Back to: پہاڑی زبان و ادب کے نوٹس
جس ویلے ہابیل تہ کا بیل نا آپسی چہگڑا ہویا سا۔ اک پۂرا نے دوئے پۂرا نا قتل کیتا سا۔ ایہہ دوئے حضرت آدم نے پُتر سن ، دُکھ تہ غم نی کہڑی بچ حضرت آدم نی زبان مبارک تھوں کجھ فراقیہ بول نکلے سن جیہڑے بول شاعری نی صورت اختیار کر گئے ،شاعری انسانی زندگی نا حصہ ہے۔ سو بچوں کوئی اک شاعر لبھی جانا ہے۔ ایہہ خدا داد صلاحیت وی ہے تہ خدائی صفت وی۔ ماہڑی گل کُدھرے لمی نہ ہو جائے۔ ماہڑی سوچ سی میں شیخ آزاد صاحب نے اُپر کجھ لکھاں ، شیخ آزاد صاحب ۱۸ اکتوبر ۱۹۴۸ ء بچ شیخ عزیز الدین نے کہر پیدا ہوئے۔ آزاد صاحب نے ماں پیو نیک سیرت تہ اللہ آلے سن۔ تہذیب تہ تربیت نے لحاظ نال ایہہ کہرانہ اپنی مثال آپ ہے۔ شیخ آزاد صاحب نے آباؤ اجداد شروع تھوں باشعور سن، علم نی دنیا نے بہوں نزدیک سن ، پونچھ نی تہرتی ادب نے لحاظ نال ذرخیر تہرتی ہے جتھے جناب چراغ الحسن حسرت ، جناب صادق بیتاب ، ٹھاکر پونچھی، سائیں قادر بخش، پیر برکت شاہ صاحب، پیر باغ حسین شاہ صاحب ، خدا بخش زار صاحب تہ حسام الدین بیتاب، انہاں ہستیاں تھوں علاوہ وی کجھ شخصیتاں قابل ذکر ہین۔
ضلع پونچھ بچ سرنکوٹ نی تہرتی ادب نے لحاظ نال بہوں ذرخیز ہے۔ آزاد صاحب اسے تہرتی نال تعلق رکھنے بین۔ تعلیم مکمل کرن تھوں بعد محکمہ تعلیم نے نال رشتہ جڑی گیا۔ پیدائش تھوں لئی آج تکر اِتھے ہی وقت گزاریا، اپنی ملازمت وی اتھے ہی کیتی۔ شیخ آزاد صاحب نا ایہہ بڑا کمال ہے کہ اوہ کسے نے دُکھ درد کی اپنا دکھ درد سمجھنے ہیں۔ سارے معاشرے بچ بڑے مظلوم تہ دردی لوک موجود ہین۔ ماہڑے سماج بچ ہر قسم نے دُکھ درد کی سہہ لینے ہین جد کہ زبان تھوں بولی نیہہ سکنے اُنہاں کی کسے عالم نا خوف وی ہونا ہے۔ شیخ آزاد صاحب نے انہاں مظلوم لوکاں نی اپنی پہاڑی غزلاں بچ چنگی تہ پہر پور ترجمانی کیتی ہے۔ پہاڑی زبان نے نویں لکھاریاں کی ادب نی لوہ بخشی ہے۔ تعجب نی گل ایہہ ہے کہ شیخ آزاد صاحب کشمیری ہین۔ انہاں نی مادری زبان کشمیری ہے۔ جد کہ اوہ پہاڑی زبان تہ گوجری زبان اُپر پوری دسترس رکھنے ہین۔
آزاد صاحب نے گوجری تہ پہاڑی زبان نے اُپر بڑا احسان کیتا ہے۔ اُنہاں نی پہاڑی غزلاں نے شعراں بچ نویں نویں تہ اُوپرے خیال لبھنے ہین۔ آزاد صاحب نا اپنا نویکلا خیال ہے۔ پہاڑی زبان کی دو مجموعے دتے۔ پہلا مجموعہ جیہڑا مارچ ۲۰۱۰ بچ شائع ہویا اس مجموعے نا ناں ”شیشے نیاں کندھاں“ ہے۔ تہ دوا مجموعہ ”آگ المبے“ جیہڑا مئی ۲۰۱۲ ء بچ شائع ہویا۔ شیخ آزاد صاحب پہاڑی غزل نے ولی دکنی ہین جنہاں نے پہاڑی غزل بچ نیٖں دا بٹّا رکھیا۔ انہاں نی پہاڑی غزل بچ عام سادہ قسم نے لفظ ہین۔ جیہڑے آسانی نے نال سمجھنے جائی سکنے ہین۔ انہاں نے شعراں بچ پہاڑی زبان نی خوبصورتی بخوبی لبھنی ہے۔ اہجے لوک اپنی لسانیات اپنی پیدائش نے نال ہی لے کے دُنیا اُپر آنے ہین ، کُسے کی کیئہ پتہ سا شیخ آزاد صاحب پہاڑی زبان نے اتنے بانکے شاعر ہوسن ، انہاں نے ٹھیٹھ پہاڑی لفظ انہاں نی غزل نی خوبصورتی نی ضمانت دینے ہین۔ اُنہاں نی پہلی تصنیف شیشے نیاں کندھاں بچوں غزلاں نے چونمے شعر تساہڑی نذر کرنا ہاں ملاحظہ فرماؤ:
| باہج عشق کی اگ تھیں دہسو ہس کے سولی چڑھیا کون تیسہ پکڑے کس نے دہسیا تہ دریا بچ رہڑیا کون تیرا عشق زمانہ تکے میرا یار بڑا ہے دُور ڈوہنگے اِس سمندر اندر بہلا بہلا تریا کون |
جموں کشمیر بچ گوجری زبان نے اندر یا پہاڑی زبان نے اندر غزل زیادہ تر پابند قافیے نے اُپر لکھی گئی ہے۔ پابند قافیے بچ غزل کہنا آسان ہے۔ اُس نی نسبت آزاد قافیے بچ غزل لکھنا بہوں مشکل ہے، آزاد صاحب نے شعراں نی خوبصورتی تہ گہرائی لامثال لگنی ہے اک ہور غزل نا اک شعر ملاحظہ فرماؤ:
| کلکھ رات کالی ہے ساون نا مہینہ ایہہ اِس بچ وی تیری حیاء اللہ اللہ |
جس شاعر کی خوبصورت شعر کہن نا جچ آ گیا فر شعر اس تخلیق کار نا پیچھا نیہہ چھوڑنا۔ پہاڑی زبان بچ جیہڑا شاعر ٹھیٹھ لفظاں نے برتے نال کوئی چنگی تخلیق دئی سکنا ہے اوہ شخصیت شیخ آزاد صاحب نی ہے۔
راقم آزاد صاحب نی غزلاں نا بغور مطالعہ کیتا ہے۔ آزاد صاحب فن نی باریکیاں کی چنگی طراں جاننے ہین۔ ہر بحر نے اندر اُنہاں نے غزلاں لکھیاں ہین۔ اک غزل نا بہوں سوہنا شعر ملاحظہ فرماؤ:
| لہو اس نا مقدر ہو گیا ہے ایہہ انسان اج نا پتھر ہو گیا ہے |
آزاد صاحب نے اپنے ماحول بچ جو جو ظلم نے چہگھڑے تکے اوہ بڑی سنجیدگی نے نال اپنی غزلاں بچ مضمون پیش کیتے۔ سماج بچ جو نا برابری تکی اپنے شعراں بچ اوہ حقائق بالکل واضح ، صاف صاف بیان کیتے۔ اک ہور سوہنی غزل نے دو شعر:
| یاداں نے انبھار وی آسن اکھیاں نیٖر غبار وی آسن کانگاں پانی گائے گائے چھماں نے شونکار وی آسن |
آزاد صاحب نی اک ہور پابند قافیے نی نہایت خوبصورت غزل نے دو شعر جیہڑے شعر شاعر نی معیاری نی ضمانت دینے ہین:
| ہک ہک تھیں چڑھند بیٹھے سرکار گراں اندر اج موت نے لگنے ہین آثار گراں اندر چیتر نی جھڑی لگسی ٹہہ پیسی ٹہاری وی رہ جاسن تلکن پٹگار گراں اندر |
استعارے، تشبیہات، رمز کنایہ شاعری نی جان ہونے ہین، شیخ آزاد صاحب نے غزلاں بچ جو علامتاں برتیاں ہین اوہ اُنہاں نی فنکاری کی شاہکاری نا ثبوت ہے۔ ایہجا مقام کہٹ شاعراں کی نصیب ہونا ہے۔ آزاد قافیے نی غزل نے کجھ شعر ملاحظہ فرماؤ:
| ہنیرے چاننا چاہتاں نی دنیا امیداں خواہشاں ذاتاں دنیا اُدھر خونی لکیراں نے تقاضے اِدھر تڑفاٹ تہ ہوکاں نی دنیا کوکان روہڑ پئے دبکار اگاں عجب آزاد ایہہ سیکاں نی دنیا |
اک ہور خوبصورت غزل نے دو شعر:
| میگی کہہ لوڑ مُٹھیاں نی انہاں کی کہہ میں کرساں گا دِلے نے پھٹ کری روشن میں اگے ہور بدھساں گا اندھیرے بچ کسے چالی نہ بدھن ہور دنیا بچ کیچر توڑیں میں آساں نے دیئے بالی نہ ٹرساں گا |
بعض شاعر میں اپیجہے تکے ہین جیہڑے دوجے شاعراں نی زمیناں بچ لکھنے ہین۔ آزاد صاحب اوہ سچے تہ کھرے تخلیق کار ہین جہاں نے غزل نی زمی آپوں تیار کیتی، اپنا باغ آپوں لایا، شعر نے بوٹے کی خونے نال سگ لایا، ایہہ شعر نے بوٹے کہونفرے نہ جوان ہوئے، انہاں بوٹیاں نا پھل وی بڑا مٹھا تکیا۔ آزاد صاحب نا فنی اسلوب کسے نال میل نیہہ کھانا۔ اُنہاں نا نمکیلا رنگ ہے۔ پہاڑی تہ گوجری زبان بولن آلے سنجیدہ ادیب آزاد صاحب نے احسان مند ہین۔ مِکی آزاد صاحب فضنی ذات نال نہائت عقیدت ہے۔ آزاد صاحب ناقد ناصر کاظمی یا قیل شفائی تھوں کہٹ نیہہ۔ پہاڑی زبان بچ اہجے شعر آکھنے آسان گل نیہہ ، آزاد صاحب نے اوہ کم کیتا جس کم نے اپر پہاڑی قوم ہمیشاں ہمیشاں فخر کرسی۔ آخر بچ انہاں نی اک خوبصورت غزل نے کجھ شعراں نال اجازت چاہنا واں:
| مگی بیٹھے بٹھائے ایہہ کہہ ہو گیا درد ہو گئے سوائے ایہہ کہہ ہو گیا اُنہاں کولوں جیہڑے دل نے ٹھنڈیار سن ڈم کلیجے لوائے ایہہ کہہ ہو گیا کھیڑے دل بچ میں ڈائے جنہاں واسطے اوہ تہ مڑ کے نہ آئے ایہہ کہہ ہو گیا میں نہ آزادؔ ہاں توں میری گل نہ کر اُنہاں بہتے ستائے ایہہ کہہ ہو گیا |
| از: | ریاض صابر |