پہاڑی لوک ادب نا تعارف

تمہید:

لوک ادب کسے وی قوم یا علاقے نی زبانی روایتاں، کہانیاں، گیتاں، کہاوتاں، قصے، محاورے ہور زبانی روایتاں اُپر مشتمل ہونا اے جہڑا پیڑھی در پیڑھی آگے ٹُرنا۔ ایہہ ادب کسے اک فرد نا تخلیق ہویا نا نہیہ ہونا بلکہ ایہہ سبھاں لوکاں نی سوجھ بوجھ، تجربے تے روایتاں نا نچوڑ ہونا اے، جہڑا صدیاں تھیں لوکاں نی زندگی نا حصہ رہیا۔ لوک ادب صرف تفریح نا ذریعہ نہیہ بلکہ اے اک ثقافتی خزانہ وی اے جہڑا کسے قوم نی تاریخ، رہن سہن، رسم و رواج، مذہبی عقیدے تہ اخلاقی قدراں کی اپنے اندر سمیٹی رکھنا اے۔

اسے طراں پہاڑی لوک ادب اک خاص رنگ تے سوہنا انداز رکھنا اے، کیاں جے انہاں پہاڑیاں نی زندگی فطرت نے قریب ہونی اے۔ انہاں نے تجربے، مسئلے تہ خوشیاں عام شہری لوکاں تھوں وکھریاں ہونیاں ، انہاں نیاں کہانیاں، گیت ، روایتاں بکھ بکھ نظر آشنیاں ہین۔ پہاڑی علاقے نے لوک گیتاں وچ پیار، وچھوڑا، قدرت نی سوہنائی تہ دیہاتی زندگی نی سادگی نی چہلک نظر آشنی اے، جدوں کہ انہاں نیاں کہاوتاں تہ قصے زندگی نیاں تلخیاں، امیداں تہ دانائی نے بڑے بڑے سبق دسنے ہین۔ اسے طراں، لوک ادب نہ صرف اک ثقافتی ورثہ اے بلکہ ایہہ اک زندہ روایت اے جہڑا ہر دور وچ نوے رنگ وچ ڈھلنا رہنا اے۔

لوک ادب نی تعریف:

لوک ادب کی “عوامی ادب” یا “روایتی ادب” وی اکھیا جانا اے، کِیاں کہ ایہہ کسے اک بندے نی تخلیق نہیہ ہونا بلکہ ایہہ عوام نی اجتماعی سوجھ بوجھ، تجربے تہ ثقافتی ورثے نی عکاسی کرنا اے۔ ایہہ ادب کسے خاص دور یا خاص طبقے تک محدود نی ہونا، بلکہ پیڑھی در پیڑھی ودھنا رہنا اے۔ لوک ادب وچ کہانیاں، گیت، کہاوتاں، روایتاں تہ ہور زبانی خزانے ہونے ہین، جہڑے کسے قوم یا علاقے نی زندگی، سوچ تہ تہذیب نے بدلاون کی دسنا اے۔

انگریزی وچ اس کی Folk Literature آکھیا جانا اے، تہ اس نی کجھ ہور قسمہ کیں Oral Literature (زبانی ادب) یا Folklore (لوک کہانیاں تے روایتاں) نے ناں نال وی جانیا جانا اے۔ زبانی ادب اوہ ادب اے جہڑا لکھیا نہیہ جانا بلکہ سینہ بہ سینہ اگے ٹُرنا اے، جس طراں کہ فولکلور وچ کہانیاں نے نال نال لوک گیت، دیو مالائی قصے، رسم و رواج، توہمات، پہیلیاں تہ دیہاتی زندگی نال جڑی ہور روایتاں وی شامل ہونیاں ہین۔

ایہہ ادب عام طور ور تحریری شکل وچ محفوظ نہیہ ہونا بلکہ زبانی روایات بچ اک پیڑھی تھوں دوجی پیڑھی تک پُجنا اے۔ اے ای وجہ اے جہڑا بکھ بکھ علاقیاں وچ اک کہانی نے کئی بکھ بکھ انداز لبھنے ، کیاں کہ ہر راوی اپنی سمجھ، انداز تہ مقامی روایتاں نے مطابق کہانی وچ تھوڑا بہت بدلاؤ کری کننا اے۔ ایہہ زبانی روایتاں وقت نے نال نال بدلنیاں رہنیاں ، جِہناں نال لوک ادب ہمیشہ جُِڑنا تہ متحرک رہنا اے۔ اردو بچ لوک ادب نی تعریف کرنیاں ہویاں پروفیسر وہاب اشرفی ہور لکھنے ہین کہ:

”لوک ادب ہماری مرتب ، مہذب اور بہت حد تک مصنوعی نیز شہری زندگی کے مقابلے میں غیر مرتب، دہقانی اور فطری احساسات و جذبات کا آئینہ ہے۔ اس میں زندگی کا بہاؤ حقیقی سطح پر اس حد تک ملتا ہے کہ مصنوعی زیر و بم کا تموج ہماری آنکھوں سے دور ہی رہتا ہے کہہ سکتے ہیں کہ دہقانی کلچر کھرا ہوتا ہے اور دہقانی کلچر کا آئینہ خانہ لوک ادب ہے۔ لوگ ادب کی روایت ORAL ہے ، کم از کم اپنی ابتدائی شکل میں یہ ہی ہوتا ہے۔ یہ اور بات ہے کہ ایک عرصے کے بعد یہ ضبط تحریر میں آکر ہمارے عمومی ادب سے ہم رشتہ ہو جاتا ہے۔ لیکن یہ ایک عجیب بات ہے کہ لوک ادب کی اہمیت عام طور سے تسلیم نہیں کی جاتی یا اسے RUSTIC کہہ کے ٹال دیا جاتا ہے۔ حالانکہ عوام سے اس کا جو رشتہ ہے یا ہو سکتا ہے اس سے ہم بے خبر بھی نہیں۔ ہندوستان کی آبادی کا بہت بڑا حصہ دیہاتوں میں ہے ، شہر، ہزار بس جائیں لیکن اکثریت دیہاتوں اور دیہاتیوں کی ہی ہوگی ۔ اگر واقعی ہمیں دیہی زندگی، دیہی ثقافت سے کوئی دلچسپی ہے تو پھر ہمیں لوگ ادب کی اہمیت بھی تسلیم کرنی پڑے گی اور اس کی طرف بار بار رجوع کرنا پڑے گا۔“ (حوالہ اردو میں لوک ادب، مرتب: پروفیسر قمر رئیس ص: 34)

اسے طراں لوک ادب نی تعریف کرنیاں ہویاں پروفیسر محمد حسن نے ایہہ گل لکھی اے کہ:

”عوامی ادب سے مراد ہے وہ ادب جس کو عوام نے جنم دیا ہو۔ کوچہ و بازار میں ، قریے اور دیہات میں، کھیت کھلیان میں اور عام طور پر اس ادب کا جنم داتا کوئی ایک شخص نہیں ہوتا، پورا معاشرہ ہوتا ہے کبھی کبھی اس قسم کا ادب کسی ایک شخص سے منسوب بھی ہو گیا۔ بعدمیں تحقیق سے پتہ چلایا کہ یا تو تین ہی فرضی تھا یا پھر اس سے اس پورے کے پورے ادب کو منسوب کرنا غلط یا مشبہ تھا۔ فرد کے تصور میں بندھے ہوئے معاشرے کو اجتماعی تخلیق کا تصور خاصہ الجھن میں ڈالتا ہے کیونکہ فرد کے پیمانے ہی سے ساری تخلیقات ناپی تولی جانے لگتی ہیں اور فرد ہی ان پر ملکیت جتانے لگتا ہے جی ہاں، ملکیت کا یہ تصور ہر اس شے کو خاصہ بھیانک بنا دیتا ہے جو کسی ایک کی ملکیت نہ ہوتی حتیٰ کہ ہرنام کے ساتھ باپ کانام محلے،قصبے کا نام جوڑ نے والے بھی بھول جاتے ہیں کہ کچھ ہی زمانہ گزرا ہے جب فرد اپنی ماں کے نام سے پہچانا جاتا تھا۔ اور یہ بھی فراموش کر دیا جاتا ہے کہ دنیا میں اجنتا جیسے نہ جانے کتنے فن پارے ہیں جو کسی ایک فرد نے نہیں، پورے معاشرے نے بنائے ہیں۔ وہ کہانیاں جو نانی دادی بناتی ہیں وہ گیت جو جانے ان جانے آپ کے ہونٹ گنگنانے لگتے ہیں، وہ بول جنہیں آپ کچھ سمجھتے ہیں کچھ نہیں سمجھتے مگر کھیل کو د میں دہراتے ہیں ، یہ سب معاشرے کی دین ہیں اوران کا خالق کوئی ایک فرد نہیں ہے اور اگر ہے تو گم نام ہے۔“

(حوالہ: اردو میں لوک ادب، مرتب: پروفیسر قمر رئیس، ص: 24)

لوک ادب نے اجزا:

لوک ادب نے کئی اجزا ہونے جہناں بچوں کجھ اک درج ذیل ہین۔

1. لوک کہانیاں (Folk Tales)

اوہ کہانیاں جہڑیاں زبانی گل بات نی صورت بچ نسل در نسل آگے پُچھایئی جانیاں۔ انہاں وچ اکثر دیو مالائی گلاں، جادوئی واقعات تہ سبق سکھان والے پہلو شامل ہونے۔

2. لوک گیت (Folk Songs)

اوہ گیت ہونے جِہناں نال کسے خاص موقعے، تہوار، محبت، ہجرت یا کسے ہور جذباتی احساس کی بیان کیتا جانا اے۔ شادی بیاہ، فصلاں نی کٹائی، لیتری،جنگ یا قدرت نی سوہنری نے بیان عام موضوع ہونے ہین۔ پہاڑی علاقیاں بچ کڑیاں عام طور اُپر کھیتاں بچ کم کرنیاں یا کسے تقریب بچ خاص لوک گیت گانیاں ایہہ سب لوک گیت نے زمرے بچ اشنے۔

3. لوک داستانیں (Folk Legends)

اوہ قصے جیہڑے کسے خاص علاقے نی مشہور شخصیت، جنگجو، یا کسے تاریخی واقعے اُپر مبنی ہونے۔ پہاڑی علاقیاں بچ کئی مشہور داستاناں موجود ہین جیہڑیاں بہادری، وفاداری، ہور محبت نیاں کہانیاں اُپر مشتمل ہین۔

4. کہاوتاں ہور محاورے (Proverbs and Idioms)

معاشرتی تجربے نا نچوڑ جہڑا نکیاں نکیاں جملیاں بچ ہونا پہاڑی علاقیاں بچ اِجیاں کہاوتاں عام ہین جہڑیاں مقامی لوکاں نے تجربات نی عکاسی کرنییاں ہین۔

5. قصے ہور لطیفے (Anecdotes and Jokes)

عام لوکاں نے مزاج، انہاں نے مسائل، ہور انہاں نی روزمرہ زندگی نی عکاسی کرن آلے مزاحیہ یا سبق آموز قصے۔ پہاڑی علاقیاں نے لوک خوش مزاج ہونے ہور انہاں نے ہاں اجئے قصے عام لبھنے ہین جہناں بچ ہنسی مذاق نے نال کسے سماجی حقیقت نی طرف اشارہ ہونا اے۔

6. مذہبی ہور روحانی کہانیاں (Spiritual and Religious Narratives)

اوہ کہانیاں جیہڑیاں کسے صوفی، درویش، یا ولی نے معجزات ہور کرامات اپر مبنی ہونیاں ہین لوک ادب بچ اجِیاں کہانیاں بڑی اہمیت رکھنیاں ہین۔

7. جنّ بہوت ہور پریاں نیاں کہانیاں (Fairy Tales and Ghost Stories)

پہاڑی علاقیاں بچ رات نے وقت آگ نے کول بہیی دے بزرگ اکثر نوجواناں کی جن، چڑیل، ہور بکھ بکھ مخلوقات نیاں کہانیاں سنانے سُن۔

لوک ادب نے زوال نی وجہ:

1. اک وجہ ایہہ اے کہ پہلے لوک کہانیاں سننے سنانے سن، لوک گیت گانے ہور پہاڑی شاعری بچ دلچسپی رکھنے سُن، لیکن ہن موبائل، ٹی وی ہور انٹرنیٹ نی وجہ نال لوک ادب زوال نی وجہ بنی گیا۔

2. آساں نے اسکولاں بچ پہاڑی کہانیاں، گانے ہور روایتی شاعری نہیہ پڑھائی جانی، جس نی وجہ نال نوی نسل اس کی نی جاننیں۔

3. آج نے نوجوان پہاڑی زبان ہور کہانیاں کی پرانی چیز سمجھنے ، اس وسطے اوہ انہاں کی سننا یا سیکھنا نہیہ چاہنے۔

4. پہلے لوک شام چہولے آگے گہٹھے ہوئی دے کہانیاں سننے ،سنانے سُن لیکن ہن ہر کوئی مصروف ہوئی گیا ہور ایہہ روایت ختم ہو رئی اے۔

5 پہاڑی لوک کہانیاں ہور گیت زیادہ تر زبانی یاد رکھیے جانے سن، انہاں کی لکھیا نہیہ گیا، جس نی وجہ ایہہ بنی کہ وقت کے نال نال لوک اس کی پُہلیی گئے ۔

6۔ پہاڑی ادب کی بچان وسطے حکومت نے کوئی کام نہیہ کیتا۔ اگر اس اپر تحقیق کیتی جانی ہور کتاباں لکھیاں جانیاں، تہ لوک ادب آج لکھت نی شکل بچ آج اساں کول موجود وے اَ۔

مکنی گل conclusion

لوک ادب کسے وی قوم نی تہذیب، ثقافت ہور روایات نی پہچھان ہونا اے۔ ایہہ صرف تفریح نا ذریعہ نیہ بلکہ اس بچ حکمت، دانائی، تاریخ، ہور اخلاقیات نے اوہ قیمتی خزانے چُھپے نے ہونے جیہڑے نسل در نسل منتقل ہونے رہنے۔ خاص طور ور پہاڑی علاقیاں نا لوک ادب فطرت نے قریب ہون نی وجہ نال مزید دلچسپ، منفرد ہور دلکش ہونا اے۔

آج نے نوے دور بچ جتھے تیز رفتار زندگی نے روایتی ثقافتاں کی پچھے چھوڑی شوڑیا، اتھےلوک ادب کی بچائی رکھنا اساں نی ذمہ داری اے۔ اساں کی چاہینا کہ اپنے اس قیمتی ورثے کی کتابی شکل بچ دستاویز بندی کراں تاکہ ایہہ آن والیاں نسلاں وسطے محفوظ ہوئی جائے۔ اس نے نال نال نوے ذرائع جس طراں سوشل میڈیا، ویڈیوز، ، ہور ڈیجیٹل پلیٹ فارمز نا استعمال وی ضروری اے تاں جے نوی نسل اس ادب نال جُڑی رے ہور اس نی خوبصورتی کی محسوس کری سکے۔

اگر اَس اپنے لوک ادب کی بچان وسطے بروقت اقدامات نہ چاساں تہ ایہہ خزانہ وقت نے نال کہٹی جاسی ہور اساں نیاں آن الیاں نسلاں اپنی تہذیب ہور ثقافت نے اس اہم ورثے تھوں محروم ہوئی جاسن ۔ اس وسطے ضروری اے کہ اَس اپنی شناخت کی محفوظ رکھن وسطے لوک ادب کی زندہ رکھاں۔

تحریر

سہراب احمد قریشی