Back to: پہاڑی زبان و ادب کے نوٹس
نعت عربی زبان نا لفظ اے۔ لغت نے اعتبار نال نعت نے لغوی معنی تعریف کرنا یا صفت بیان کرنے نے ہین۔ فن شاعری بچ نعت اس صنف کی آکھیا جانا اے جس بچ شاعر یا لکھاری، پیغمبر آخر الزماں حضرت محمد صلی اللہ تعالی علیہ وسلم نے اوصاف تے کمالات کی بیان کرنا اے۔ اس سلسلے وچ شاعر جیہڑا وی لب و لہجہ اختیار کرنا اے اس تھیں مراد حضور اقدس صلی اللہ علیہ وسلم نی ذات گرامی ہی ہونی اے۔
نعت گوئی اک مشکل فن اے جس بچ بڑے احتیاط نی ضرورت پینی اے۔ اس وچ کہاٹے تے باہدے نی گنجائش بڑی کہٹ ہونی اے ۔شاعر کی اک محدود حد نے اندر رہنا پینا اے کیّاں کہ معمولی جئی غلطی نعت نگار کی بڑی مشکل بچ پھسائی سکنی اے۔ جس پاک ہستی(محمدﷺ) اُپر خدا وند کریم خود درود پھیجنا اے انسان نی کیا مجال اے کہ صحیح طریقے نال اس ذات نی تعریف تہ توصیف بیان کری سکے۔ اس گل توں پتہ چلنا اے کہ نعت گوئی اک مشکل فن ضرور اے لیکن اک بابرکت فن وی اے۔ اس برکت کی لٹنے واسطے ہر زبان و ادب نے لکھاریاں اس صنف بچ طبع آزمائی کیتی اے۔
نعت نگاری نے سلسلے وچ تاریخ تھیں پتہ چلنا اے کہ ایہہ اک قدیم صنف اے جس بچ مختلف زباناں نے صرف شاعراں ہی نیہہ بلکہ اپنے وقت نے بڑے بڑے عالماں، محدثاں تہ مفسراں اپنے اپنے مخصوص انداز نال حضور اکرم صلی اللہ علیہ وسلم نی شان وچ عقیدت نے نظرانے پیش کیتے ہین۔ اس سلسلے بچ عربی زبان نے اک مشہور شاعر حسان بن ثابت ہوراں نے نعتیہ اشعار بڑے ہی مشہور ہین:
| واحسن منک لم ترقط عینی ِِ واجمل منک لم تلد النساءِِ خلقت مبرءاََ من کل عیب کاَنک قد خلقت کما تشاءِِ |
پہاڑی ترجمہ:
| نبی کریم ﷺ تھیں متا سوہنا ماہڑی اکھاں اج تکر کوئے نی دیکھیا ہور نبی کریم ﷺ تھیں متا خوبصورت کسے عورت پیدا ہی نیہہ کیتا نبی کریم ﷺ ہر عیب تھیں پاک وصاف پیدا کیتے گئے ہین گویا کہ نبی کریم ﷺ جسراں چاہنے سن، اللہ عزو جل نے اسے طراں انہاں کی پیدا کیتا اے |
عربی تھیں بعد فارسی ادب بچ وی بہوں سارے شاعراں نعتیہ کلام لکھے ہین ہور ادبی حلقیاں بچ متی ساری پذیرائی حاصل کیتی اے۔ فارسی نے مشہور نعت گو شاعراں وچ حافظ شیرازی، سعدی، مولانا رومی وغیرہ نا نعتیہ کلام بڑا مشہور اے۔ اردو زبان بچ وی نعتیہ شاعری نا اک بڑا ذخیرہ لبنا اے۔ اردو وچ نعت نگاری نے حوالے نال امیر مینائی، محسن کا کوروی ، امام احمد رضا خاں بریلوی ہوراں نا ناں قابل ذکر اے۔
انہاں زباناں نی دیکھا دیکھی پہاڑی زبان و ادب بچ وی نعت گوئی نا سلسلہ بہت پہلاں تھیں شروع ہویا لیکن باضابطہ طور اُپر نعتیہ کلام نے ثبوت اساں کی میاں محمد بخش ہوراں نی مثنوی ”سیف الملوک“ بچ لبنے ہین۔ میاں محمد بخش اپنی اس مثنوی وچ پہلاں خدا نی حمد بیان کیتی اے تے اس تھیں بعد نبی اکرم صلی اللہ علیہ وسلم نی ذات گرامی اُپر نعتیہ شعر پیش کیتے ہین جنہاں نی تعداد لگ بھگ پنجی (25) توں پینتری(35) اے۔ انہاں توں بعد پہاڑی زبان نے بہوں سارے لکھاری جنہاں بچ سائیں فقر دین، سائیں قادر بخش، پیر محمد شاہ پونچھی، زمان چن، پیر حیدر شاہ، سید باغ حسین شاہ، سید برکت شاہ، اسرائیل اثر، اسرائیل مہجور وغیرہ مشہور ہین جنہاں نے کلام وی اس روایت نی نشاندہی کرنے ہین۔
جدید دور وچ پہاڑی نعتاں لکھنے آلیاں نی اک بڑی تعداد اس ویلے پیر پنچال بچ وی اے تہ کیرن، کرناہ، بارہمولہ، کپوارہ ، شوپیان بچ وی۔ قدیم تہ جدید شاعر اس بچ برابر نے حصے دار ہین۔ شیخ آزاد احمد آزاد ہوراں نی اک مشہور نعت نے کجھ اشعار ملاحظہ کریو:
| تس اللہ نے دلدار نبی ﷺ میں صدقے جاں لکھوار نبیﷺ نہ آنے تس جے عالم بچ دنیا نے نظارے نہ ہونے نہ حج ہونا نہ نمازاں ہی قرآن نے پارے نہ ہونے امت نے غم خوار نبی ﷺ میں صدقے جاں لکھوا بنی ﷺ نہ عرش نی کوئے گل ہونی نہ فرش بچھایا جانا سا سی رب نی مرضی دنیا ور کعبے کی سجایا جانا سا دو عالم نے مختار نبی ﷺ میں صدقے جاں لکھوار نبی ﷺ (شیخ آزاد احمد آزاد) |
کئی واری ایسا وی ہونا اے کہ نعت بچ شاعر نبی اکرم صلی اللہ علیہ وسلم نے روزہ مبارک نی تعریف وچ وی شعر تخلیق کرنا اے جسراں کہ امتیاز نسیم ہاشمی ہور اپنی اس نعت وچ فرمانے ہین:
| مدینے نا سفر ہوسی مدینے نی گلی ہوسی اوہ سوہنا گنبد خضریٰ تہ اکھ ماہڑی کھلی ہوئی میں عاصی ہاں رسول اللہ بڑا ہی سخت عاصی ہاں تساہڑا سامنا ہوسی تہ محشر نی گھڑی ہوسی میں دیوے بالساں اکھ نے اُتھے جائی تہ روضے ور جیہڑا وی اتھروں ٹہسی تہ موتی نی لڑی ہوسی میں اک ڈریا ہویا مجرم کٹہرے بچ کھلا ہوساں ایہہ دیدے اس قدر روسن کہ ساون نی چہڑی ہوسی نسیماںؔ میں در احمد نی اکے آس رکھی وی کتھے نورانی گلیاں تہ کتھے قسمت سڑی ہوسی (امتیاز نسیم ہاشمی) |
اسے طراں رشید قمر ہور جدوں نعت شریف نے اشعار لئی رسالت مآب صلی اللہ علیہ وسلم بچ پیش کرنے ہین تہ گویا اک کیفیت کی جنم دینے ہین تہ اپنی عقیدت نا نظرانہ خوبصورت پیرائے وچ اس طرح پیش کرنے ہین:
| سیاہ سحرا نے اندر حق نے دیّے بالنے والا اوہ سچ نے رستیاں وچوں کالے کنڈے تالنے والا حرف بہ حرف سیٖنے بچ سمہالی رکھیا جس نے اوہ قرآن مجسم ، آیتاں کی پالنے والا شعوری طور جد انسان شرکاں نا ہمالہ سی ہتّھاں نور دینہہ تۂری آیا اوہ برفاں گالنے والا (رشید قمر) |
ڈاکٹر مرزا فاروق انوار اک بصیرت نی دولت توں فیضیاب شخص ہین۔ انہاں شاعری وچ بکھ بکھ صنفاں اپر طبع آزمائی کیتی اے اور نال ہی نعتیہ اشعار وی تخلیق کیتے ہین۔ انہاں نی اک نعت نے کجھ اشعار ملاحظہ کرو:
| حرا نے جس نور مبیں نال روشن دن رات نالے مہ و سال روشن انسانیت نے خدو خال روشن ماضی پُہلایا ہویا حال روشن ایہہ سب کجھ محمد نے دم نال اے حاصل خلاصی ہوئی کالسریاں کی حاصل مِٹیا بہر حال دنیا تھیں باطل شرمنده اپنے ہی کیتے ور قاتل نہ شاہ رہیا کوئی نہ کوئی واتل ایہہ سب کجھ محمد نے دم نال اے حاصل (فاروق انوار مرزا) |
اسے طراں ہور وی بہت سارے ناں ہین جنہاں پہاڑی زبان وچ اپنے نعتیہ کلام کی پیش کری فروغ دتا اے جنہاں بچ میاں کریم اللہ قریشی، مقبول ساحل، پرویز مانوس، شہباز راجوروی، فدا راجوری ، خورشید بسمل، مستور احمد شاد، محمد زمان اختر میر پوری، مولوی غلام رسول، سید امجد حسین کاظمی، حافظ محمد حسین فاقر، عبدالمجید حسرت، دانش اشفاق، حاجی فیروز الدین بیگ، نعیم کرناہی، محمد خورشید منور، عنایت اللہ خان براہی، ملک ذاکر ہاکی، محمد سرور ریحان، محمد شفیع خان صابر ، محمد امین قمر، مولوی محمد خلیل جوہر وغیرہ نے ناں قابل ذکر ہین۔ انہاں سارے شاعران نعت گوئی نی صنف کی فروغ بخشیا اے۔ اج نے دور بچ پہاڑی ادب اس قابل ہوئی گیا اے کہ صنف نعت نا اک اچھا خاصا ذخیرہ موجود اے۔ کلچر اکیڈمی نے پہاڑی شعبے نی بدولت بہت سارے شیرازیاں بچ وی بکھ بکھ شاعراں نیاں نعتاں وقتاً فوقتاً چھپیاں رہنیاں ہین اور کلچرل اکیڈمی تھیں باقاعدہ اک نعت نمبر وی شائع ہوئی منظر عام اُپر آئی گیا اے۔ اس ساری صورتحال کی مد نظر رکھی اس آکھی سکنے ہاں کہ پہاڑی وچ صنف نعت اپر کافی اچھا کم ہو رہیا اے جس کی دیکھی پہاڑی نعتیہ شاعری نا مستقبل روشن نظر اچھنا اے۔
| تحریر | ڈاکٹر ساجد منیر شعبۂ پہاڑی بابا غلام شاہ بادشاہ یونیورسٹی راجوری |