Back to: پہاڑی زبان و ادب کے نوٹس
شاردا پیٹھ نے ذکر تھیں پہلاں پہاڑی زبان نا تعارف کرنا ضروری اے۔ برصغیر ہندو پاک بچ اس ویلے الموڑہ،گڑھوال کماؤں دیرہ دون تہ ہماچل توں کشمیر توڑی مختلف قبائل نال تعلق رکھنے آلے کروڑاں لوک پہاڑی زبان بولنے ہین۔ پر بنیادی طور ور اس زبان نا تعلق “کھکھ “قبائل نال اےجس کی گریسن تہ اس نے ہم خیال ماہر لسانیات نے “کھاشہ قبائل” آکھیا اے۔
اک سروے نے مطابق دنیا بچ زباناں نے کل آٹھ خاندان ہین۔جنہاں بچ سامی، دراوڑی، ملایائی،امریکی،افریقی ،ہند چینی،منڈا،ہند یورپی مشہور ہین۔انہاں بچوں سب توں بڑا خاندان ہند یورپی اے۔پہاڑی زبان نا براہ راست تعلق وی ہند یوروپی خاندان نی ہند آریائی نسل نے پشاچی گروہ نال اے۔
پنڈت بی این کے ہوراں اپنی کتاب “ہسٹری آف کشمیر” بچ لکھیا اےکہ راجہ اشوک نے دور بچ بدھ مذہب پورے کشمیر بچ اپنے عروج ور سا تہ اس مذہب نی کھوج تہ ترقی واسطے اک علمی تہ ادبی مرکز وی قائم کیتا گیا سا،جھتے دور دور تھیں لوک آئی تہ بدھ مذہب نے علمی تہ مذہبی خزانے تھیں فائدہ چکنے سن۔اس مرکز یا تعلیمی ادارے نا ناں شاردہ پیٹھ سا۔
شاردا پیٹھ قدیم علم حاصل کرنے نا مقام رہیا اے جہیڑا کشمیر بچ سا ہور ایہہ اعلیٰ تعلیم دینے نا ادارہ سا۔اس ادارے بچ بہوں ساریاں کتاباں بدھ مذہب نے پرچار واسطے سنسکرت زبان بچ لکھی گئیاں ہین۔چونکہ سنسکرت پڑھے لکھے لوکاں نی زبان سی اس واسطے ضرورت محسوس ہوئی کہ عام عوام نی زبان بچ انہاں کتاباں کی ترجمہ کیتا جاۓ تاں جے اوہ وی اسانی نال انہاں کتاباں کی پڑھی سکن۔اسے مقصد کی مد نظر رکھی انہاں کتاباں کی شاردا لپی یعنی پہاڑی زبان بچ تحریر کیتا گیا جہیڑی اس ویلے عام لوکاں نی زبان سی۔شاردا لپی نہایت ہی مضبوط کردار ادا کیتا ہور اک موثر دستاویزی شہادت پہاڑی زبان نے فروغ واسطے تیار ہوئی۔اس طریقے نال بدھ مت نے پرچاریاں نے پہاڑی زبان کی مذہب نے پرچار نا ذریعہ بنایا ۔
( ڈاکٹر ایس۔ پی۔ وید،جموں کشمیر کے پہاڑی لوگ ،صفہ: 56.)
قدیم شاردا یونی ورسٹی ضلع نیلم نے سر سبز تہ شاداب علاقے سرگاں نالے نے کنارے اک پہاڑی اُپر موجود اے۔شاردا یونی ورسٹی دو پہاڑاں شاردی تہ ناردی نے دامن بچ موجود اے۔ شاردا وادی نا ناں ہندو مت نی شاردا دیوی نے ناں توں منسوب اے، جہیڑی علم تہ فن نی دیوی سمجھی جانی اے تہ اس کی سرسوتی دیوی وی آکھیا جانا اے۔
مورخین نے مطابق اس یونی ورسٹی نا قیام پہلی صدی عیسوی بچ کنشک اول نے دور بچ ہویا،ایہہ تاریخی مقام ہندو مت تہ بُدھ مت نے مذہباں واسطے بڑی اہمیت رکھنا اے۔ کجھاں کتاباں بچ اسنا ایہ وی پتہ چلنا اے کہ پہلاں ایہہ مندر سا بعد بچ سارے لوکاں نی یکساں ترقی تہ پرچار واسطے اس کی اک لرنِگ سینٹر (Learning centre)نا درجہ دئیی تہ عام کری چھوڑیا۔
ستمی صدی عیسوی بچ اک مشہور چینی سیاح ‘ہیون سانگ ‘ جس ویلے جموں وکشمیر بچ آیا ہور دو سال اتھے رہیی تہ بدھ مذہب نا علم سکھنا رہیا ،اس نے شاردا یونی ورسٹی نے متعلق لکھیا اے کہ اِتھے مقامی زبان بچ تعلیم دِتی جانی اے کجھ لوکاں نے پہاڑی نا کوئی والی وارث نہ دیکھ کے اس زبان کی کشمیری زبان آکھیا ،مگر اوہ مقامی زبان پہاڑی ہی سی جہیڑی کئی سیلاب چہل کے اپنیاں لکھتاں نویں طراں کڈھن لگی۔
( ” ادبی سبیلاں”، شبیر احمد خان شمسؔ، سن اشاعت: 2024 )
مشہور مسلمان مورخ البیرونی ہوراں اپنی کتاب “کتاب الہند “بچ کجھ اس طراں ذکر کیتا اے کہ کنشک اول نے دوربچ شاردا وسط ایشیا نی سب توں بڑی تعلیمی و تدریسی درسگاہ سی۔اس بچ بدھ مت نی باقاعدہ تعلیم نے نال نال تاریخ ،جغرافیہ، فلسفہ وغیرہ ور وی مکمل تعلیم دتی جانی سی۔ اس نی عمارت کنشک اول نے ۲۴ تا ۲۷ بچ تعمیر کروائی سی ایہہ عمارت برصغیر بچ پائے جانے والی ساری قدیم عمارتاں تھیں مختلف اے خاص کر اس نے درمیان بنایا گیا اک چبوترہ اک خاص فن تعمیر نا نقشہ پیش کرنا اے جہیڑا بہوں دلچسپ اے جس نی اونچائی تقریباً سو فٹ اے۔
اُس وقت نے دربار نا اِس ادارے کی براہ راست تعاون سا جس نے بل بوتے پر اس ادارے نے بڑی حیرت انگیز ترقی کیتی تہ مشہور ہوئی گیا۔اس زمانے بچ شاردا پیٹھ علم و ادب نا مرکز بنی گیا تہ دنیا نے ہر ملک توں بڑے بڑے جتھے، آشوگوش، بدھ عالم اتھےائے تہ اپنے مذہب نا پرچار کیتا۔اس وقت کشمیر بچ اس زبان نا پھلنا پھولنا اسان نیہہ سا کیاں کہ اتھے سنسکرت زبان نا دبدبہ سا۔ اوہ وی اپنی زبان نی حفاظت واسطےسنجیدہ رہنے سن۔ بدھ مذہب نے عالماں ایہہ گل سمجھ لئی سی کہ سنسکرت زبان نی مدد نال بدھ مذہب وادب عام لوکاں توڑی پہنچانا اسان نی۔ اس واسطے ضروری اے کہ ہر کم واسطے آسان تہ سہل زبان کی ترقی دتی جائے، چنانچہ بدھ عالماں نا شاردا پیٹھ نا نظریہ کافی کم آیا اُتھے سنسکرت نے مشکل الفاظ تہ اصطلاحاں کی عام بول چال بچوں کڈی چھوڑیا ہور انہاں نی جگہ سادے لفظاں کی ترجیح دِتی، ہور انہاں اک نواں رسم الخط ایجاد کیتا جس نا ناں ” شاردا لپی” سا۔ ایہہ رسم الخط مقدس ترین مندر یا شاردا پیٹھ نی نسبت ہونے نی وجہ توں دنیا بھر بچ مشہور اے۔ ماہرین لسانیات نے مطابق رسم الخط کی کسے وی زبان نا گودام یا سٹور روم آکھیا جانا اے۔ عالمی سطح نے ماہرین لسانیات تہ برصغیر ہندو پاک نے معروف محقیقین نی مستند تحریراں توں پتہ چلنا اے کہ شاردا رسم الخط بدھ مذہب نے لوکاں نی ایجاد اے۔
پہاڑی قوم نی تاریخ بچ شاردا پیٹھ نا ناں کافی اہمیت رکھنا اے۔اس دور کی پہاڑی قوم نا سنہری دور آکھیا جانا اے کیاں کہ اُس ویلے شاردا لپی وجود بچ آیا ، پہاڑی زبان کی اس ویلے کافی فروغ لبھیا۔اس یونی ورسٹی بچ درس و تدریس نا کم پہاڑی زبان بچ رائج سا،اس توں ثابت ہونا اے کہ پہاڑی زبان تہ تہذیب و ثقافت اس دور بچ کافی ترقی ور سی۔اس طرح پہاڑی زبان نے فروغ بچ شاردا یونی ورسٹی نا اہم کردار رہیا نا اے۔ اس دور کی بعض محققین پہاڑی ادب نا ابتدائی دور آکھنے ہین تے اس طراں سارے لوک پہاڑی زبان کی شاردا یونیورسٹی نال جوڑ نے ہین۔
بر صغیر بچ پہاڑی زبان نے ارتقاء نا ایہہ ابتدائی دور منیا جا سکنا اے جہیڑاپہاڑی زبان تہ اس نے بولنے والیاں کی مہاراجہ اشوک نے دور بچ حاصل ہویا اے۔ اس یونی ورسٹی بچ بدھ مذہب نیاں ہزاراں کتاباں تخلیق ہوئیاں۔مہاراجہ اشوک نے اتھوں نی مقامی زباناں خاص کر پہاڑی زبان بچ بدھ مت نے پرچار نا اہتمام درحقیقت مہاتما بدھ نی اس خواہش نے مطابق کیتا جس بچ انہاں نے بدھ بھکشاں کی حکم دتا سا کہ اوہ اپنیاں اپنیاں زباناں بچ بدھ مت نی تعلیم دین۔
راجہ نذر بونیاری اپنے اک مضمون “پہاڑی زبان ماضی ،حال تہ مستقبل”بچ لکھنے ہین “کہ پاکستان نے زیر انتظام کشمیر نی وادی نیلم یا کشن گنگا بچ عالمی شہرت نی مالک شاردا پیٹھ یا شاردا یونیورسٹی کو اِس پاسے نے کتنے اہلِ علم و ادب لوک جاننے ہین۔ کشمیر نیاں جتنیاں وی تاریخاں ہین انہاں نا مطالعہ کرنے تھیں بعد ایہہ پتہ چلنا اے کہ اس قدیم علمی ادبی مرکز بچ پڑھاۓ جانے آلے علوم نا میڈیم “شاردا “زبان سی۔اس زبان کی کجھ مورخین “ٹاکری” لکھنے ہین حالانکہ اس نا ناں لپی لُنڈا یا ٹاکری سی جیہڑی قدیم سنسکرت نال مشابہ رہیی اے۔محققین نی راۓ اے کہ ایہوئ زبان قدیم پہاڑی زبان سی۔
(نِمّل ، راجہ نزر بونیاری ،صفہ :188)
پہاڑی نے اک مشہور دانشور غلام مصطفی پونچھی فریڈرک ڈریو، بین تہ دوۓ محققین ناحوالہ دیئ لکھنے ہین کہ”اج توں ڈھائی ہزار سال قبل اشوک نے دور حکومت بچ پہاڑی زبان نے کافی ترقی ہور وسعت حاصل کیتی سی۔کشمیر بچ کشمیری زبان بولنے آلے پہاڑی زبان کی” پارمی” آکھنے ہین یعنی پارلی پہاڑی نے اکثر دانشور اس نے “پارمی” یا “پارلی” ناں نی بنیاد ور اس نی نسبت پالی زبان نال جوڑ نے ہین جس بچ بدھی ادب تخلیق ہویا۔ اے تہ مشہور اے کہ مہاتمہ بدھ نے اپنے مذہب نی تبلیغ پالی زبان بچ ہی کیتی سی”
مختصراً اس ایہہ آکھی سکنے آں کہ پہاڑی زبان نی ترقی بچ اس ادارے نا اہم ہور بنیادی کردار رہیا اےجس کی کسے صورت بچ نظر انداز نیہہ کیتا جا سکنا۔حقیقت بچ دیکھیا جاۓ تہ پہاڑی زبان نے اصل بچ اتھوں ہی فروغ پایا اے جہیڑا بعد بچ شاردا پیٹھ نے زوال نال متاثر وی ہویا اے۔ہندو تہ بدھ مت جد آپس بچ زیر زبر ہوۓ تہ ہندواں ہور انہاں نے پجاریاں نے شاردا پیٹھ کی شاردا دیوی نے ناں نال پکارنا شروع کیتا۔پنڈت کلہن نے وی اپنی کتاب “راج ترنگنی” بچ اس نا اشارہ مندر نے ناں نال کیتا اے۔
ایہہ یونی ورسٹی بعد بچ مختلف حملیاں تہ تباہیاں نا شکار ہوئی ہور ویلے نے نال نال ایہہ تعلیمی مرکز زوال پزیر ہویا۔اج ایہہ مقام آثار قدیمہ نے طور ور جانیا جانا اے تہ اس نے کھنڈرات اج وی پاکستانی قبضے آلے کشمیر وچ موجود ہین، جیہڑے قدیم ہندوستانی ثقافت ہور تعلیم نے عظیم ور ثے نی یادگار ہین۔
مطالعہ شدہ کتاباں:
- 1.نمل،راجہ نذر بونیاری
- 2.پہاڑی زبان وادب دی تاریخ ، راجہ نذر بونیاری
- 3.جموں وکشمیر کے پہاڑی لوگ، ڈاکٹر ایس پی وید
- 4.استا ادب،جلد 38
- 5.شیرازہ پہاڑی ،جلد 39
| تحریر: حلیمہ تبسم | طلبہ: شعبہ گوجری و پہاڑی، بابا غلام شاہ بادشاہ یونیورسٹی راجوری جموں و کشمیر |