Back to: پہاڑی زبان و ادب کے نوٹس
پہاڑی افسانہ نگاری نی تاریخ وچ جہناں ادیباں نے اپنی فنی مہارت ہور مناسب اظہار نے نال اپنا مقام بنایا انہاں بچ نثار راہی بڑے نمایاں ہین۔ جموں و کشمیر نے تعلق رکھن الے افسانہ نگار نثار راہی خاص اہمیت نے حامل ہین نثار راہی خطہ پیر پنجال نے راجوری نے ایک گراں دھداسن نے بچ 1941 بچ پیدا ہوے
نثارراہی نا اصل نام نثار حسین اور راہی تخلص سیا نثار راہی پہاڑی زبان نے نال نال اردو زبان نے وی بڑے مشہور شاعر ،محقق، ادیب، مورخ ،مترجم ہور خطہ پیر پنجال نی جانی پہچانی علمی تہ ادبی شخصیت سُن۔
نثار راہی ہوراں ابتدائی تعلیم مڈل اسکول درہال توں حاصل کیتی اس توں بعد دسویں جماعت نا امتحان ہائی اسکول راجوری توں پاس کیتا 1958 بچ نثار راہی ہوراں نا ملازمت نا سلسلہ شروع ہویا لیکن انہاں ملازمت نے نال نال تعلیمی سلسلہ وی جاری رکھیا 1970 بچ انگریزی بچ ایم ۔اے نی ڈگری حاصل کیتی اسے طراں اپنا علمی تہ ادبی فریضہ انجام دین توں بعد 1999 بچ گورنمنٹ ہائیر سیکنڈری اسکول راجوری توں اکتالی سال ملازمت کرن توں بعد سبکدوش ہوے۔
ہور بالآخر سال 2023 بچ جموں وکشمیر خطہ پیر پنجال ہور بالخصوص پہاڑی زبان ور بے شمار احسانات کرن آلا افسانہ نگار،شاعر، ادیب، محقق اس دارِ فانی توں رحلت فرمائی دے مالک حقیقی نال جائی ملیا۔ انہاں نے انتقال توں بعد بالخصوص پہاڑی زبان وادب کی شدید کمی محسوس ہوئی۔
ایڈووکیٹ الطاف حسین جنجوعہ نے مرحوم کی یاد کرنیاں ایہہ گل اکھی کہ “نثار راہی صاحب اک گھنے سایہ دار ہور پھل دار درخت نی طراح سن۔ملنسار،خوش اخلاق،نرم مزاج، شائستگی، شگفتگی کوٹ کوٹ کے بھری وی سی پہاڑی زبان وادب بچ انہاں نی خدمات ناقابل فراموش ہین جس وسطے پہاڑی قبیلہ ہمیشہ انہاں نامرہون منت رہیسی۔“
نثار راہی ہوراں ملازمت نے دوران وی اپنی لیاقت، قابلیت اور ذہنی صلاحیت کی سامنے رکھی دے علمی تے ادبی کام وی جاری رکھیا جہڑا اج اساڑی اکھاں نے سامنے جینا جاگنا ثبوت اے۔ اردو تو علاوہ اگر پہاڈی زبان ور گل کیتی جائے دے نثار راہی ہوراں نیاں بہت ساریاں تصانیف موجود ہین جہناں بچ انہاں نا اک افسانوی مجموعہ ”تہند“ جس وچ کُل فسانے تہ افسانچے کی ملائی دے انونجا (49) تعداد بنی اے اس افسانوی مجموعے وچ پہلا افسانہ (اگ) ہور اخری ا فسانہ( پسھلٹ )اے اس افسانوی مجموعے نی اشاعت2012 بچ ہوئی اس افسانوی مجموعے تہند کلچرل اکیڈمی نی طرفوں 2016 بچ سال 2012/13 نی بہترین کتاب نا ایوارڈ ملیا نثار راہی نے اس پہاڑی افسانوی مجموعے تہند بچ شامل افسانے ماروتی ہور غفلت ور اک جائزہ لین نی کوشش کرساں۔
اس افسانوی مجموعے وچ افسانہ ,,ماروتی ،،ناشمار افسانے ہور افسانچے نی ترتیب نے لحاظ نال سہولویں نمبر ور ہونا اے اس تو علاوہ ,,غفلت نا شمار اٹھارویں نمبر ور ہونا اے۔
افسانہ ,,ماروتی ،، وچ دو اہم کردار موجود ہین جنہاں نے ارد گرد پوری کہانی گھومنی اے اک کردار عابد جہڑا اس کہانی نہ مرکزی کردار نی حیثیت رکھنا اس تو علاوہ گُلہ نمبردار نا کردار اے جس نے اندر احساس نے بجائے ہوس غرور ہور بڑا پن صاف نظر انا اے۔ اس توں علاوہ وی صیغہ غائب نی صورت بچ عابد نیاں بہیناں نا ذکر اے جہڑیاں عابد نے چہرے اوپر بے بسی، مجبوری ہور ذمہ داری نہ بوجھ دیکھی دے عابد کی ہر مشکل گھڑی وچ اس کی احساس دلانیاں۔
اس افسانے وچ کھلتے ہوئے شگوفیاں نی مہک نہیہ اے بلکہ درد، تڑپ ،کرب اور ذمہ داری اے اس افسانے کی پڑھی دے اس بدصورتی نا احساس ہونا جہڑا اساڑے معاشرے نے اپنی لپیٹ وچ لیا واہ اے۔
افسانہ ”ماروتی،، بچ ایک شخص عابد جس نی عمر پنجی سال ہونی اے انسان نی ایہہ اوہ عمر ہونی اے جس وچ انسان اپنے سارے خرچ ماں ،پیو کولوں پورے کرنا لیکن کہر بچ سب تو بڑا ہونا ہور بالخصوص اگر کہر وچ غربت ہوے تہ اوہ انسان کی اپنے کہر نی عزت بنان، ہور ذمہ داریاں کی نبھان وسطے دنیاوی لالچاں بچ جکھڑی دے انسان کی سوچن اوپر مجبور کر چھوڑنی اس افسانے وچ وی افسانہ نگار نے اپنے معاشرے بچ پیش ان الی حقیقت کی بیان کیتا واہ اے۔
افسانہ نگار نے جس خوبصورتی نے نال زمہ داری کی بیان کیتا کہ ذمہ داری انسان نی عمر نہیہ دیکھنی، خوبصورتی نہیہ دیکھنی، بچپن یا عہد شباب نہیہ دیکھنی بس زمہ داری انسان کی سوچن اوپر مجبور کرنی اور ذمہ داری کی نبھان وسطے انسان کی جان نی بازی وی لانی پینی اے۔
افسانہ ماروتی بچو اک اقتباس تکیو جس بچ افسانہ نگار نے حقیقت بیان کیتی وی اے کہ
اک دن ِاس نا گماہنڈی اسنی نِکی پہئین نا رشتہ منگن آیا تہ اسنے شرط وی رکھی جے شادی تاں ہوسی جے پہلاں موٹر سائیکل داج بچ موجود ہوسی۔ شرط سخت سی اتنے پیسے کتھوں آنے ! ایہہ پہین نی شکل بچ کہر بیچ رکھیا ہویا قرض کس طراں اُتارے۔۔۔؟ اس کی بڑی بہین نے اپنے مایوس پہرا کی آکھیا ۔۔۔۔!بھیا جی تُسیں نہ کہبراؤ، انہاں لالچی درندیاں کی آکھو کہ میں شادی توں انکار ہو گئی ہاں تہ میں کہر بچ اک پہرا ہاروں تساں نے کم بچ مدد
کر ساں۔ تُساں کی کوئی پریشانی نہیں آن دیساں ۔ حوالہ نثار راہی نا افسانوی مجموعہ تہند نا افسانہ ماروتی ص 54.
اس افسانے بچ افسانہ نگار نے معاشرے بچ پیش ان الی حقیقت کی بیان کیتا کہ معاشرے بج لالچی لوکاں نی لالچ کس حد تک ہونی ہور اس نے نال نال افسانہ نگار نے بہن بھائی نے احساس، محبت ،اخلاق ہور پیار کی بڑی چابک دستی نے نال بیان کیتا جہڑا اس افسانے کی مزید عروج اوپر لئی جانا اے۔
اس تو علاوہ افسانہ نگار نے جس شدت نال ایہہ گل دسی کہ کسے مجبور نی مجبوری نا فائدہ اٹھان وسطے معاشرے نے جاگیردار لوک بالکل تیار رہنے جس نی زندہ مثال اس افسانے بچ گُلہ نمبردار نی اے جہڑا باٹھ سال نی عمر بچ وی اپنے اپ کی جوان قرار دسنا ہور مسئلے نے حل کرن نے بجائے مجبور کی تکی دے اس نی مجبوری نا فائدہ اٹھان نی کوشش کرنا۔
کہٹاں لفظاں وچ اَس ایہہ گل آکھ سکنے اں کہ اس افسانے نی زبان نہایت سادہ، اسان ،صاف ہور عام فہم اے کدرے وی مشکل لفظاں نا استعمال نہیہ ملنا فنی معیار نے حساب نال تکیا جائے دے مہاڈے حساب نال اس افسانے نال نثار راہی ہوراں انصاف نہیہ کیتا دو چار کرداراں نہ سہارا دئی دےاس کہانی کی مزید ہور دلچسپ بنایا جا سکنا سیا لیکن اس کہانی بچ معاشرے بچ ہون الی جہڑی سچائی بیان کیتی گئی اے اس تو انکار نہیہ کیتا جا سکنا ہور اس افسانے نے اندر گہرا ادراک اے جہڑا پڑھن الے کی غور و فکر نی دعوت دینا اے۔
“افسانہ “غفلت
افسانہ “غفلت،، نثار راہی نے افسانوی مجموعہ ,,تہند،، بچ اٹھارویں نمبر ور اے اس افسانے وچ ڈاکٹر جاوید نا کردار توں علاوہ ڈاکٹر جاوید نا اکلوتا پُتر ,,ریاض،، ہور فوجی نا کردار اے اس تو علاوہ صیغہ غائب نی صورت بچ ڈاکٹر جاوید نے دو دوست اک جہڑا منیا پڑمنیا ٹھیکیدار اے ہور دوا کروڑپتی سیاستدان اے۔
افسانہ نگار نے اس افسانے بچ بڑی ہنر مندی نے نال غفلت کی بیان کیتا اے کہ غفلت یعنی سستی، کاہلی انسان کی اُس مقام اوپر پنچا چھوڈنی کے بعدبچ انسان پچھتانا اہ وزاری کرنا، نالہ و فریاد کرنا لیکن اُس ویلےہتھ بچ کجھ نہیہ انا۔
اسے طراح اس افسانے بچ ڈاکٹر جاوید ماں، پیو نا کہلا پُتر سی بڑے لاڈ پیار نال پرورش ہوئی اللہ نے ذہنی لیاقت وی دتی وی سی یعنی ہر ناز و نعمت تو اللہ نے نواز واہ سی دوست وی امیر ترین سن لیکن اس نے نال نال شراب نے نشے نی اک ایسی لت لگی وی سی جہڑی کے اس نی ساری عزت بلکہ اپنے اک اکلوتے پتر ریاض تو وی محروم کری گئی اسے وسطے اسلام وچ نشے کی حرام قرار دتا گیا اے کیاں کہ جس ویلے انسان نشے نہ عادی ہوئی جانا اس کی کوئی سُدھ بدھ نہیہ رہنی نہ انسان کی ماں پیو نہ رشتہ نظر انا نہ انسان کی اپنی تہی ،بہن نے رشتے نے اندر جیڑی پاکیزگی ہونی نہ اوہ دسنی اس ویلے انسان اک غافل ہور جانور بن جانا اے۔
اس افسانے بچ افسانہ نگار نے بڑی تلخ حقیقت بیان کیتی اے کہ انسان جس ویلے نشے نہ استعمال کرن لگنا اس ویلے اس کی کسے چیز نا احساس نہیں رہنا جس طراح اس افسانے وچ ایک پیو جہڑا اک ڈاکٹر وی سی ہور اپنے ہی بیٹے نے ایکسیڈنٹ نی خبر سننے تو بعد وی اس کی کوئی احساس نہیہ ہویا کہ اک بندہ زندگی ہور موت نے درمیان جنگ لڑ رہیا اے ہور اس کی بچایا جائے لیکن اس نشے نے اُس کی اس حد تک غافل، بے خبر ہور جانور بنایا واہ سی کہ اس نے شہر کوئی خبر نہیہ سی ۔
اس افسانے نا اک اقتباس ملا خطہ فرمائیں ,, کولوں اک فوجی لنگھیا۔ اس نے لہو کی تک کے ترس کھادا۔ اوہ ڈاکٹر آلے پاسے دروڑ یا جے جاوید کی اس حادثے نی خبر دیاں تاں جے ایہہ بروقت علاج ہون نال بچ جائے۔ اس تہیاڑے ڈاکٹر کی جگان لئی متا سارا شور کیتا ، ور ڈاکٹر صاحب نہ جاگے ۔ فر پیت کھٹکھٹایا کہ ڈاکٹر صاحب اک حادثے نا شکار اک آدمی ہسپتال بچ مر رہیا ہے۔ بہلا بہلا اُٹھو تہ اسکی بچاؤ ۔ پر ڈاکٹر ہور آ جاں شراب نے نشے بیچ سن۔ اندروں بھڑ بھڑا کے بولے ” مرن دیو جیہڑا مرنا ہے ۔ فردوئی کروٹ لے کے سو گئے، کوئی دس بجے اُٹھے ، منہہ تہو کے ہسپتال پہنچے ، انہاں نی نظر او پریشن تھیٹر ور پی ہوئی اک لاش پر پی۔ اندر گئے ، منہہ
اپروں چٹا کپڑا چھنگیا … اوہ ریاض سی۔ ڈاکٹر زور زور نال رون لگا۔ ریاض .. ریاض اُٹھ میں تو اہڑا علاج کر ساں ۔ اُٹھ ریاض …. اوہ ریاض پر ریاض ہن لمی نیندر سیئی گیاسی ! حوالہ۔۔۔ افسانوی مجموعہ ص61
اس افسانے بچ فوجی نہ کردار اپنے اندر ایک انفرادی حیثیت رکھنا اے جس نے لہو کی دیکھ کے ترس کھادا ہور ریاض کی ہسپتال تک پہنچایا ہور اپنے اندر انسانیت نے پیکر کی اجاگر کیتا اس وچ افسانہ نگار نے اس گل توں وی باخبر کیتا کہ اک غافل حقیقی رشتے کولوں راہ لنگنیاں اوہ بندہ چنگا جس نے اندر غفلت نہیہ سی ہور اجے نشے توں پاک سی اک سکا باپ نشے نی حالت وچ اپنے پُتر کی کھوئی گیا اس کولوں راہ لنگنیاں اوہ بندہ چنگا جس زخمی شخص کی ہسپتال تک پہنچایا
کہٹاں لفظاں وچ اے گل اکھی جا سکنی اے کہ اس افسانے نا پلاٹ وی نہایت سادہ ،عام فہم ہور سلیس زبان وچ اے کدرے مشکل الفاظاں ہور جملیاں نا استعمال نہییہ کیتا گیا ہور اس افسانے بچ افسانہ نگار نے اک بڑی چنگی گل کیتی کہ انسان جس ویلے نشے ناعادی ہوئی جانا تہ اوہ ہر اُس رشتے کی کھوئی سکنا جہڑا اُس نی اوہ زندگی ہو سکنا اے ِکیاں کہ نشہ کرن الا بندہ غفلت نا شکار ہونا تہ اس کی نہ کھان نہ پتہ، نہ سون نا پتہ ، نہ گل کرن نا ڈھنگ،ہور نہ ہی کوئی احساس رہنا اسے وسطے اس افسانے بچ جہڑا سبق ملنا اے اوہ ایو اےکہ نشہ ہور غفلت انسان کی انسانیت توں حیوانیت تک پہنچا چھوڈنا۔
اسے وسطے انہاں دواں بیماریاں توں باز رہنا انسان وسطے ضروری اے اللہ نے انسان کی دماغ اسے وسطے دتا کہ اس نا صحیح استعمال کری دے اپنے اپ کی انسان ہور حیوان نا فرق تسلیم کرے افسانہ نگار نے اس افسانے بچ ایہہ گل واضح کر چھوڑی کے غفلت حقیقت بچ ساری بیماریاں نی کنجی اے غفلت نی وجہ توں ہی انسان حیوانیت نا راہ اختیار کر چھوڑنا۔
| تحریر | سہراب احمد قریشی شعبہ گوجری و پہاڑی، بابا غلام شاہ بادشاہ یونیورسٹی راجوری، جموں و کشمیر، انڈیا |