Back to: پہاڑی زبان و ادب کے نوٹس
خطۂ پیر پنچال نی تہرتی نال تعلق رکھنے آلی اک قابلِ فخر تہ مشہور شخصیت ڈاکٹر مسعود چودھری ہورکسے تعارف نے محتاج نیہں۔ انہاں نی پیدائش تحصیل مینڈر نے گراں کالا بن بچ 10 مارچ 1944ء وچ بابو فیض احمد نے کَہر ہوئی۔ پچپن توں ہی چودھری صاحب نی زندگی بچ اک بڑی شخصیت نے نین نقوش نظر اچھنے سَن۔ اسے وجہ توں اعلیٰ تعلیم حاصل کرنے تھیں بعد اپنی قوم نی سیاسی ، سماجی ہور تعلیمی خدمتاں واسطے اپنی زندگی کی وقف کری چھوڑیا، جس نی وجہ نال انہاں کی”بابائے قوم“ نے خطاب توں نوازایا گیا۔
ڈاکٹر مسعود احمد چودھری ہوراں نی شخصیت ہور انہاں نے کارنامے واقعی قابلِ فخر ہین۔ انہاں اپنے علاقے پیر پنچال نی تعلیمی ہور سماجی بہتری واسطے نمایاں کردار ادا کیتا اے۔ انہاں نی قیادت بچ بابا غلام شاہ بادشاہ یونیورسٹی نا قیام اک سنگ میل نی حیثیت رکھنا اے، جیہڑا نہ صرف مقامی نوجواناں واسطے بلکہ پورے خطے واسطے اک امید نی کرن نی حیثیت رکھنی اے۔
ڈاکٹر مسعود چودھری نا “گجر دیش چیریٹیبل ٹرسٹ” نا قیام وی انہاں نی سماجی خدماتاں نی عکاسی کرنا اے۔ ایہہ ٹرسٹ گجر بکروال قبیلے نے لوکاں نے حقوق ہور تہذیب تہ ثقافت نی حفاظت واسطے اک اہم پلیٹ فارم دستیاب کرنا اے۔
ڈاکٹر مسعود چودھری ہوراں اپنی بلند نظری نی وجہ نال اس قبیلے نے مسائل کی سمجھیا ہور انہاں نے بہتر حل واسطے ہر ممکن تعاون دتا اے جیہڑا انہاں نی انسانی ہمدردی اور سماجی ذمہ داریاں نا منہ بولنا ثبوت اے۔
بابا غلام شاہ بادشاہ یونیورسٹی نا قیام اک بڑا چیلنج سا، خاص طور ور اس علاقے بچ جتھے جتھے تعلیم نی کمی ہور معاشرتی مسائل بڑے پیمانے ور موجود سَن ور ڈاکٹر مسعود ہوراں نی محنت، مشقت، لگن، عزم ہور بڑے وژن نے اس خاب کی حقیقت بِچ بدلی چھوڑیا۔ ہُن اَس دیکھنے ہاں کہ اس یونیورسٹی نہ صرف مقامی لوکاں کی تعلیم نے زیور تو آراستہ کیتا اے بلکہ اِتھوں نے لوکاں بچ شعور نی بیدار وی پیدا کیتی اے جس نی وجہ نال لوکاں کی اگے بڑھنے نا موقع وی نصیب ہویا اے ہور ترقی نے نوے نوے راہ کُھلی گئے ہین۔
ڈاکٹر صاحب ہوراں نیاں خدماتاں نا اثر آج وی محسوس کیتا جانا اے ہور یونیورسٹی نا ہر دوّا شخص انہاں نی مغفرت واسطے دعا کرنا نظر اچھنا اے۔چودھری صاحب اک ایہجی شخصیت سَن جنہاں نہ صرف اپنے علاقے نی تقدیر سنواری اے بلکہ علم و ادب نے میدان بچ وی نمایاں مقام حاصل کیتا اے۔ ڈاکٹر مسعود احمد چودھری ہوراں نا ناں ہمیشہ انہاں نی سماجی خدماتاں ہور قربانیاں نے نال جڑیا رہسی ہور انہاں نی کوششاں آنے آلیاں نسلاں واسطے وی لَو آلا دِیا ثابت ہوسی۔
| تحریر | ڈاکٹر ساجد منیر،شعبۂ اُردو بابا غلام شاہ بادشاہ یونیورسٹی راجوری جموں وکشمیر |