Back to: پہاڑی زبان و ادب کے نوٹس
انسان یعنی باوا آدم نی آل اولاد جس ویلے اس اِس تہرتی مائی زمین اُپر آباد ہوئی اس ویلے تھیں رسماں، رواجاں نا سلسلہ وی شروع ہویا یعنی جسطراں اِس تہرتی نے لوکاں اپنے کھانے پینے، تعلیم و تربیت نا بندوبست کیتا اسے نال نکیاں بڑیاں رسماں وی ادا ہونیاں رہیاں۔ بر صغیر ہند وپاک بچ بہوں ساریاں قوماں، قبیلے تہ فرقے آباد ہین اسے طراں پہاڑی زبان بولنے آلیاں نا وی ہک بڑا طبقہ آباد اے جیہڑے اپنی منفرد تہذیب ، ثقافت تہ بکھ بکھ رسماں رواجاں نی وجہ نال الگ پہچان رکھنے ہین۔ پہاڑی لوکاں نی شادی بیاہ نے موقعے اُپر بہوں ساری رسماں ادا کیتی جانیاں ہین جنہاں کی خوبصورت تہ رنگین بنانے واسطے بہوں سارے پہاڑی لوک گیت گائے جانے ہین۔
لوک گیت اوہ لکھیاں تحریراں ہین جیہڑیاں صدیاں تھیں سینے در سینے منتقل ہونیاں رہیاں۔ انہاں گیتاں وچ عوامی زبان بھرتی جانی اے اس واسطے انہاں کولوں ادبی بولی نی مانگ کرنا وی بہوں عجیب گل اے۔ البتہ لوک گیتاں وچ محاوریاں، کہاوتاں ، تشبیہاں تہ استعاریاں نا وی استعمال ہونا اے جنہاں نی وجہ نال زبان ترقی کرنی اے ہور ادبی زبان نا درجہ حاصل کری لینی اے۔ پہاڑی لوک گیتاں وچ موضوعات نی کوئی کمی نیہہ۔ پہاڑی زبان بچ لوک گیتاں زندگی نے ہر موڑ نی ترجمانی کیتی اے۔ اس مضمون بچ اَس شادی بیاہ نال جڑے نے لوک گیتاں نا کجھ تذکرہ کرساں۔
پہاڑی لوک شادی بیاہ نی رسماں کی بڑے جوش و خروش نال منانے ہین۔ بیاہ نا تہیاڑا مقرر کرنے نے نال ہی رسماں رواجاں نا سلسلہ وی شروع ہوئی جانا اے۔ کپڑے سیڑنے واسطے درزی کی سدھیا جانا اے تہ فر سارے رشتہ دار جمع ہونے ہین، سنگناں سہلیاں رلی ملی گیت بولنیاں ہین جس بج درزی نی تعریف ہونی اے تہ نالے بوہٹی تہ مراج نے وی گُن گائے جانے ہین۔ مثال نے طور ور:
| سوہنا جوڑا درزی بناوے بانکا مراج جوڑا لاوے شادی بیرے دی درزی چاء مشیناں آیا شوقاں نال جوڑا بنایا شادی بیرے دی |
لوک گیتاں بچ کنگھی کی ہک خاص مقام حاصل اے، مگر بیاہ آلے تہیارے کنگھی نا رنگ کجھ ہور ہی ہونا اے۔ اس تہیاڑے کنگھی کی خوب رنگ چڑھایا جانا اے۔ غم تہ خوشی نے ملے جلے ماحول وچ اتھروں تے ہاسیاں نے درمیان جدوں بوہٹی کی سنگناں سہلیاں کنگھی پھیرنی ہین تہ اس قسم نے گیت ماحول کی دلفریب بنا چھوڑنے ہین:
| ماہڑی کنگھی دا رنگ لال مُکو کنگھی نہ پھیرو ! ماہڑا بابل ہے مجبور ماہڑا بیٖر آسی ضرور مُکو کنگھی نہ پھرو ! ماہڑے بابل دا دل تھوڑا بابلا پیا سخت وچھوڑا ماہڑے کنگھی نہ پھیرو کنگھی دے دھندے لمبے تہ پتلے دل دی نگری ہو گئے گپلے پھریں آرامے نال کنگھیے سرے دیے |
مہندی نا ذکر ہر قوم قبیلے نی رسماں تہ شادی نے اندر موجود اے۔ اردو شاعری مہندی نے رنگ نال خوب رنگی نی اے مگر لوک گیتاں بچ مہندی نا رنگ اس تھیں وی سوہنا اے۔ خاص کر بیاہ آلے تہیاڑے نی مہندی زندگی نا ہک سنگ میل ہونی اے۔ ہر نوجوان نی ایہہ خواہش ہونی اے کہ اس نے ہتھاں اُپر مہندی لگے۔ ہور کُڑیاں جدوں اپنے کسے ہم عمر کی بددعا کڈھنیاں ہین تہ زیادہ تر ایہہ آکھنیاں ہین کہ ”خدا تی مہندی نہ نصیب کرے“ اس نا سدھا مطلب ایہہ ہویا کہ زندگی نی خوشیاں نا تعلق بیاہ نی مہندی نال جڑیا ہونا اے۔
بیاہ آلے کہر جس دن جنج ڈولی ہونی اے اُس تھیں پہلی والی راتی کی مہندی رات آکھیا جانا اے۔ رات نے آخری حصے بچ مہندی لانے نی رسم ادا کیتی جانی اے۔ اس ویلے سارے رشتہ دار کہٹھے ہونے ہین تہ بوہٹی یا مراجے کی مہندی لوائی جانی اے۔ بوہٹی یا مراجے نے قریبی رشتہ داراں بچوں کجھ کڑیاں کہٹھیاں ہو کے مہندی لوانیاں ہین۔ اس ویلے بوٹی یا مراجے کی کجھ پیسے وی دتّے جانے ہین۔ بوہٹی نے دلے نی کیفیت اس ویلے کے ہونی اے، لوگ گیت اس نی عکاسی اس طراں کرنے ہین:
| مہدی نہ لاندی میں اڈیو سوہرے نہ گیندی میں اڑیو ماہڑے بیرا بچھوڑا آیا ہُن جُلنے دا ویلا آیا |
مہندی نے اس گیت بچ صرف مہندی نی تعریف ہی نیہہ بلکہ رشتیاں نا ذکر بھی کیتا جانا اے مثلاً :
| مہندی دا رنگ پیلا جی توہڑا کاج رچیسی قبیلہ جی مہندی دا رنگ آماں جی توہڑا کاج رچیسی ماما جی |
اس تھیں علاوہ مراجا کی سجانے ویلے اس نیاں رشتہ دار کُڑیاں اُس نی خوبصورتی نی تعریف اس طراں گیتاں نی شکل وچ کرنیاں ہین:
| متھا جے توہڑا کہیجا سوہنا سہرے دی کے لوڑ مراجا نکیا او بینی تواڑی کہیجی سوہنی گانے دی کے لوڑ مراجا نکیا او |
مراجا نیاں پہناں خاص کر اس قسم نے بول سنائی اپنی خوشی نا اظہار کرنیاں ہین:
| شادی بیرے دی میں کھیڈاں ٹہولاں نال سنگناں سہیلیاں سب میں سدیاں خوشیاں مناساں انہاں نال شادی بیرے دی بیر مہاراج کپڑے لاوے پہناں باہون ہار شادی بیرے دی |
بیاہ نا سب تھیں نازک مرحلہ اوہ ہونا اے جدوں تہیی کی رخصت کیتا جانا اے۔ ماں پے بڑے لاڈا نال اپنی تہیی کی پال پوس کے جس ویلے کسے ہور نے حوالے کرنے ہین اوہ موقع بڑا ہی مشکل تہ جذبات آلا ہونا اے۔ اُس ویلے ماں پیو اپنی تہیی کی اس طراں دعا دینے ہین:
| جا حوالے رب دے ساڑیاں دعاواں تیرے نال وے نکل نکل تہیے انہاں بابلاں دیاں محلاں جُل گیاں تہیاں تے جُل گیاں ریلاں تہیاں پردیسناں کو جُلنا پیا |
اتھرواں نی آخری سوغات تہ دعاواں نال جدوں بوہٹی کی رنگ رنگیلی ڈولی بچ بٹھایا جانا اے تہ فر لوک گیتاں نا رخ وی ڈولی واخ مڑی جانا اے:
| ڈولی ماہڑی رنگ رنگیلی اُپر بیٹھا مور بابل اج نہ مگی ٹور بابل ڈک لے دو دن ہور بابل رونی رونی میں ٹُری چلی آں قدرت نے ہتھ ڈور بابل ڈک لے دو دن ہور بابل |
انہاں رسماں تھیں علاوہ وی ہور بہوں ساریاں رسماں پہاڑی لوکاں نی شادی بیاہ نے موقعے اُپر اپنائی جانیاں ہین جنہاں بچ ہور وی بہوں سارے پہاڑی لوک گیت بولے جانے ہین۔ مشہور و معروف رسماں بچ بیاہ تھیں پہلاں کجھ تہیاڑے مراجے کی ٹورنے نی رسم، مراج ہور اس نے دوستاں کی دودھ پلانے نی رسم، مراجے کی سرمہ لانے نی رسم، پانی پہرنے نی رسم، لکڑیاں آننے نی رسم، چول چھٹنے نی رسم وغیرہ۔ انہاں رسماں نی ادائیگی نے دوران وی بہوں سارے لوک گیت بولے جانے ہین مگر افسوس ناک گل ایہہ اے کہ جدید دور نے فیشن تہ جدید دور نی ہوا نے زور نال پتہ نیہہ اے گیت کڑے پاسے غائب ہو رہے ہین۔ اج کل بیاہ نے موقعے اپر صرف گیت ہی غائب نہیں ہو رہے بلکہ اساں پہاڑیاں اپنی تہذیب، ثقافت، تہ کلچر کی پلائی چھوڑیا اے۔ ایہہ نواں دور بے حیائی نا دور اے۔اساں نا مذہب اسلام وی اس گل نی اجازت نیہہ دینا کہ بے حیائی ہور بے پردگی کی رواج دیتا جائے اس واسطے اساں نی اعلیٰ تعلیم وی اس گل نا تقاضا کرنی اے کہ اَس با حیا رواں ہور اپنی تہذیب ، کلچر تہ ثقافت کی فروغ دیاں نہ کہ اسنیاں جڑاں کڈھ چھوڑاں۔
اج لوک گیتاں نی جگہ وی آہستہ اہستہ فلمی گانے بجن لگ گئے ہین۔ اج کل بیاہ نے موقے اُپر دکھیا جانا ہے کہ کجھ بڑی عمر نیاں عورتاں تھیں علاوہ کسے کی پہاڑی گیت اچھنے ہی نیہہ یا انہاں نال دلچسپی ہی نیہہ۔ اساں کی چاہنا اے کہ اِس لوک ورثے نی حفاظت کراں تاکہ اساں نی تہذیب ، ثقافت تہ کلچر نی شناخت قائم روے ہور اسکی آنے آلی قوم تکر منتقل کیتا جا سکے۔
| تحریر | ڈاکٹر ساجد منیر، استاذ، شعبۂ گوجری و پہاڑی بابا غلام شاہ بادشاہ یونیورسٹی رجوری |