Back to: پہاڑی زبان و ادب کے نوٹس
لوک ادب توں مراد اوہ ادب اے جیہڑا سینہ بسینہ اساں نیاں پچھلیاں پیڑیاں توں چلا آ رہیا اے۔ یعنی لوک ادب کسے وی قوم یا علاقے نی زبانی روایتاں، کہانیاں، گیتاں، کہاوتاں، محاورے ہور زبانی قصیاں اُپر مشتمل ہونا اے جہڑا پیڑھی در پیڑھی سینہ بہ سینہ اگے ٹُرنا رہنا اے۔ انگریزی وچ اس کی Folk Literature آکھیا جانا اے۔ ایہہ ادب کسے اک فرد نا تخلیق ہویا نا نہیہ ہونا بلکہ ایہہ سبھاں لوکاں نی سوجھ بوجھ، تجربے تے روایتاں نا نچوڑ ہونا اے، جہڑا صدیاں تھیں لوکاں نی زندگی نا حصہ رہیا اے۔ لوک ادب دو حصیاں بچ ہونا اے۔ شعری لوک ادب تہ نثری لوک ادب۔ شعری لوک ادب بچ لوک گیت تہ لوک بار اچھنے ہین جبکہ نثری لوک ادب بچ لوک کہانیاں ، محاورے ، اکھان تہ بجھارتاں وغیرہ اچھنے ہین۔
شعری لوک ادب
1. لوک گیت (Folk Songs)
اوہ گیت ہونے ہین جِہناں بچ کسے خاص موقعے، تہوار، محبت، ہجرت یا کسے ہور جذباتی احساس کی بیان کیتا جانا اے۔ شادی بیاہ، فصلاں نی کٹائی، لیتری وغیرہ نے موقعیاں اپر لوک گیت بولے جانے ہین۔ پہاڑی علاقیاں بچ کڑیاں عام طور اُپر کھیتاں بچ کم کرنیاں یا کسے تقریب بچ خاص لوک گیت گانیاں ہین۔ ایہہ سب لوک گیت نے زمرے بچ اشنے۔
2. لوک بار:
لوک بار شعری لوک ادب نی اک قسم اے جس بچ سماج نے کجھاں نمائندہ یا سرکرداں لوکاں نی تعریف یا انہاں نی بہادری نے قصے کارنامیاں کی شعری طرز اپر بیان کیتا جانا اے۔
نثری لوک ادب:
1. لوک کہانیاں (Folk Tales)
اوہ کہانیاں جہڑیاں زبانی گل بات نی صورت بچ نسل در نسل اگے پُچھایئی جانیاں ہین۔ انہاں کہانیاں وچ اکثر دیو مالائی گلاں، جادوئی واقعات تہ سبق سکھانےآلے پہلو شامل ہونے ہین۔
2. کہاوتاں یا محاورے
محاورے یا کہاوتاں کسی وی زبان بچ سینہ بسینہ منتقل ہونے آلے اوہ مختصر جملے ہونے ہین جیہڑے سماج بچ ضرب المثال بن جانے ہین اور کسے وی زبان کی فصیح تہ بلیغ بنانے واسطے اہم کردار ادا کرنے ہین۔
3. بجھارتاں
بجھارت اک ذہنی کھیڈ کی آکھیا جانا اے جس وچ کسے چیز یا سوال کی سمجھنے یا حل کرنے واسطے کافی سوچ و بچار کرنے نی ضرورت پینی ہے۔ ایہہ عموماً لفظاں، سوالاں یا نقشے نی صورت وچ ہونے ہین۔ اردو وچ اس کی پہیلی تہ انگریزی وچ Riddles آکھنے ہین۔
پہاڑی لوک ادب نی روایت:
لوک ادب نی روایت بہوں پرانی اے تہ ایہہ بکھ بکھ تہذیباں تہ روایتاں نال جُڑی نی اے۔ پہاڑی علاقے وچ اس روایت نیاں کئی روشن مثالاں لبھنیاں ہین، جِنہاں وچوں شاردہ پیٹھ یونیورسٹی کی خاص مقام حاصل اے۔ ایہہ یونیورسٹی علمی تہ ثقافتی مرکز رہی اے، جتھے فلسفہ، ریاضی، منطق، ہسٹری، جغرافیے نے نال نال علاقائی تہ ادبی زباناں کی وی نصاب وچ شامل کیتا گیا سا۔ ایہی وجہ اے کہ اس ادارے پہاڑی لوک ادب نی ترقی وچ بڑا کردار ادا کیتا اے۔
وقت نے نال نال، پہاڑی لوک ادب نے وی ترقی کیتی اے۔ اج کل ایہہ ادب لکھت نی صورت وچ زیادہ محفوظ کیتا جا رہئیا اے تہ محقق اس اُپر ریسرچ کر رہے ہین۔ پر اس نی اصل روح اوہ لوک گیت، قصے تہ روایتاں ہین، جیہڑیاں اساں نے وڈے بزرگ صدیاں تھوں زبانی سُنانے آئے ہین۔
پہاڑی لوک ادب بچ سب تو پہلا ناں حضرت میاں محمد بخش رحمت اللہ علیہ نا سی جیہڑے 1830 بچ کھڑی شریف آزاد کشمیر بچ پیدا ہوئے اور انہاں نی تاریخ وفات 1907 عیسوی اے۔ میاں صاحب نا پورا کلام کافی اہمیت نا حامل اے لیکن خاص طور ور مثنوی سیف الملوک جیہڑی شاہ مکھی رسم الخط نے ٹیٹھ پہاڑی زبان وچ لکھی گئی اے پہاڑی لوک ادب ناں مأخذ اے۔
پہاڑی لوک ادب بچ سائیں فقر دین پونچھی وی کافی اہمیت نے حامل ہین۔ انہاں باراں ماہ نی صورت بچ ہر مہینے نی موسمی حالت نے مطابق چار چار شعر موزون کر کے شاعری نی صفت بچ شامل کیتے ہین جیہڑے لوک ادب نے زمرے بچ رکھے جا سکنے ہین۔
پہاڑی لوک ادب کی فروغ دین بچ پیرحیدر شاہ، ن پونچھی ، سائیں قادر بحش، سید حاکم شاہ، قمر برکت شاہ وغیرہ کی بلند وقار حاصل رہئیا۔ اس تو علاوہ وی بے شمار کلاسیکی تہ جدید شعراء ہین جہناں لوک ادب کی اگے بدان بچ اہم کردار ادا کیتا اے جنہاں بچ زمان چن، بشارت علی خان راز ، گلاب دین جزا، قیوم شال ساحل، بشارت انقلابی، گلچرن سنگھ گلشن، محمد بشیر شاد، سید اکبر شاہ غمگین، ظفر اقبال منہاس ، نور محمد نور، لعل دین مظلوم ، عزیز ملدیال، بشارت حسین بشارت، حسام الدین بیتاب، پردیپ کھنا، شہباز راجوروی ، فدا راجوروی ، صابر مرزا ، افصل سوز ، رشید قمر، شیخ آزاد احمد آزاد وغیرہ اوہ لکھاری ہین جنہاں لوک ادب نی آبیاری کیتی اے تہ بکھ بکھ لوک کہانیاں، لوک گیتا نال پہاڑی ادب نی چہولی پہری اے۔