Back to: پہاڑی زبان و ادب کے نوٹس
اسم مشتق نی تعریف:
اردو زبان آروں پہاڑی زبان بچ وی لفظاں نی ساخت تہ اُنہاں کی بناوٹ کی خصوصی اہمیت حاصل اے۔ لفظاں نے اسے نظام بچ اسم مُشتق ہک نہایت اہم درجہ رکھنا اے۔ مشتق اس لفظ کی آکھیا جانا اے جیہڑا کسے لفظ نے اصل (مادّہ / مصدر ) تھیں بنیا ہونا اے ہور اپنے اندر نویں معنی پیدا کرنے نی صلاحیت رکھنا اے۔ دوّے لفظاں بچ اَس آکھی سکنے آں کہ اوہ لفظ جیہڑا کسے دوّے لفظ تھیں نکلی نویں معنی پیدا کرے، اسم مشتق اکھوانا اے۔مثال نے طور ور:
”دوڑ“ ہک لفظ اے اس تھیں بہوں سارے لفظ مشتق ہین جسراں : دوڑنا → دوڑائی → دوڑنے آلا وغیرہ
ایہہ سارے لفظ “دوڑ” نے اصل مادّے تھیں نکلے ہین، اسے واسطے مشتق حروف ہین۔
اسم مشتق نیاں پنج قسماں ہونیاں ہین۔
(١)اسم کیفیت یا حاصل مصدر (٢) اسم فاعل (٣) اسم مفعول (٤) اسم حالیہ (٥) اسم معاوضہ
(١) اسم کیفیت یا حاصل مصدر:
مصدر نے اثر ہور اس نی حالت یا کیفیت کی ظاہر کرنے آلے اسم مشتق کی حاصلِ مصدر آکھیا جانا اے۔ مثلاً: جلنا تھیں جلن
- تڑپنا تھیں تڑپ
- ملنا تھیں ملن
- دوڑنا تھیں دوڑ
- کھیلنا تھی کھیل وغیرہ
(۲) اسم فاعل:
اوہ اسم اے جیہڑا کسے مصدر تھیں نہ بنے ہور اُس بندے یا چیز کی ظاہر کرے جس کم اپنے اختیار یا بے اختیاری نال کیتا ہوئے۔ مثلأ : کھانےآلا، پڑھنے آلا ، لکھنے آلی، پکانے آلی ، لڑاکا ، سخن باز وغیرہ
(٣) اسم مفعول :
اوہ اسم مشتق اے جیہڑا اُس ذات ور دلالت کرے جس اُپر فعل یعنی کوئی کم واقع ہو۔ مثلاً: رکھیا ہویا، لکھیا ہویا، پیتا ہویا وغیرہ
(٤) اسم حالیہ :
اوہ اسم اے جیہڑا فاعل، مفعول یا کسے دوّے اسم نی حالت کی باندے آنے۔ مثلاً: تڑپنا ہویا ، کھڑا ہویا، ہسنا ہویا وغیرہ
(٥) اسم معاوضہ:
اوہ اسم اے جیہڑا کسے نی محنت یا خدمت نے طور ور دِتّا جائے۔ مثلاً: سلائی، دھلائی، سرمنڈھائی، پکوائی وغیرہ
| تحریر | ڈاکٹر ساجد منیر استاذ، شعبۂ پہاڑی بابا غلام شاہ بادشاہ یونیورسٹی راجوری |