Back to: پہاڑی زبان و ادب کے نوٹس
راجوری نی تہرتی کی اللہ عزوجل نے جتھے قدرتی حسن نال مالا مال کیتا اے اُٹھا ہی ادبی معیار نال وی ایہہ تہرتی بہوں ذرخیز اے۔ اس تہرتی اُپر بہوں ساریاں شاعراں ، ادیباں ، صحافیاں، دانشوراں تہ افسانہ نگاراں جنم لیا جہاں اس علاقے نی پہچان ہندوستان تہ پاکستان وچ کرائی اے۔ انہاں مشہور ہستیاں بچ اک ناں شہباز راجوروی ہوراں نا وی اے۔ شہباز راجوروی ہوراں نا اصلی ناں غلام نبی نائیک اے۔ ایہہ عبد السبحان نائیک ہوراں نے کہر 24 فروری 1940ء بچ راجوری تھنہ منڈی نے ای گراں بہروٹ بچ پیدا ہوئے۔ کہر نا ماحول بہوں چنگا سی تہ اچھی تعلیم حاصل کری محکمہ تعلیم بچ استاد نی حیثیت نال ملازمت اختیار کیتی ہور 1984 بچ اسے شعبے تھیں بحیثیت لیکچرار سبکدوش ہوئے۔
شہباز جوروی ہور بڑے ہی حلیم طبیعت نے مالک سن۔ انہاں کی اردو، پہاڑی، کشمیری ہور گوجری زباناں اُپر مکمل عبور حاصل سا۔ چناں چہ انہاں زباناں بچ شاعری کری انہاں اپنا ناں کمایا۔ شہباز رجوروی ہوراں شاعری نے نال نال نثر وچ وی طبع آزمائی کیتی اے لیکن انہاں نا ناں پہاڑی زبان و ادب بچ انہاں نی بے مثال شاعری نی وجہ توں مقبول ہے۔ پہاڑی شاعری وچ انہاں نا اک شعری مجموعہ ”خاب سولّے“ نے ناں سنگ منظر عام اُپر آیا اے۔ اس مجموعے نے مطالع توں انہاں نی زبان تہ اسلوب نا اندازہ لائی جا سکنا اے۔ شہباز صاحب بڑے عمدہ تخیل نے شاعر سن۔ انہاں نیاں غزلاں بچ طرزِ بیان نی شوخی ہر جگہ موجود اے۔ ایہہ طرزِ بیان انہاں نا امتیازی وصف اے۔ کجھ اشعار مثال نے طور ور پیشِ خدمت ہین، ملاحظہ کرو:
| اس موسم نے سوغات بڑی ہے اتھرواں نی برسات بڑی ہے شہراں بچ وی ڈر لگنا ہے جنگلاں نی اوقات بڑی ہے تھوڑی تہپ تہ کر ہاں ربّا تکی ٹھنڈی رات بڑی ہے رکّھیاں اکھیں دل پتھر ہین وقت نے ہتھ سوغات بڑی ہے لفظاں نی کنڈی ور چھیڑیاں شعراں نی اوقات بڑی ہے جینے ہاں شہباز ایہہ سوچی ہور وی کوئی ذات بڑی ہے |
انہاں شعراں وچ فن تہ تخیل نا بہترین امتزاج دکھنے وسطے لبنا اے۔ شہباز صاحب نیاں غزلاں بچ فلسفہ، پیغام ، تہ رمزیت سارا کجھ نظر آونا اے۔ اوہ غزل نے بڑے منے پڑمنے نے شاعر ہین۔ اس گل بچ کوئی شک نیہہ کہ شہباز رجوری ہوراں پہاڑی غزل کی عروج تہ ترقی دینے واسطے ہر ممکن کوشش کیتی اے۔ اے ہمہ جہت شخصیت نے مالک سن ہور خطہ پیر پنچال نیاں تقریباً ساریاں زباناں جاننے سن۔ جس نی وجہ نال انہاں دویاں زباناں نے ادب کی وی اچھے طریقے نال سمجھیا ہور پہاڑی زبان کی نویں نویں تجربے سنگ سرفراز کیتا۔ انہاں اپنی غزلاں بچ نویں تشبیہات و استعارات نا استعمال کری پہاڑی زبان نے ذخیرۂ الفاظ کی بڑھایا اے۔ ڈاکٹر لیاقت نیر ہور اپنے اک مضمون ”خطہ پیر پنچال بچ پہاڑی غزل نا ارتقا“ بچ شہباز رجوری ہوراں نے متعلق لکھنے ہین:
” پہاڑی غزل نے سب تھیں پہلے قافلے بچ ریاست جموں و کشمیر نے بزرگ شاعر تہ ہر دل عزیز شخصیت نے مالک جناب شہباز راجوروی ہور اعلیٰ مقام رکھنے ہین۔ شہباز راجوروی پہاڑی ادب تہ غزل نی رونق ہین۔ انہاں کی زبان تہ بیان ور قدرت حاصل ہے۔ انہاں نے بہوں شان و شوکت نال غزل آکھ کے اس محبوب صنف سخن کی اک وقار بخشیا ہے۔ انہاں نے اپنی فکر تہ فن نال بہوں متاثر کیتا ہے۔ شہباز راجوری ہوراں نی زبان بچ اک حسن ہے، صفائی تہ سادگی ہے۔“
(مشمولہ: دو ماہی شیرازہ پہاڑی، غزل نمبر 2، صفحہ: 170)
بلا شک خطۂ پیر پنچال نے پہاڑی شاعراں بچ شہباز راجوروی ہوراں نا بڑا ناں اے۔ انہاں غزل نے نال نال پہاڑی بچ نظماں وی تخلیق کیتیاں ہین۔ انہاں نیاں نظماں بچ ریاست جموں و کشمیر نے حالات، وطن نے خوبصورت پیڑ پودے، پھل پھول، اُچّے نکّے، برف، ٹہوکاں وغیرہ نا ذکر بڑے چنگے انداز نال لبنا اے۔ انہاں نی شروع تھیں ہیی عادت سی کہ اوہ ہمیشہ مطالعہ کرنے رہنے سن۔ اسے وجہ نال انہاں نا کینوس بڑا ہوئی گیا سی ہور اس نا اثر انہاں نی شاعری بچ نویں نویں تجربے نی صورت دکھنے واسطے لبنا اے۔ آخر بچ انہاں نی پہاڑی غزل نے دو شعروں پر اس مضمون کی ختم کرنا ہاں ملاحظہ کرو:
چلمل چلمل دینہ بلنا سا سیک اجاں وی اوہ چہلنا سا جسنی لوڑے جعفر جالے اندری اپنے اوہ پلنا سا |
| تحریر: | ڈاکٹر ساجد منیر , شعبۂ گوجری و پہاڑی، بابا غلام شاہ بادشاہ یونیورسٹی رجوری جموں و کشمیر |