Back to: پہاڑی زبان و ادب کے نوٹس
پہاڑی زبان تہ لوک وراثت نی سام سمۂال، ترقی تہ ترویج واسطے جِتھے اک پاسے فن کاراں سُن گلی، محلہ ، گراں ٹۂوکاں تہ ماہلیاں نے البیلے رنگ کی مدِ نظر رکھنیاں ہویاں اپنی آواز نے جادو نال لوکاں کی اس زبان نی مٹھاس تہ اس نے اندر چھپے خزانے تھیں باخبر کیتا ، سیاسی، سماجی تہ دانشور طبقے نے اس زبان کی ترقی نا پرچم اُچا کیتا۔ عوام کی اپنی زبان نی اہمیت نا احساس کرایا اُتھے دوے پاسے ابتدائی دور نے شاعراں ، ادیباں تہ لکھاریاں انتھک محنت کیتی ، اپنے قیمتی وقت کی زبان نی ترقی واسطے قربان کرنیاں ہویاں اس ڈھانچے کی تیار کرن واسطے ہتھ پیر ماری کے مواد کۂٹھا کیتا۔ اس زبان نے ابتدائی دور نے شاعراں تہ ادیباں نی تخلیقات کی لوڑ کے کڈھیا ، اِنہاں تخلیقاتاں ور کم کیتا۔ انہاں کی مدون کرن تھیں علاوہ متن کی محفوظ کرنے نا انتظام کیتا۔ اس تھیں علاوہ ، شروعاتی دور نے شاعراں، ادیباں تہ قلمکاراں سُن نہ صرف دوسریاں ترقی یافتہ زباناں نے برابر اپنی ماں بولی کی آگے بدھان واسطے کوشش کیتی بلکہ اس نے لہجے کی تلاش کیتا۔ اس نا صحیح تعین کرنیاں ہویاں اس نے رسم الخط تھیں آنے آلی پیڑی کی باخبر کیتا۔
پہاڑی زبان نے انہاں ابتدائی دور نے شاعراں ، ادیباں تہ دانشوراں بچ اک ناں ڈاکٹر صابرؔ مرزا ہوراں نا ہے۔ جنہاں اس زبان نے سرمائیگی تہ مال و مال کرنے ہور اگے بڑھانے واسطے دن رات اک کیتا۔ سردی ، گرمی ، تۂپ ، چھاں کسے چیز نی پرواہ نیہہ کیتی بلکہ اک مشن سمجھ کے پہاڑی زبان کی ترقی تہ ترویج نی اس تحریک کی آگے بدھایا۔
ڈاکٹر صابر مرزا نی شاعری نے مطالعے تھیں بعد ایہہ گل محسوس کیتی جا سکنی ہے جے پہاڑی کول لفظاں نا خزانہ تہ اس نا برتیوا کافی مقدار وچ موجود ہے۔ ہر لفظ نے ہمہ جہت معنی نے نال نال اک وسیع زمین موجود ہے جس نا ہر پاسہ یا ہر طرف مال و مال ہے۔ اک گل کی واضع کرنے واسطے اک تھیں زیادہ لفظ موجود ہیں ہر لفظ نا اک تاریخی پس منظر ہے۔ اس نے پس منظر بچ اس قوم نی تاریخ نا اندازاہ لگایا جا سکنا ہے۔ نمونہ
| برف گلسی، ایہہ کالکھ پھیلسی فر میل چوسی گی پہاڑاں وارنہ فِر اِسراں توں اگ بالی ٹری جایاں |
اس شعر نا ظاہر تہ بالکل سیدھا سادھا ہور واضح ہے جتھے اَس محسوس کرنے ہاں جے کسے اگر انہاں صاف تہ شفاف پہاڑاں ور اگ بالی تہ اس نے سیک سنگ برف گلنا شروع ہو جاسی۔ اس آگ ناں تۂواں کالکھ بنی تہ آسے پاسے نے ماحول کی اتنا آلودہ کرسی گا کہ پہاڑاں وروں صاف شفاف پانی نے بدلے میل تہ کالکھ چونی شروع ہوئی جاتی۔ مقصد ایہہ ہے جے ایہہ پہاڑاں ور رہنے آلاں اپنیاں ٹۂوکاں بہکاں تہ اُچیاں مالاں کی شہراں نے تۂوئیں تھیں پاک دیکھنا چاہنا ہے۔ جد کہ اگر اس شعر نے باطن بچ معنی تلاش کرنے کی کوشش کیتی جاوے تہ ایہہ گل وثوق نال آکھی جاسکنی ہے جے اس شعر نیاں اتنیاں ان دِکھیاں ، ان چھوٹیاں پرتاں گھل کے سامنے آن لگ پینیاں ہین جہاں بارے کسے کدے سو چیا وی نہ ہوسی ہور نہ ہی کسے انہاں پرتاں کی کھولنے کی کوشش کیتی ہوسی گی ہور اگر انہاں پرتاں کی کھولنے نی کوشش کیتی جاوے تہ صابر مرزا نی غزلیہ شاعری ناں کوئی وی اک شعر مکمل مقالے نا متقاضی ہے۔
عربی فارس تہ اُردو نی شاعری پڑھنے یا سننے تھیں بعد اک احساس جاگنا ہے جے انہاں زباناں نی معیاری شاعری نے اندر اس طراں نے بہتیرے شعر موجود ہین جنۂاں نے اک تھیں زیادہ معنی تھیں علاوہ کافی ساریاں جہتاں تکی جا سکنیاں ہین جد کہ ایہہ ساریاں ترقی یافتہ زباناں نی سر پرستی ہر دور نے حاکم طبقے سن کیتی ہے۔ ایہہ ناں صرف اپنے ملکاں نیاں معتبر تہ متبرک منیاں جان آلیاں زباناں ہیں بلکہ ترقی یافتہ ہون نے نال نال انہاں نے بولنے آلے حکمراناں نے کارنامے، تاریخی علمی تہ ادبی معرکے انہاں نی افاقیت تہ وسعت نا اندازہ قدیم تاریخی معلومات تھیں لگایا جا سکنا ہے۔ اس سارے پس منظر کی ذہن وچ رکھنیاں ہویاں اگر اس پہاڑی زبان نی وسعت ، افاقیت تہ زخیرۂ الفاظ نی گل کرنیاں ہویاں اس نا محاسبہ کراں تہ اک حوصلہ افزا احساس آساں کی آگے بدن نی تحریک دینا نظر آنا ہے۔ آکھنے نا مقصد ہے جے اک اِسی زبان جس کولے سارا کجھ موجود ہے ذخیرہ الفاظ نے دوسرے پاسے معنی نا خزانہ تہ اس نیاں جہتاں، شیرینی تہ جاذبیت کسے وی قاری یا سامع کی اپنی سحر انگیزی تہ جادو بیانی نے حصار بچ قید کرنے نا معجزاتی هنر رکھنی ہے۔ اس زبان کی اگر کِسے وی دور بچ سرکاری تہ عوامی سر پرستی حاصل ہونی، اپنے بولنے آلے اسودہ حال ہونے تہ اج ایہہ زبان کہیٹیاں کر کے اِتھے نہ پہنچی ہونی بلکہ بڑی دیر پہلاں اپنے خطے نی بڑی زبان منی جانی۔ اس تھیں علاوہ دنیا بھر نیاں ترقی یافتہ زبانیاں نی اَکھاں وچ اَکھاں ہاء کے گل کری سکنی۔ جس نی طاقت اس زبان نے اندر موجود ہے۔
اک سروے نے مطابق دنیا بھر وچ ایہہ کوشش کیتی جارہی ہے جے ماں بولی نی حفاظت نہ ترقی واسطے کم کیتا جاوے جس نے تحت ہر سال فروری نے مہینے بچ عالمیMother day منایا جانا ہے اس کار خیر کی انجام دینے واسطے سرکاری ، نیم سرکاری تہ رضا کار تنظیماں اپنی اپنی جگہ سرگرداں ہین۔ کیّاں جے ترقی یافتہ زباناں نے بولنے آلے شعوری اعتبار نال بیدار ہونے نے نال نال مالی اعتبار سنگ اسودہ حال ہین، اس تھیں علاوہ انہاں زباناں کی اپنے عہدے نے حکمراناں نا تعاون دستیاب ہے۔ اس نے برعکس پہاڑی اک بڑی وسیع تہ زرخیز زبان ہونے نے نال نال اپنے بولنے تہ سمجھنے آلیاں نی توجہ تہ حوصلہ افزائی نا تقاضا کرنی ہے۔ اس نے بولنے آلا اک بڑا طبقہ دور دراز پہاڑاں ور حالات نی ستم ظریفی ، بے توجہی تہ زمانے نے عتاب نے شکار ہے ہور نہ ہی شعوری طور ور ایہہ تعلیم یافتہ طبقہ ہے جے کھل کے اپنی زبان نی خدمت کرنیاں ہویاں اس نے اثاثے کی محفوظ کرنے واسطے ہتھ پیر ماری سکے اسے طراں نے کجھ خیالات صابر مرزا نی شاعری نا احاطہ کرنے نظر آنے چند نمونے:
| دکھ موسم نے جاسن دور دراہڈے دس خوشیاں نے بدل برساتاں آسن فر اُچ تہ نیچ نے قضیے مٹسن دہسیاں کد کد فر نیک تہ پہلیاں ذاتاں آسن فر |
نمونہ
| اس نے شیش محل تھیں صابر سوہنا اپنا چھپر لگنا |
نمونہ
| نۂیر غبار دلوں نیہہ نٹھے میں اَکھاں وچ بالیاں راتاں |
صابر مرزا نی غزلیہ شاعری ایسی منافرت، احساسِ تنہائی، بے یقینی، بے چارگی، تنگدستی ، مایوسی ، ڈر، خوف وہراس نے نال نال مکروہ سوچاں تہ چہریاں کی بے نقاب کرنیاں ہویاں انہاں کی شیشہ دہسنی دکھی جاسکنی ہے۔ انہاں نے شعری مجموعہ ”رنگ رتاں گلزار“ نے مطالعے تھیں اندازہ ہونا ہے جے انہاں نی فکر نا دائرہ کتنا وسیع ہے۔ اوہ جتھے اک پاسے علاقائی تعصب، نفرت ، ظلم ، وصبر نے نال نال قومی تہ نسلی منافرت، اتھل پتھل نیاں ناکام کوششاں کرنے آلیاں نا چہرہ بے نقاب کرنیاں ہویاں انہاں کی شیشہ دِسنے نظر آنے ہین اتھے ہی سماج کی اک ڈگر ور چلنے نا حوصلہ عطا کرنے ہین۔ کجھ مثالاں:
| فر مُڑ آیاں کالیاں راتاں دکھاں درداں والیاں راتاں ہنیر غبار دلوں نیہہ نٹھے میں اَکھاں بچ بالیاں راتاں چن چانن تہ جیلن آنے روز سمندر خوف موت نے بیڑے ور ہاں بیٹھے لبّھے منظر منظر خوف ساری بستی ساڑی بالی لہو لہو تۂرتی پار کری خبر نہ سی اوہ فر اِسراں نا دئی جاسی گا پتھر خوف ایہہ بد شکلا تہ بد ذاتا بے بوجھا ان منا ہے!! نہ ایہہ سنّی ، نہ ایہہ وہابی، نہ سید نہ ٹھکر خوف |
ڈاکٹر صابر مرزا نی غزل اپنے عہد نی دوسریاں زباناں نے عصری بدلاؤ نی طراں ہر دور نی خالی نمائندگی کرنی نظر نیہہ آنی بلکہ انہاں اپنے عہد نے درد کی محسوس کیتا ، اپنے دور نے مسائل نال دو چار ہونیاں ہویاں اس نال مقابلہ کرنے نا اِرادہ کیتا۔ انہاں نی غزل صرف عشق نے معاملات، محبوب نیاں زلفاں، اس نے ناز و نخرے، اس نیاں قاتل نظراں نے وار تکر محدود نیہہ رۂہی بلکہ معاشرے نے دوسرے سارے مسائل نا احاطہ کرنی لبھنی ہے۔ دو عالمی جنگاں انہاں نے اثرات، انہاں نال ہون آلی تباہی تھیں علاوہ تقسیم وطن ہور اس تھیں بعد بڑے پیمانے پر ہجرتاں نا سلسلہ، فسادات تہ اُس تھیں بعد اک لمی خموشی ، اک طراں نی چپ ، ہک ایسا خوف جیۂڑا کۂر نے اندر وی ڈراونا لگنا ہے تہ کۂر تھیں بار بزار تہ ہجوم وچ وی ڈرانے نی کوشش کرنا ہے ایہہ اس دور نی بے بسی ہے جیۂڑی انسان نا مقدر بن گئی ہے اور انسان لگا تار اس نال مقابلہ کرنا نظر آنا ہے تہ رومانی تھیں بعد حقیقت پسندی یا ترقی پسندی نے نال نال اس طراں نے نظریات نے انگریزی ادب تھیں علاوہ اُردو، پنجابی ہندی تہ پہاڑی شاعری کی وی متاثر کیتا۔ پہاڑی غزل نی ایہہ کمال ہے جے اس نے اپنے دور نیاں ترقی یافتہ زباناں نے نال نال دوڑ لائی۔ اس زبان نے شاعراں سُن محنت، لگن تہ خدا داد صلاحیت کی بروئے کار لانیاں ہویاں ہر قسم تہ ہر نظریئے تھیں ادب نی چۂولی کی مالا مال کیتا ، ڈاکٹر صابر مرزا نی غزلیہ شاعری نیاں چند مثالاں:
| دلبر تہ دلدار لکیراں لکھن لیکھ ہزار لکیراں موسم ، موسم تۂرتی اُوپر بنڈھن باغ بہار لکیراں سوہنا بۂوں سوہنا اُسی پیکر کرراں یانہ کراں دل دئی تہ دہس اُسی دلبر کراں یانہ کراں بول اے اَکھاں نیاں انداز یا توں کجھ تہ بول یاد اوہ سوہنا جئیا منظر کراں یانہ کراں |
ڈاکٹر صابر مرزا پہاڑی لفظاں نے برتاؤے نے ہنر تھیں ہی واقف ہی نیہہ بلکہ اوہ گراں نے اچے نیویں تھیں بخوبی واقف ہون نے نال نال انہاں لفظاں نی پاکیزگی تھیں علاوہ انہاں نا صحیح استعمال تہ موقع محل وی جاننے ہین۔ اوہ پہاڑاں نی دُکھ تہ درد پۂری زندگی، مصیبتاں پۂری ذمہ داریاں نی ڈنگی تھیں علاوہ پۂکھ ،افلاس، غریبی، ان پڑھتا، سدھی سادھی زندگی، سچیاں، سُچیاں تہ صاف پاک گلاں ، گراواں نیاں عورتاں نیاں اِس وچ نوک جھونک جیۂڑی اک دوسرے ور چوٹ نیہہ کرنی بلکہ ہنسی کھیڈی کے وقت کی گزارن واسطے مددگار ثابت ہونی ہے، اس سارے سلسلے تھیں بخوبی واقف ہیںضن۔ انہاں پھل بوٹے یا ڈوگیاں، بنے ، گۂراٹ، چکی، ڈوگی بنہ، بانڈی، کُھرلی خالی کتاباں وچ نیہہ پڑھے بلکہ عملی طور ور انہاں ساریاں چیزاں تھیں بخوبی بچپنے تھیں دو چار رہئے۔ انہاں نی شاعری نے چند نمونے:
| پھل پھلے پھل پتر آنو آکھاں باہی منظر آنو پۂور پپیہا تتلی آکھے! خوشیاں نے تُس پکھر آنو اوہ جس چھوڑ دِتا کۂر بیہڑا اس پنچھی کی فر کۂر آنو پیر پنچال نے سوہنے منظر سوہنے اُچے تنگ دِیار سونی ڈونہگی مرگ پیاری آہاں چناں کراں پیار سوہنے تلے بیلے ٹۂوکاں ٹۂارے ٹۂارے پیار خلوص مٹھے سوہنے چھم چھاماں پھل پتر سب نقش نگار رٹھے دس دلدار نے کیّاں پہلے قول قرار نے کیّاں اس بستی نے آل دوالے اَج وی رنج آزاد نے کیّاں |
ڈاکٹر صابر مرزا پہاڑی شاعری خاص کر کے پہاڑی غزل نی پہچان اپنے عہد نیاں دویاں زباناں جنۂاں وچ اُردو تہ پنجابی خاص مقام ور فائز ہونے نال نال بین الاقوامی سطح ور بولیاں سمجھیاں تہ پڑھیاں جانیاں ہین، نال مقابلہ کروانیاں ہویاں ذراوی عار محسوس نیہہ کرنے۔ کیّاں جے انہاں کی اپنی ماں بولی اور پۂر پور پۂروسہ ہے۔ اوہ اس چیز کی بخوبی جانتے ہین جے پہاڑی شاعری اور اگر محنت تہ دل جمعی نال جان ماری جاوے تہ ایہہ زبان ساریاں زباناں تھیں زیادہ امتیازی حیثیت نی مالک ہے۔
فنی اعتبار نال اگر دِکھیا جاوے صابر نی شاعری خاص کر پہاڑی غزل کئی جگہ نامکمل سکنی ہے مگر پہاڑی غزل نی عمر تہ صابر مرزا نی کاوش نے نال نال حوصلہ ہور اس غزلیہ شاعری کی نویں زمانے نے لوازمات تھیں واقف کروانیاں ہوئیاں بالکل نیویں تجربات تھیں آگے لنگ جانا کیسے کرشمے تھیں کۂٹ نیہہ۔ انہاں نی شاعری ناں مجموعی اعتبار نال محاسبہ کرنیاں ہوئیاں ایہہ راز سامنے آنا ہے جے پہاڑی غزل اپنے ابتدائی دور نیاں تمام غزلاں جلدی جلدی پار کر کے دوئیاں زباناں نی طراں نویں دور بچ داخل ہو چکی ہے۔ اس نے جیۂڑا سفر ڈیڑھ سو سال بچ طئے کرنا سا اوہ لگ بھگ تریہہ، چالیس سال نے اندر اندر پورا کر کے اپنے اندر نویں مضامین ، اصطلاحات ، استعارے تہ تشبیہات نی مدد نال ادا کرنے نی جان پیدا کر لِتی ہے۔
| از: | ڈاکٹر علمدار عدمؔ |