Back to: پہاڑی زبان و ادب کے نوٹس
0
اسم استفہام نی تعریف
کسے خاص شخص، خاص جگہ یا خاص چیز نے ناں کی اسم آکھنے ہین۔ مثلاً: مرزا غالب ، تاج محل ، حیدرآباد وغیرہ وغیرہ مخصوص لوکاں یا چیزاں نے نان ہین، ایہہ سارے اسم ہین۔ اسم نیاں بہوں ساریاں قسماں ہین جنہاں بچوں اسم استفہامیہ وی ہک مشہور قسم ہے۔
اسم استفہامیہ اوہ اسم ہے جس نی مدد نا سوال کیتا جانا اے یا کسے گل نی حقیقت نی پرچول کیتی جانی اے۔ مثلاً: حامد کس ویلے گیا؟، شاہد کدھر گیا ؟ وغیرہ
اسم استفہام نیاں قسماں
اسم استفہام نیاں ترے قسماں ہین
(١) استفہام اقراری (٢) استفہام انکاری (٣) استفہام استخباری
(١) استفہام اقراری:
اوہ اسم استفہام اے جس بچ کسے گل نا اقرار ہووے مثلاً:
- کیا میں نیہہ آکھیا سا کہ اوہ ارشد نا پہرا اے؟
- کیا تُساں ایہہ سب اپنی اکھاں نیہہ دکھیا ؟
- کیا تو اج سکول نیہہ گیا ؟ وغیرہ
(٢) استفہام انکاری:
اوہ اسم استفہام ہے جس بچ کسے گل تھیں انکار کیتا جائے یا نوکریا جائے ۔ مثلاً:
- کیا تُس سمجھنے ہو کہ میں سچ تہ کوڑ (جھوٹ) وچ فرق نیہہ کری سکنا ؟
- اج کل ایم- اے پاس آلے لوکاں کی کن پُچھنا اے؟
- اساں کدوں دیکھیا اے جیہڑا اساں کی ملزم بنائی پیش کیتا جا رہیا اے؟ وغیرہ
(٣) استفہام استخباری :
اوہ اسم استفہام اے جس نی مدد نال اَس کسے گل نی خبر کہنّے ہاں۔ مثلاً:
- احمد کدوں اچھسی؟
- تُس کدھر جا رہے ہو ؟
- کمرے کی جندرا کُس لایا اے؟ وغیرہ
| تحریر | ڈاکٹر ساجد منیر استاذ، شعبۂ پہاڑی بابا غلام شاہ بادشاہ یونیورسٹی راجوری |