Back to: پہاڑی زبان و ادب کے نوٹس
پہاڑی زبان بچ عرصہ دراز تھیں کجھ اصناف سخن استعمال ہوندیاں آیاں ہین، جنہاں بچوں باقی زباناں دی طراں پہاڑی زبان بچ غزل ہک اہم تہ ہر دلعزیز صنف ہے، جس پر شعراء حضرات زیادہ طبع آزمائی کردے ہین۔ سخن شناس تہ سخن سنج حضرات غزل کو ہی زیادہ ترجیح دیندے ہین۔ پہاڑی غزل کو اسیں دواں زمریاں بچ تقسیم کر سکدے ہاں۔ غزل قدیم تہ غزل جدید۔
غزل قدیم:
غزل قدیم بچ اوہ غزلاں شامل ہین جیہڑیاں 1979ء یعنی کلچرل اکیڈیمی بچ پہاڑی شعبہ قائم ہون تھیں پہلیاں لکھے گیأں ہین ، انہاں دی تعداد کافی کہٹ ہے۔ وجہ اسدی ایو ہو سکدی ہے جے اس دور بچ غزل شناس شعراء زیادہ گزرے ہین۔ جیہڑے غزل گوئی دار کافی کۂٹ تہھیان دیندے سن۔
غزل جدید:
ایہہ غزل دی دُوی قسم ہے۔ ایہہ 1979ء تھیں پچھے شروع ہوندی ہے۔ پہاڑی غزل دا ایہہ دور میں اساں دی بحث دا موضوع ہے۔ اس دور بچ پہاڑی غزل محدود عرصہ بچ ہک لمی مسافت طے کیتی۔ اس لمی مسافت دے دوران پہاڑی غزل بچ کجھ خاص تہ اہم تبدیلیاں رونما ہوئیاں۔ کیأں جے قدیم دور دے برعکس اس دور بچ غزل گو شعراء زیادہ تہ غزل شناس شعراء کۂٹ پیدا ہوئے تہ پہاڑی غزل دے میدان بچ کجھ دانستہ تہ کجھ نا دانستہ طور نشیب و فراز سامنے آئے۔
لَر سارے شعراء اس صنف کو نا دانستہ طور ہک سہل تہ بازاری قسم دی صنف سمجھ کے اس پر تیز رفتاری نال خامہ فرسائی کرن لگے تہ کجھ دانستہ طور اسدیاں پیچیدگیاں تہ اہمیتاں کو سمجھدیاں ہویاں اس مدان بچ قدم پھوک پھوک کے تہردیاں دوڑن نیہہ بلکہ کۂھیسٹی دین لگے۔ اول الذکر شعرا دا حشر ایہہ ہویا جے
| دو قدم چلے فر بچھڑ گئے کوئی یہاں گرا ، کوئی وہاں گرا |
دے مصداق گمنائی دے عالم بچ اپنا ناں نشان چھوڑے بغیر روپوش ہو گئے۔ آخر الذکر قسم دے شعراءض کچھوے دی چال چلدیاں ہویاں منزل مقصود دار گامزن دسدے ہین۔ لگدا ہے جے انشاء اللہ ایہہ اپنی منزل کو حاصل کرن بچ کامیاب ہو جاسن۔ آؤ دیکھنیاں جے پچھلیاں تریاں سالاں بچ خرگوش نما تہ کچھوا نما شعرا دی چال دے نتیجہ بچ پہاڑی غزل سن کس حد ترقی کیتی۔ کیتی وی یا فر ایہہ ہکی جائی پرکار ہاروں اپنے ہی دائرے بچ فردی ہے۔ آؤ پرکھاں۔ دویاں صنفاں دی طراں پہاڑی غزل سن وی دو رُخی سفر اختیار کیتا تہ اس دوران پہاڑی غزل گو شعرا سن جیہڑے کارنامے حاصل کیتے ، اُنہاں کو دی اسیں دواں حصیاں بچ تقسیم کر ساں۔ مقداری کارنامے تہ معیاری کارنامے۔
مقداری کارنامے (Quantitative Achievements)
اس مدان بچ پہاڑی غزل سن کافی ترقی کیتی۔ موٹا موٹا جائزہ کہندیاں ہویاں اساں کول مندرجہ ذیل کتاباں سامنے آیاں جنہاں بچ غزلاں دا ہک خاصہ ذخیرہ چھپ کے سامنے آیا۔ اسدے وی دو حصے ہین، ہک اوہ مطبوعات جیہڑیاں اکیڈیمی دے ذریعے چپھیاں۔ دویاں اوہ جیہڑیاں شعراء حضرات سُن اپنے طور چھپوائیاں۔
کلچرل اکادمی دے ذریعے چھپنے آلا رسالہ شیرازه بعض دو ماہی تہ بعض سہ ماہی چھپدا ہے۔ اسیں فرض کرساں جے رسالہ دے سال بچ چار جلد چھپنے ہین۔ ہر جلد بچ اوسطاً ۱۵ غزلاں چھپدیاں ہین۔ اسطرح سالانہ 60 غزلاں شیرازیاں بچ چھپدیاں ہین۔ اس حساب ۳۰ برساں بچ ۱۸۰۰ غزلاں 1979ء تھیں کہنی کے 2006ء تِکر چھپ کے منظر عام پر آیاں۔ استھیں علاوہ جیہڑے شعری مجموعے شاعر حضرات سُن اپنے طور شائع کیتے انہاں دی تفصیل حسب ذیل ہے:
- نمبر شمار کتاب دا ناں مصنف دا ناں
- 1. پینگ میاں کریم اللہ قریشی
- 2. ڈنڈ کراں میں ستیاں ںسجناں کو ۔میاں کریم اللہ قریشی
- 3. چٹیاں دنداں دی ریت ۔۔۔۔۔۔میاں کریم اللہ قریشی
- 4. ڈوہنگے پۂیت، محمد شفیع صابر
- 5. چانن، ڈاکٹر مرزا فاروق انوار
- 6. گندل، محمد عظیم خان
- 7. آس ،حاجی فیروز الدین بیگ
- 8. بُک بُک تریہہ ۔۔۔۔۔
- 9. چٹکارا سید امتیاز نسیم ہاشمی
- 10. اگ نے پہامر، پرویز مانوس
- 11. کچا کوٹھا، محمد اقبال خان منجاکوٹی
- 12. کوسے اَتھروں ۔۔۔۔۔۔
- 13. گجھیاں رمزاں، مجروح ملنگامی
- 14. باغ بہاراں، ڈاکٹر صابر مرزا
- 15. رنگ رتاں گلزار ۔۔۔۔۔۔ ڈاکٹر صابر مرزا
- 16. شیشے نیاں کنداں، شیخ آزاد احمد آزاد
- 17. اگ المبے ۔۔۔شیخ آزاد احمد آزاد
- 18. ڈہلدے اتھروں، مشکور احمد شاد
- 19. گلشن منصور میر عالم منصور
- 20. خاب سولّے شاہباز راجوری
- 21. پھلواڑی، اقبال نسیم
- 22. پھلاں دی چہنگیر ،لعل الدین مظلوم
- 23. گلزار مظلوم ۔۔۔۔۔
انہاں کتاباں بچ وی کم و بیش ۳۰ غزلاں شائع ہویاں ۔ اسطرح پچھلیاں تریہاں برساں بچ شائع شدہ غزلاں دی مجموعی تعداد ۲۱۰۰ دے آس پاس دسدی ہے۔ ایہہ مقدار پہاڑی جہیی نوزائیدہ تہ قدرے غریب زبان واسطے فخر دی گل تہ حوصلہ افزاء رحجان ہے۔ اس شاندار مقداری کارنامے واسطے پہاڑی شعراء شابا تہ تھپکی دے حقدار ہیں۔
معاری کارنامے(Qualitative Achievements)
غزل دا معیار، مقدار دی نسبت ہک اہم نکتہ ہے، جس پر تفصیلاً بحث کرن دی لوڑ ہے جسراں کہ ہر شاعر کو بخوبی خبر ہے کہ قارئین حضرات وی جاندے ہین جے غزل ہک اہم تہ منفرد صنف ہے جسدے موٹے موٹے نکات اس طراں ہیں:
1. غزل دے اشعار دی تعداد 5 تھیں کہِن کے یاراں تونی ہوندی ہے۔ جے ہکسی ردیف قافیہ بچ یاراں تھیں زیادہ اشعار ہوون۔ تاں ایہہ دو غزلہ یا سہ غزلہ بچ منقسم ہو سکدی ہے۔
2. غزل دے پہلے دو مصرعے ہم قافیہ ہوندے ہین جس کو مطلع آکھدے ہین۔
3. غزل دے آخری شعر بچ شاعر اپنا تخلص استعمال کردا ہے اس کو مقطع آکھدے ہین۔
4. غزل دے مضمون ہر شعر بچ بَکھ بَکھ ہوندے ہین۔
5. غزل دی بحر عروض دے اصولاں دے عین مطابق ہوندی ہے۔
جس غزل بچ ایہہ ساریاں صفتاں موجود ہون اوہ معیاری غزل آکھواندی ہے۔ ایہہ موٹیاں موٹیاں صفتاں ہین جنہاں دے ذریعے اسیں کسے غزل کو معیاری یا اسدے بر عکس آکھ سکدے ہاں، جس ویلے ایہہ کسوٹی کہِن کے اسیں پہاڑی غزلاں کو پرکھدے ہاں۔ اساں کو بہت کۂٹ غزلاں معیاری لبھدیاں ہین۔ اساں دا سر غزلاں دے مقداری کارنامے دکھ کے جس قدر اُچا ہویا۔ اُنہاں دا معیار پرکھ کے استھیں زیادہ نیواں ہوندا ہے تہ اسیں Negative Marking کرن پر مجبور ہو جلدے ہاں۔ میں نہایت افسوس نال اس حقیقت دا راز افشا کردا ہاں جے پوری طراں معیاری غزل تلاش کرن بچ میں ناکام رہیاں۔ میں حسب ذیل مثالاں اُنہاں غزلاں بچوں چُن کے پیش کر داہاں جیہڑیاں پوری طراں معیاری تہ نیہہ پر اُنہاں دے کجھ اشعار معیاری ہون دی وجہ نال اوہ وی معیاری زمرے بچ مجبوراً ان پھسدیاں ہیں:
حوالہ شعر
استا ادب 1981ء شیشے تے مکان پر کوئی مٹی لپائی چھوڑو
راه چلنی شرارت تھیں سب پتھر چھپائی چھوڑو
شیرازه 1988ءجلد 10 شماره 3 نظر ہوئی پتھر تہ دل جان پھر
ہو یا اج نی دنیا نا انسان پھر
شیرازه 1990 جلد 12 شمارہ 4-5 اسنے بغیر عمر ایہہ گزرے تہ کسطراں
ساساں نے نال درد نا ہک واسطہ وی ہے
شیرازه 1992ءجلد 14 – شماره 3-4 شہر تہ پنگے پنگے اندر پہل پہلیکھے بدھنے رہسن
شہر توہاڑے نی گلیاں بچ ہک پردیسی پہھلنا رہسی
شیرازه 1993ء جلد 15 ، شمارہ 2 پیار نی تپش اسی یا ہچ کلیم نی
حقیر جیا اوہ مشت پر عقاب کس کیتا
شیرازہ 1993ء جلد 15، – شماره 2 سِدھے منہہ اج گل نیہہ کر دے
جیہڑے ہتھوں پالے لوگ
معیاری پسماندگی وجوہات
ماہڑیاں نظراں بچ پہاڑی غزل معیاری گراوٹ دا شکار نیہہ بلکہ معیاری پسماندگی دا شکار ہے۔ جے پہاڑی شعراء خصوصاً غزل گو شعراء عدیم الفرصت ہون دی وجہ نال غزل گوئی نال مناسب انصاف نیہہ کر سکدے۔ اس سلسلے بچ پہاڑی شعراء کو میں مشورہ دیساں جے اوہ اپنے دستیاب وقت کو مناسب طور تقسیم کر کے غزل گوئی واسطے اس دا صحیح حصہ مختص رکھن تہ فر اسدا صحیح استعمال کر کے اس صنف کو دن بدن چار چن لان دی حتی الامکان کوشش کرن۔ اس طراں انشاء اللہ پہاڑی غزل ضرور ترقی دار چھالاں مار دی دِس تہ جلدی مطلوبہ معیاری حد کو چھوسی۔
دوی بڑی وجہ جسدا شکار پہاڑی غزل بڑی مندی طراں ہو رہی ہے اوہ ہے پہاڑی شعراء دی فنی ناواقفیت یا کہٹ واقفیت۔ اس گل تھیں ہر شاعر (جے اوہ سچ مچ شاعر ہے) واقف ہے۔ جے شاعری ہک فن ہے۔ اس دے کچھ لوازمات کچھ اصول ہین۔ انہاں اصولاں دی جانکاری ہر شاعر واسطے نہایت ضروری ہے۔ تاں جا کے ہک شاعر پہلاں کامیاب شاعر تہ فر غزل گو شاعر ثابت ہو سکدا ہے۔ اینویں تُک بندی دا شوق رکھنے آلے شاعر پہاویں اپنیاں ٹۂڈیاں گرم کرسن پر اوہ کسے صنف دی خدمت نیہہ کر سکسن۔
تری بڑی وجہ لسانیاتی نا واقفیت ہے۔ پہاڑی زبان بچ دویاں زباناں دے الفاظ بدرجہ اتم استعمال ہوندے ہین۔ کئاں جے پہاڑی کول ٹھیٹھ الفاظ دا ذخیرہ کافی کۂٹ ہے۔ اس واسطے ہک پہاڑی شاعر واسطے ایہہ نہایت ضروری ہے جے اوہ پہاڑی اندر مروجہ زباناں ہندی، عربی فارسی، سنسکرت، پنجابی انگریزی، کشمیری وغیرہ دے الفاظ دے معانی استعمال تہ اعراب تھیں خوب تہ پوری طراں واقف ہوون۔ وزن ، ردیف قافیہ تہ معانی دے لحاظ نال شعراں اندر مختلف جائیاں بَکھ بَکھ الفاظ دا استعمال کرنا پیندا ہے لہذا شاعر حضرات کو ہکس ہکس لفظ دے کئیں مترادفات دی لوڑ پیندی ہے۔ بقول فیض احمد فیض:
”بات صرف عرق ریزی کی ہے۔ پڑھنے والے کو اندازہ نہیں ہوتا کہ ہر لفظ پر کتنی محنت صرف کی گئی ہے اور کسی لفظ کے آخری انتخاب سے پہلے ذہن نے کتنے مترادفات رد کئے ہیں۔“ (صیلیں مرے دریچے پر، ص: 115)
قارئین آپ فیصلہ کر سکدے ہین جے پہاڑی زبان کول کتنے مترادفات موجود ہین۔ جنہاں کو اس رد کر کر کے لفظ دے آخری انتخاب دا فیصلہ کراں، لہذا پہاڑی شعراء کو ہر زبان دے مروجہ الفاظ دا ذخیرہ اپنے کول ہر ویلے موجود رکھنا نہایت ضروری ہے۔ تاں جا کے پہاڑی شاعری عموماً تہ پہاڑی غزل خصوصاً ترقی دے مختلف مراحل طے کر سکدی ہے تہ باقی ہمعصر زباناں دے مونڈیاں نال مونڈے جوڑ کے فخریہ انداز بچ درج کر سکدی ہے۔
| از قلم | محمد عظیم خان |