرنا ہے۔ اسے غزل نا اک ہور شعر تکو۔ طاہر ہور کہنے ہین:

تۂرتی اپروں اکو دسیا اڈیاں تہ اَسمان بڑے سن

طاہر نی ابتداء بۂوں چنگی ہے۔ امید ہے جے آن آلا ویلہ ہور چنگا ہوسی۔ شاید اسے غزل تھیں متاثر ہوئی اساہڑے اک ہور شاعر ڈاکٹر امیر جعفری شاد ہور کے خوب فرمانے ہین:

دل اندر ارمان بڑے سن سجن پاس تۂیان بڑے سن بني تیرے ہتھ بچ دتی کھابڑے بچ پہلوان بڑے سن تۂرتی کھاہدے اُچّے اُچّے تۂرتی ور اَسمان بڑے سن

اک ہور جگہ فرمانے ہین:

حاتم طائی غنی سکندر کے کرنے آپوں بیٹھے بنی سکندر کے کرنے تۂپاں ویلے چھاماں جیہڑے نہ بنڈن ایہجے بوٹے باغاں اندر کے کرنے

انہاں شاعراں تہ ادیباں تھیں علاوہ خطہ پیر پنچال بج بڑے لوک ہین جیہڑے شاندار غزلاں لکھ رہے ہین۔ کجھ صاحب دیوان شاعروی ہیں تہ ایوارڈ یافتہ وی ہین جنہاں بچ ڈاکٹر مرزا فاروق انوار، پرویز مانوس، سید امتیاز نسیم ہاشمی تہ شیخ آزاد احمد آزاد۔ شیخ ظہور ہوراں نے مقام و مرتبے تہ انہاں نی ادبی خدمات تھیں کیۂڑا کافر انکار کر سکنا ہے۔ انور خان ، جنت حسین سلیم، سلیم جاوید قریشی ، صدیق احمد صدیقی، پرویز ملک وغیره وی شان و شوکت نال پہاڑی غزلاں آکھنے ہین تہ سارے اپنی اپنی جگہ اپنا بھکرا مقام تہ مرتبہ رکھنے ہین۔ میں اس نکّے جئے مضمون بچ بڑے اختصار نال کم کیتا ہے۔ زیادہ تر مِگی جیہڑے شعر زبانی یاد‌ سن اوئی لکھے ہین۔ خلاصہ ایہہ ہے کہ پہاڑی غزل نا آن آلا ویلہ بہت بڑا چنگا ہے۔ ابتداء اگر چنگی ہے تہ انتہا وی چنگی ہوسی۔ انشا اللہ کسے دوّے مضمون بچ کجھ ہور ضروری گلاں کرساں۔ میاں محمد بخش ہوراں نے اس شعر نال اجازت چاہنا کہ:

لکھ ہزار بہار حسن دی اندر خاک سمانی لا پریت ایہجی محمدؔ جگ بچ رہے کہانی

از	ڈاکٹر لیاقت نیّر