Back to: پہاڑی زبان و ادب کے نوٹس
پہاڑی شعری ادب آغاز تہ ارتقا / جدید پہاڑی شاعری نا تاریخی پہلو
بہترین خیالاں کی بہترین لفظاں بچ بیان کرنے کی ادب آکھنے ہین۔ ادب دو زمریاں بچ تخلیق کیتا جانا اے، نثر تہ شاعری۔ نثر اُس تحریر کی آکھنے ہین جس بچ کوئی وی گل صاف طریقے نال آسان لفظاں بچ بیان کیتی جانی اے یعنی اس بچ کسے طراں نا ابہام نیہہ ہونا۔ اس نے مقابلے شاعری بچ اپنے خیالاں ، جذباتاں تہ احساساتاں کی بیان کرنے واسطے لفظاں کی موزوں کری لکھیا جانا اے ہور اشارے کنایے بچ گل کیتی جانی اے جس نے وجہ نال لوگ اس (شاعری) کی بہوں پسند کرنے ہین۔
دنیا نیاں ساریاں زباناں بچ ادب نی شروعات شاعری توں ہی ہوئی اے۔ اگر اس پہاڑی زبان و ادب نی گل کراں تہ پہاڑی وچ جیہڑی وی شعری صنف وجود بچ آئی اے اس نی شروعات اردو ادب تھیں ہوئی اے حالانکہ پہاڑی زبان نی تاریخ بہوں قدیم اے ہور راجہ اشوک نے زمانے نی ”شاردہ پیٹھ“ یونیورسٹی وچ جیہڑے مضمون پڑھائے جانے سن یا اس زمانے بچ مقبوضہ کشمیر نے پہاڑی علاقیاں وچ جیہڑے لوک رہنے سن اوہ پہاڑی زبان بولنے سن ہور انہاں نا رسم الخط پہاڑی لپی سا۔ اس زمانے بچ ہندو تہ بدھ مت نا مذہبی پرچار وی پہاڑی زبان وچ کیتا جانا سا۔ اسے وجہ نال اس زمانے کی پہاڑی زبان نی تاریخ نا سنہری دور آکھیا جانا اے۔
پہاڑی شاعری نی ابتدا کدوں ہوئی، اس گل واسطے تحقیق نی لوڑ اے۔ کیاں کہ اس گل نا حالیں تکر کوئی سراغ نیہہ لبنا کہ پہاڑی زبان نا پہلا شاعر کن اے؟ کس نی شاعری سنگ پہاڑی ادب نی شروعات ہوئی؟ ہور پہاڑی وچ کیہڑا شاعر پہلا صاحب دیوان اے؟ اس واسطے پہاڑی زبان اُپر تحقیق کرنے آلیاں نی ذمہ داری بننی اے کہ اوہ کلچرل اکیڈمی تو ہٹ کے ایہہ جاننے نی کوشش کرن کہ پہاڑی شاعری نی ابتدا کدوں ہوئی۔ لیکن اک گل صاف ظاہر اے کہ پہاڑی شاعری نی شروعات مذہبی رنگت، مذہبی واقعات تہ مذہبی عقیدیاں نال جڑی نی اے۔ اس سلسلے بچ سائیں قادر بحش نیاں سی حرفیاں تہ میاں محمّد بخش نی مثنوی سیف الملوک اہمیت نیاں حامل ہین۔ مثنوی سیف الملوک کی پہاڑی زبان و ادب ہور خاص طور پہاڑی شاعری نی تاریخ وچ بہوں اہمیت حاصل اے ہور اس کی پہاڑی ادب نی بائبل قرار دتا جانا اے۔ سیف الملوک بچ جیہڑی زبان استعمال کیتی گئی اے اس اپر پنجابی تہ اردو زبان نا اثر لبنا اے لیکن اوہ پہاڑی شاعری نی شروعات نا دور سا اس واسطے اساں کی نکیاں مٹیاں غلطیاں کی نظر انداز کرنا پیسی۔ اتھا ایہہ گل وی یاد رکھنی ضروری اے کہ راجہ اشوک نے زمانے تھیں انمیں بیمی صدی تکر پہاڑی تہذیب و ثقافت اپنے پہاڑی لوک ادب نے ذریعے اگے ٹرنا رہیا ہور پھر تقسیم ہند تکر جیہڑے پہاڑی شاعر اساں کی نظر اچھنے ہین اوہ کوئی پہاڑی نا پلیٹ فارم دستیاب نہ ہونے دی وجہ نال اردو زبان بچ اپنے خیالاں نا اظہار کرنے رہے یا پہاڑی وچ جیہڑی شاعری کرنے رے اس کی کتابی صورت نیہہ دے سکے جس نے وجہ تھیں اساں کول پہاڑی شاعری نا کوئی معتبر ذخیرہ اکھٹا نیہہ ہو سکیا۔
1978ء بچ ریاستی کلچرل اکیڈمی بچ پہاڑی شعبہ قائم کیتا گیا۔ اس شعبے نے کھلنے نال پہاڑی شاعراں بچ خوشی نی لہر پھیل گئی ہور اوہ سارے شاعر اکہٹھے ہوئے جیہڑے اپنے اپنے علاقیاں بچ سر چپھائی بیٹھے سن تہ غزلاں ، نظماں ، سی حرفیاں ہور گیت ، نعتاں وغیرہ لکھی اپنے کہراں نے طاقچیاں بچ چھپائی بیٹھے سن ہور وقت گزرنے نے نال اوہ کاغزی کیڑیاں نی خوراک بنی جانے سن۔ چنانچہ اس شعبے نی وجہ نال ایہہ ساریاں غزلاں ، نظماں ، سی حرفیاں ، گیت تہ نعتاں وغیرہ کتابی صورت بچ اساں نے سامنے آن لگیاں ہور پہاڑی شاعری کی اک بہترین پلیٹ فارم دستیاب ہویا۔ اتھوں تھیں جدید پہاڑی شاعری نی شروعات ہونی اے۔ 1978ء تھیں اس شعبے کم کرنا شروع کیتا ہور پہاڑی زبان نا پہلا رسالہ ”شیرازہ“ شائع ہویا اس رسالے بچ جموں کشمیر نے نمائندہ ادیباں تہ شاعراں نیاں پہاڑی تخلیقاں شامل کیتی گیئاں انہاں لکھاریاں بچ کریم اللہ قریشی، نور اللہ قریشی، راجہ نظر بونیاری ، غلام مصطفی پونچھی، اقبال عظیم ہور نثار راہی وغیرہ شامل ہین۔ ایہہ سارے لکھاری پہاڑی شعبے نے بنیاد گزار ہین۔ انہاں دوّے پہاڑی لکھاریاں کی اک راہ دہسی ہور اس تھیں بعد اس زبان بچ لکھنے آلیاں نی ہک لمّی فہرست اساں نے سامنے اچھنی اے جنہاں بکھ بکھ صنفاں نے ذریعے اس زبان کی فروغ دتا۔ پہاڑی شاعری کی فروغ دینے آلیاں بچ محمد عظیم خان، عبدالمجید مجاہد، نثار راہی، فدا راجوروی ، ڈاکٹر صابر مرزا، ڈاکٹر فاروق انوار مرزا، احمد دین انور، ڈاکٹر جہانگیر دانش، کریم اللہ قریشی، رشید قمر، نعیم کرناہی، لعل دین مظلوم ، فیر الدین بیگ، کے ڈی مینی، محمد شفیع خان، پرویز مانوس، شہباز راجوروی ، میر حیدر ندیم، پرویز ملک ، شفیق عارش، امتیاز نسیم ہاشمی ہور ڈاکٹر لیاقت نیر وغیرہ نے ناں قابل ذکر ہین۔ انہاں سارے شاعراں پہاڑی قبیلے نے مسائل نے نال نال عشقیہ تہ فطرت نے موضوعات کی اپنی شاعری بھی برتیا اے ہور انہاں نی شاعری پڑھی اساں نے اندر محبت، لگن تہ حوصلہ پیدا ہونا اے ہور قوم واسطے کجھ کرنے کا جذبہ بیدار ہونا اے۔ کلچرل اکیڈمی پہاڑی شاعری کی پروان چڑھانے واسطے بہوں بہترین کم کیتا اے ہور حالیں وی کر رہی اے۔ اج اس نے اس ترقی یافتہ دور بچ بہوں سارے پہاڑی شاعر کلچرل اکیڈمی تو علاوہ سوشل میڈیا نے ذریعے وی اپنی شاعری نی مدد نال پہاڑی زبان و ادب نے بادھے واسطے کم کر رہے ہین ہور امید کیتی جا سکنی اے کہ آنے آلا وقت پہاڑی ادب واسطے ، بالخصوص پہاڑی شاعری واسطے بہوں روشن ہوسی ہور لوک جوق درجوق آنی اپنی اس ماں بولی بچ شاعری کرسن۔
| تحریر: | ڈاکٹر ساجد منیر شعبۂ گوجری و پہاڑی بابا غلام شاہ بادشاہ یونیورسٹی راجوری جموں وکشمیر |