Back to: پہاڑی زبان و ادب کے نوٹس
پہاڑی لوک کہانیاں نا تاریخی پچھوکڑ
لوک کہانیاں بچ پہاڑی ثقافت
پہاڑی لوک کہانیاں بچ ظرافت
لوک کہانیاں تھیں مراد اوہ نثری تہ سبق آموز قصے ہین جیہڑے عوام بچ اک پیڑی تھیں دوّی پیڑی تکر منہ زبانی منتقل ہونے رہنے ہین۔ انگریزی بچ انہاں کی Folktales آکھیا جانا اے۔ انہاں قصے کہانیاں بچ عام لوکاں نی زندگی ، رسم و رواج، مذہبی عقیدے، دکھ سکھ تہ اک دوّے نال ہمدردی بیان کیتی نی ہونی اے۔ لوک کہانیاں بچ عموماً سادہ زبان، خیالی عناصر، یا فوق الفطری کرداراں نا استعمال کیتا جانا اے ہور ایہہ کہانیاں سنانے نا مقصد جسمانی تہ ذہنی سکون حاصل کرنے نے نال نال اخلاقی سبق دینا وی ہونا ہے۔ انہاں کہانیاں بچ کسے ہک مصنف نی زندگی نے بجائے عوامی زندگی پیش کیتی جانی اے ہور کسے خطے یا قوم نی تہذیبی شناخت کی محفوظ رکھنے واسطے ایہہ کہانیاں اہم کردار ادا کرنیاں ہین۔
قصے کہانیاں سننے ہور سنانے نا عمل ہمیشہ تھیں پہاڑی لوکاں نا پسندیدہ مشغلہ رہیا اے۔ پہاڑی لوک دور دراز پہاڑی علاقیاں، اچے نکے، تے مالاں اپر رہنے آلے لوک ہین۔ ایہہ لوک اپنے مال چوہر کی چارنے واسطے جنگلاں تہ بہکاں بچ وی جانے ہین ہور بڑی ہی دشوار زندگی گزارنے نے عادی ہونے ہین۔ پہاڑی قوم چونکہ بڑی بہادر ، خوش مزاج تہ دل وچ اک دوّے نا درد رکھنے آلی قوم اے۔ ایہہ لوک جس ویلے کسے خاص محفل بچ رل مل کے بیٹھنے سن یا کدے اکھٹے پیدل سفر کرنے سن، ہک دوّے نال شغل میلہ کرنے ہور سفر نی مشکلاں کی آسان بنانے واسطے اک دوّے کی کہانیاں سنانے رہنے سن۔ اسطراں ایہہ پہاڑی لوک کہانیاں وجود بچ آئیاں۔
ایہہ کہانیاں دادی دادا، نانی نانا ہور کسے بڑے بڈیرے نی زبان تھیں سنائی جانی سن۔ اس تھیں علاوہ رات سینے والے اکثر بچے کہانی سننے نے شوقین ہونے سن تہ کئی واری اوہ کہانی سننے سننے ڈھونگی نیندر وی سو جانے ہین۔ ایہہ لوک کہانیاں پہاڑی قوم بچ صدیاں تھیں سینہ بسینہ آگے ٹرنی رہیاں تہ اج الحمدللہ بہوں سارے پہاڑی لکھاریاں نی محنت تہ تحقیق نی بدولت کتابی صورت اختیار کری گئیاں ہین۔ انہاں کہانیاں بچ ہک خاص قسم نا تاثر ہونا اے ہور خاص طور اُپر نکّے بچیاں نی تربیت واسطے ایہہ بہوں سبق آموز ہونیاں ہین۔ مشہور پہاڑی لوک کہانیاں بچ کچی یاری ، پھلاں دی بارش ، لالچ بری دنیا، گل یاد اے، ماڑے کولوں پچھ، مکو وی شک آسا، توڑی عمر کے اے ، مٹی دیاں ٹیریاں، نخر کھوتی دا، لال بادشاہ، لکڑہارا، گنجا، نیلی ڈاب ، لالچی ملاں، تکبر شہزادہ، نادان بادشاہ، پنج چور، کنک سستی ہے، ان ڈٹھا شیر، چور غازی بن گئے، ہک ٹھگ وغیرہ قابل ذکر ہین۔
ایہہ ساریاں کہانیاں اج جدید دور بچ پہاڑی زبان و ادب نا بہترین سرمایہ ہین۔ انہاں کہانیاں بچ اساں نی سماجی زندگی نا ہر اک پہلو نظر اچھنا اے۔ پہاڑی لوک جس ویلے جنگلاں بچ اپنی بہکاں تہ ٹہارے بچ زندگی گزارنے ہور مال چوہر لئی جانے ہین اس دوران کئی واری انہاں نا آمنا سامنا جنگلی جانوراں سنگ ہونا اے ، ہور ایہہ بہادر قوم انہاں نا وی مقابلہ بڑے جوش تہ جذبے نال کرنی اے۔ اس ویلے نے وی کئی واقعات اساں کی پہاڑی لوک کہانیاں بچ لبی جانے ہین۔ایہہ سارے واقعات اساں پہاڑی لوکاں نی تہذیب تہ ثقافت کی وی بیان کرنے ہین۔
چونکہ شروع شروع بچ انسان فطرت نے قریب سی، اس نی زندگی پہاڑاں، جنگلاں، ندی نالیاں ہور موسماں نے رحم و کرم پر سی۔ ایہی وجہ اے کہ پہاڑی لوک کہانیاں بچ فطری عناصر جسراں پہاڑ، درخت، دریا، جانور ہور موسم نمایاں کردار ادا کرنے ہین۔ انہاں کہانیاں نے ذریعے انسان قدرت نے نظارے، ہور توحید تہ رسالت نا سبق وی حاصل کرنا اے۔ کجھ کہانیاں بچ مقامی حکمراناں، جاگیرداراں ہور طاقتور طبقے نے ظلم و جبر نی علامتی تصویر وی لبنی اے، جب کہ کمزور ہور مظلوم طبقے نے کرداراں کی ہیرو نے طور ور پیش کیتا گیا ہونا اے۔ ایہہ پہلو اس گل نی دلیل اے کہ لوک کہانیاں صرف تفریح نا ذریعہ نیہہ بلکہ عوامی تاریخ اور اجتماعی شعور نا اظہار وی ہین۔
پہاڑی لوک کہانیاں بچ دیومالائی عناصر نا خاص رول اے۔ پریاں، دیو، جن، جادوگر انہاں کہانیاں نا خاص حصہ ہونے ہین۔ انہاں عناصر نی مدد نال کہانی کی سبق آموز تہ دل چسپ بنایا جانا اے لیکن اج سائنس ہور جدید ٹیکنالوجی نا دور انہاں گلاں ور یقین نیہہ کرنا۔
پہاڑی لوک کہانیاں نا اک اہم پہلو انہاں بچ موجود اخلاقی تہ سماجی سبق اے۔ انہاں کہانیاں نے ذریعے سچائی، ایمانداری، وفاداری، بہادری، مہمان نوازی ہور قربانی جیسی صفتاں کی فروغ دتا گیا۔ بڑے بڈیرے ایہہ کہانیاں نکے بچیاں کی سنانے سن تاکہ انہاں کی زندگی نے بنیادی اصول سکھائے جا سکن۔ اس طراں انہاں لوک کہانیاں اساں نی تہذیب تہ ثقافت کی فروغ دینے واسطے اہم کردار ادا کیتا۔
پہاڑی لوک کہانیاں بچ طنز و مزاح نے واقعات وی بڑی تعداد وچ لبی جانے ہین۔ کئی واری لوک کہانیاں بچ کجھ ایہجے چالاک تہ ہوشیار کردارں نے ذریعے کہانی پیش کیتی نی ہونی اے کہ سننے آلے کی ہنسی نکلی جانی اے۔ حالانکہ اس ہنسی مذاق آلی گل نے پس پردہ کوئی اصلاح تہ نصیحت چھپی نی ہونی اے۔ اس طراں لوک کہانیاں بچ ظرافت نہ صرف انسان کی ذہنی خوشی دینی اے بلکہ نکی مٹی غلطیاں اُپر ہلکے پھلکے انداز بچ تنقید وی کرنی اے۔
پہاڑی زبان بچ لوک کہانیاں کی تحریری شکل بچ آننے نا کم 1978 ء تھیں بعد ہی شروع ہویا جس ویلے جموں کشمیر نی کلچرل اکیڈمی بچ پہاڑی نا شعبہ قائم ہویا۔ اس ویلے توڑی تقریباً 32 جلداں ور مشتمل لوک کہانیاں نی کتاباں چھپ کے منظر عام اُپر آ چکیاں ہین۔ ایہجاں وی بکھ بکھ علاقیاں بچ معروف لوک کہانیاں نی پرکھ پرچول کرنا پیسی تاں جل کے ایہہ شاندار وراثت پہاڑی زبان و ادب نی چہولی وچ اضافہ کرسی۔
| تحریر | ڈاکٹر ساجد منیر، شعبۂ پہاڑی بابا غلام شاہ بادشاہ یونی ورسٹی راجوری، جموں و کشمیر |